Mishiraachechinaꞌo 16
16
Phawuloosinaa Sillaasina Tookkii Ximootiyoosi Hamo
1Aroochee Phawuloosi Sillaasina tookkii Deribi katemoonaa Lisxiri katemoonooch hammiye. Lisxira Ximootiyoosi getteebeeti ikke Yesuusichi dabboo beehe. Bi indee bi mulloon Yesuusi toommooch tooꞌiiti Ayihudecheene; bi nihoo wotta Giriikee ashoone. 2Ximootiyoosi Lisxirinaa Iqooniyooninooch beeti kittinnee maneenaꞌona naadeetone. 3Phawuloosi hini are Ximootiyoosin yechiꞌi hamoyich gabiye. Tunetaa are xaaꞌooch beeti Ayihudeenaꞌo bi nihoo Giriikee asho bi tunoon boonoshi arii beetoyich dokiriye. 4Ebiyee gubb, tookkii katemeenaꞌona besheebee, Yerusaalem beeti mishiraachechinaꞌonaa kittinnee guuphi geeneenaꞌona “Yeer waan wottetinaꞌo eboshin quyebeete” iꞌi boonoshi maacciton boonoshi quyemmoyich ciiccii beeheete. 5Ebich kittinnee guuphinaꞌo Yesuusi toommooch mullee tooꞌiyoona kupphee beeheete. Qeyii qeyiinoo meettii beeheete.
Xiroꞌadaa Phawuloosi Yaaꞌoon Beego
6Aroochee Phawuloosinaa biinna tookkii beetinaꞌona Isiyee showooch Yeerichi qaaroon boonoshi getaachemmoyich, Yaafe Ayaano boonoshin bi bajjitoyich, qajjiꞌi Firigee showoonaa Galaatee showoona besheheete. 7Misiyee showee gaꞌooch shaggiꞌi, Bitaaniya hamma tiyiyeete; tunetaa Yesuusichi Ayaano arooch boonoshi hammemmoyich daaggaanoone. 8Ebich Misiyee showee danoona besheꞌi Xiroꞌadi katemooch hammiyeete. 9Aroobee xum ikke Makidoonee showeexi asho neexeꞌi, “Baharoyee hach kimiree noon gaachebe” iibee bi qolloon Phawuloosi yaaꞌoona beeggiye. 10Phawuloosi hini yaaꞌoon bi beeggitoyee gubb, boonoshich mishiraachee qaaroon no gettemmoyich Yeeri nooch bekkiito bi shaahitoyich, bekkech Makidoonee showooch hamma tiyehon.
Bi Mulloon Yesuusi Toommooch Liidi Tooꞌiyoo
11Are Xiroꞌadee no koteti markaboona indoon Samootiraaq beddaꞌa, bi dechara Napoolis hammehon. 12Aroochee Filipphisiyoosi katemooch shaggehon; Filipphisiyoosi, Makidoonee showeexi katemeenaꞌo bulliichee oogeti katemoone; aroo Roomee waati asheenaꞌo kishooch beeti katemoone. Are katemooch giisheche aaboon kotehon.
13Arooch beebee, shambetoona “Aachi gaꞌooch corootee xaaꞌoo beeyemmone” iyaꞌa no gabitoyich, katemee kelloon kechaꞌa arooch kindiyon. Arooch kiceeti genneenaꞌoyich kotaꞌa, mishiraachee qaaroon gettehon. 14Kiceeꞌi waayeebeeti genneenaꞌo daggooch Liidi getteebeeti, Yeerich qeyaabeeti ikke ure beehan. Biyoo Tiyaxirooni katemoochee waaꞌa, aaxxe gatiyechi damere qoreddoon giixaa beetine. Arooba Phawuloosi gettii beeton manjiiree bi ellemmoyich, Yeeri bi mulloon qechiye. 15Biinnaa bi kechi asheenaꞌona aacona boonoshi afaalleetoyee gubb, “Doono Yesuusi toommooch ta mulloon ta tooꞌiyoo iberoo bi tuno ittoshich bekkegaata, ta kexooch giyiree noonna tookki beebote” iyaꞌa noon manjii qollahan.
Filipphisiyoosaa Phawuloosinaa Sillaasina Cucheyoo
16Ikke areddoon are corootee xaaꞌooch no hammaa beetaa, kaayee ayaano bi toommooch beeti, kaayaabee bi dooninaꞌoyich wodde gijjoon giijjaabeeti, ikke kemee gonnee noonna tookkaa danahan. 17Areyoo Phawuloosinaa noonnon dabbaabee, “Hini asheenaꞌo ittoshi wodemmi gommon ittoshich gettiibeeti Beshe Nuggishoo Yeerichi guuninaꞌone” iibee cookaa beehan. 18Ishichaabee meeti aaboon noon dabbaa cookaa beehan. Tunetaa Phawuloosi iriteechii, gubb wotteꞌi, bushee toommooch beeti ayaanoon “Yesuus Kiristoosichi shigoona neen calleto taane; hini bushee toommoochee tibe” iye. Are ayaanoo bekkech bushee toommoochee tiyiye.
19Arooba bi dooninaꞌo boonoshi gijjee gimi gibenee kuxoon beeggiꞌi, Phawuloosinaa Sillaasinon yechiyeete. Yechiꞌi geechiibee ukkireenaꞌo kiceeti xaaꞌooch daammii, 20Roomechi nallechinaꞌo waan giddiiꞌi neechiyeete. Aroochee ishichiyeete: “Hini asheenaꞌo Ayihudo tuneechii no katemoon shuurikkii beetinaꞌone. 21Roomechi nooch no sheeroona bacheti doyoon gettiyeete; ebin deꞌa geton hakkaachone” iyeete.
22Dofee asheenaꞌo ikkotteꞌi boonoshi toommooch tiyiyeete. Ukkireenaꞌo boonoshi taho shootaa boonoshi xooppemmoyich gettiyeete. 23Phawuloosinaa Sillaasina oogichaa boonoshi xooppetoyee gubb, cuyee kexooch cuchiyeete. Cuyee kechi quyechonoo “Kashoona quyebe” iyeete. 24Biyoo ebi getoon deꞌa iꞌi kechi gatooch giijjii, boonoshi baatoon giindeꞌi cuchiye.
25Tunetaa xumee gutte qellimooch Phawuloosinaa Sillaasina corootiibee shoddoona Yeerin galletee beeheete; arooch beeti qoppeenaꞌoo ellee beeheete. 26Aroochee diqq cuyee kexo shuurimmi wottoon, oogeti showee qewo tunehe. Bekkech cuyee kechi kelleenaꞌo bulli qecheeheete; cuchetinaꞌo bullichi cuyo biishehe. 27Cuyee kechi quyecho tokketoochee tiyiꞌi, cuyee kechi kelleenaꞌo qecheyoon beeggiꞌi qoppeenaꞌo aalletinaꞌo biich shaahaa, bi hajjee kishoona qitiya iꞌi goraadoon kaacciye. 28Tunetaa Phawuloosi bi qaaroon oogichiꞌi, “Ne toommooch gondoon shuuneyaahine; no bulli hiniich beeto noone” iꞌi cookiye.
29Cuyee kechi quyecho “Ceechoon taach deebote” iꞌi ceechii yechiꞌi, cuyee kechi maac wocciye; qeweebee Phawuloosinaa Sillaasinochi baatooch dihiye. 30Boonoshin maaxooch kichiꞌi, “Ta dooninaꞌote, ta wodemmoyich aabichibote?” iꞌi echehe.
31Boonoshiyoo “Ne mulloon Doono Yesuusi toommooch tooꞌiibe; neennaa ne kechi asheenaꞌona wodemmo ittoshine” iyeete. 32Aroochee biinnaa bi kechi asheenaꞌo bullinoyich Doono Yesuusichi qaaroon gettiyeete. 33Cuyee kechi quyecho bekkech xumoona boonoshin daammiꞌi, boonoshi mayon aacona machiye. Aree hillooch biinnaa bi kechi asheenaꞌo bullina aacona afaalleeheete. 34Ebiyee gubb, Phawuloosinaa Sillaasinon bi kexooch daammiꞌi, maayoon boonoshich giddiihe. Biinnaa bi kechi asheenaꞌo bullina boonoshi mulloon Yesuusi toommooch boonoshi tooꞌitoyich, emiroona wucwucciyeete.
35 Dechara Roomechi nallechinaꞌo “Are asheenaꞌon biishe” iꞌi cuyee kechi quyecho waan ginechinaꞌon wocheheete. 36Biyoo “Biicheebote iꞌi nallechinaꞌo wochoon deejjitinaꞌone; illa keyote; diggoona hambote” iꞌi Phawuloosich gettiye.
37Tunetaa Phawuloosi wocheeti ginechinaꞌoyich wochiꞌi, “Roomi showee asho noon nallaalloon asheenaꞌo aafooch xoobbiꞌi cuchiyeete. And aashoona ‘Keyote’ iyeete? Tuneyaache. Hini are Roomechi nallechinaꞌo boonoshi hajjee baatoona waaree noon kichibeete” iye.
38Ginechinaꞌo ishin Roomechi nallechinaꞌoyich hammii gettiyeete; nallechinaꞌo Phawuloosinaa Sillaasina Roomi showee asheenaꞌo boonoshi tunoon waayeꞌi shattiyeete. 39Ebich cuyee kexooch hammiꞌi, “Noon maaribote” iꞌi qolleheete. Kichiꞌi, “Hini katemoon qayiree hambote” iꞌi qolleheete. 40Phawuloosinaa Sillaasinoo cuyee kexoochee kechiꞌi, Liidi kexooch giyiyeete. Arooch beeti kittinnee maneenaꞌon kupphiiꞌi tiyii, katemoon gawukkii hammiyeete.
ទើបបានជ្រើសរើសហើយ៖
Mishiraachechinaꞌo 16: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
