Mishiraachechinaꞌo 13
13
Barnabaasinaa Sawulina Kaacceyoo
1Are Antsooki kittinnee guuphi asheenaꞌo daggooch keemechinaꞌonaa Yeerichi qaaree dojjechinaꞌona beeheete. Boonoshiyoo Barnabaasi, Aaꞌo getteebeeti Simooni, Qerenechi Luqiyoosi, Galiilee iraashoo Heroodisina#13:1 Heroodisi Galiilee taatoone. tookkii dicciti Minaahi, Sawuli eboshine. 2Eboshi coomiꞌi Doonoch goyinnee boonoshi beetaa, Yaafe Ayaano “Barnabaasinaa Sawulinon ta ceeggeti shuunoyich bariibote” iye. 3Arooba coomii corootii boonoshi itoyee gubb, hini gutte asheenaꞌochi toommooch boonoshi kishoon kotiiheete. Aroyee gubb deennii daachiiheete.
Qoophiroosee Showooch Mishiraachee Qaaro Getteyoo
4Ebich Barnabaasinaa Sawulina Yaafe Ayaanoona wocheeꞌi baharee gashooch beeti Seleeqi katemooch hammiyeete. Aroochee markaboona Qoophiroos hammiyeete. 5Salamiisi katemooch beebee, Ayihudeenaꞌo kiceebeeti kexooch giyiꞌi, Yeerichi qaaroon dojjiyeete. Arooba Yowannisi#13:5 Maariqoosichi bare shigoone. boonoshin deggii beehe.
6Ebiyee gubb, Qoophiroosee showoo bullin guuddii, Phaafi katemooch shaggiꞌi, Bariyaasi getteebeeti Ayihudee allaamoon daneheete; aroo koote keemechone. 7Bi beetoo, Sarigiyoos Phawuloosi getteebeeti mullechi, Qoophiroosee iraashoona tookkiiniye. Hini iraashoo Barnabaasinaa Sawulina waanee Yeerichi qaaroon waayoyich boonoshin bi kexooch ceekkiihe. 8Tunebaani Bariyaasi woyee Giriikee noonoona Elimaasi getteebeeti allaamoo, hini Qoophiroosee iraashoo mishiraachee qaaroon bi iberiyaachemmoyich, Phawuloosinaa Sillaasinochi yibbaatoon kootiiya qiiccehe. 9Phawuloosi getteebeeti Sawuli Yaafe Ayaanoona ceenniꞌi manjii biin ciinniꞌi, 10“Aconaa gonde mooyona ne mullooch ceenniti hini daabiloosichi bushoochoo, tato tuneti mooyon shunaanoocho, kaamoo tuneti, Doono Yesuusichi gommon xummiyoochee kasheyaachenne? 11Andoo Doono magge mooyon ne toommooch deebemmone; aaf doogo tunemmo neene; aabee bekkoon ikke wotteenolla beegaachemmo neene” iye.
Bekkech areegaata bi aafo quboochoommon kaappii manderehe; aroochee bi kishoona yeshi yaabemmi ashoon shafee qaawiye. 12Arooba Qoophiroosee iraashoo tuneti mooyon beeggiꞌi, “Doono Yesuusichon ittoshi dojjiibeeti doyoo bulli manjoone” iꞌi worganeebee bi mulloon Yesuusi toommooch tooꞌiihe.
Fesidee Showooch Beeti Antsooka Mishiraachee Qaaro Getteyoo
13Phawuloosinaa biinna tookkii beetinaꞌona markaboona, Phaafee tiyiꞌi, Fenfula beeti Feriga hammiyeete. Aroochee Yowannisi#13:13 Maariqoosichi bare shigoone. boonoshi waanee bariꞌi Yerusaalem wottee hammiye. 14Boonoshi wotta Ferigina besheꞌi, Fesidee showooch beeti Antsooka shaggiyeete. Arooch beebee, shambetooba boonoshi kiceebeeti kexooch giyiꞌi koteheete. 15Muusichi Sheeroonaa keemechinaꞌo kooriti macaafoonoochee bi shemmeetoyee gubb, Ayihudeenaꞌo kiceebeeti kechi ukkireenaꞌo boonoshi waan ashoon daachiiꞌi, “No maneenaꞌote, asheenaꞌon kupphiyemmi qaaro beegaata, getote” iyeete.
16Ebich Phawuloosi tiyiꞌi kishee malletoona ellebote bi itoyee gubb, ishichiye: “Hini Israꞌeeleenaꞌote, wotta Yeerich hajjeebeeti Aageteenaꞌote, waayebote! 17Hini Israꞌeeleenaꞌo goyinneebeeti Nuggishoo no qaabbechinaꞌon kaacciye. Boonoshiyoo Gibits dallaawittinoona boonoshi beetaa, boonoshi meettemmonaa giidemmonoyich tuniihe; wotta giidechi bi mochoona aroochee boonoshin kichiye.#Key. 1:7; 12:51 18Wotta barahoochaa aabbe naton boonoshin haaꞌiihe. 19Kanaanee showooch beeti shabaatte aagetee asheenaꞌon aalliichii, boonoshi showoon iristo tuniiꞌi bi asheenaꞌoyich immiye.#Yibba. 7:1 20Boonoshiyoo Gibits boonoshi giyitoochee tiijjiꞌi, hini showoon boonoshi bullemmi wottoon awudde ballaa aache natt bedoone.
“Ebiyee gubb, keemechi Saameelichi yemeenooch beddaahaa, woraaferasheenaꞌon boonoshich immiye.#Wora. 2:16; 1 Saam. 3:20 21Aroochee asheenaꞌo taatoo boonoshich taatemmoyich qolleheete. Yeeriyoo Biiniyaami yoodoochee Qiishichi bushoo Saaꞌoolin boonoshi toommooch aabbe naton taatiihe.#1 Saam. 8:5; 10:21 22Biin bi kindiitoyee gubb, Daawiti boonoshi toommooch bi taatemmoyich kaacciye. Biichon ishichiꞌi miixehe: ‘Ta mullooch giyiti ashoon daneto taane; biyoo ta gaboo bullin ceechemmi, Iseyichi bushoo Daawitine’ iye.#1 Saam. 13:14; 16:12
23“Wotta ‘Hini uroochi yaroochee Israꞌeeleenaꞌoyich wodiyecho tunemmo kechemmone’ iꞌi bi gibenikkiti gibenoona Yesuusi waatone. 24Bi waataan beetaa, shiichiꞌi, Yowannisi Israꞌeelee asho bullin ‘Axaaxee gommoochee Yeer waan wotteree aacona afaalleebote’ iꞌi gettitone. 25Yowannisiyoo bi shuunoon ciicha beddiꞌi tiyii asheenaꞌon ‘Taan konine ii beetote?’ iꞌi echehe. ‘Ta, “Woyemmone” iꞌi ittoshi quyeebeeti uro toono taane. Tunebaani bi ta hillooch waa beetone; ta bi caammee cuyoon biishoyichona bedaano taane’ iye.#Maat. 3:11; Maar. 1:7; Luqa. 3:16; Yowa. 1:20,27
26“Andoo hini Abrahamichi yaroo tuneti ta maneenaꞌote, wotta no daggooch beeti, Yeerich hajjeebeeti Aageteenaꞌote, Yeeri hini no wodemmi qaaroon nooch deejjitone. 27Tunetaa Yerusaalem beeti asheenaꞌonaa boonoshi ukkireenaꞌona shambeti shambetooba shemmeebeeti keemechinaꞌochi qaaro bi ceennemmoyich, bi toommooch nalliyeetalli, Yesuusi koni bi gaata ariyaaneenaꞌone. 28Qitooch bechimmi naboon bi toommoochee boonoshi dano qajjitaanona, Phelaaxoosi biin bi wuxemmoyich qolleheete.#Maat. 27:22-23; Maar. 15:13-14; Luqa. 23:21-23 29‘Bi toommooch tunemmone’ getaa kooreeto bullin boonoshi tuniitoyee gubb, masqaloochee kindiiꞌi duukkiyeete. 30Tunetaa Yeeri qitoochee biin tiijjiye. 31Biinna tookkii Galiilee showoochee Yerusaalem waatinaꞌoyich wodde areddoon bekkehe.#Mish. 1:3 Boonoshiyoo and Israꞌeeleenaꞌoyich bi miixeenaꞌone.
32“Ebich Yeeri qaabbechinaꞌoyich bi gibenikkiti mishiraachee qaaroon ittoshich getta waato noone. 33Guttinnee yaafe shoddoochaa
‘Ne, ta Bushoo neene;
hanaach neen shiyeto taane’#Shod. 2:7
getaa bi kooreetoommon, Yeeri qitoochee Yesuusin tiijjiꞌi, hini bi gibenikkiti gibenoon boonoshi bushiishoo nooch ceechitone. 34Yeeri qitoochee bi tiijjito, guttinnoon qitiree bi ashittino oꞌaachemmoyichiye. Ebich Yeeri
‘ “Yaafeeti wojjoon neech immemmo taane” iyaꞌa
Daawitich gibenikkito taane;
hini are gibenoon iberoon ittoshich ceechemmo taane’#Isi. 55:3
itone. 35Ebich wotta bare xaaꞌoochaa
‘Ta ne yaafoon oꞌe iyaꞌa daaggaano neene’#Shod. 16:10
ii beetone. 36Wotta Daawiti bi yemeenooch Yeerichi daaggoon bi ceechitoyee gubb, qitiꞌi bi qaabbechinaꞌo maashooch duukketone; bi meenoo oqqitone. 37Tunebaani hini Yeeri qitoochee tiijjito bi meeno oꞌaanoone.
38“Illa ta maneenaꞌote! Ittoshi axaaxoyich maaroon ittoshi danemmo Yesuusina tuno ittoshich bi getteyoon ariibote. 39Wotta bi mulloon Yesuusi toommooch tooꞌiito bulli, Muusichi Sheeroo biisho hakkaani axaaxoo bulliichee biinna biicheyemmo bi tunoon ariibote. 40Ebich keemechinaꞌona ishichaa getteeto ittoshi toommooch bi shagaachemmoyich ittoshi qelloon quyebote:
41‘Hini cooqqirechinaꞌote, beegote! Worganebote! Aallebote!
Koniyoona getaa, ittoshi iberiyaani shuunoon
ittoshi yemeenooch shuunemmo taane’#Imba. 1:5” iye.
42Phawuloosinaa Barnabaasina Ayihudeenaꞌo kiceebeeti kexoochee kechii beetaa, asheenaꞌo “Hini mooyon waabeeti shambetooba guttinnoon nooch getote” iꞌi qolleheete. 43Kiceeti asho shaccetoyee gubb, Ayihudeenaꞌonaa Ayihudeenaꞌo waan wotteꞌi Yeerich qeyii beetinaꞌonochi daggoochee meeti asheenaꞌo Phawuloosinaa Barnabaasinon dabbiyeete. Phawuloosinaa Barnabaasina hini asheenaꞌon “Yeeri ittoshich immiti wojjoona manjiree beebote” iꞌi ciicciyeete.
44Guttinnee Ayihudee shambetooba giisheche asho baach echeechaa, katemeexi asheenaꞌo bulli Yeerichi qaaroon waayeya kiceeheete. 45Tunetaa hini kiceeti dofee asheenaꞌon Ayihudeenaꞌo beeggiꞌi oogichii qanaateheete; naageebee, “Phawuloosi gettiti qaaro tato toonoone” iyeete.
46Tunebaani Phawuloosinaa Barnabaasina aafoon kuppheꞌi ishichiyeete: “Yeerichi qaaro shiichii ittoshich getteyoo qaawiihe. ‘Waayeꞌi deꞌa getaachone’ ittoshi getona ittoshi toommooch nallito ittoshine; ebich bulli yemeenee kashoon danoyich beddito tuneyaachemmo ittoshine. Illa no, Aageteenaꞌo waan hammaabeeto noone. 47No hammaabeeti naboo, Doono,
‘Showee toommo bulliich beddaahaa beeti asheenaꞌo neenna wodemmoyich,
Aageteenaꞌoyich neen ceechoo tuniito taane’#Isi. 49:6
iꞌi nooch bi gettitoyichiye” iyeete.
48Aageteenaꞌo ishin waayeꞌi, emiriibee Doono Yeerichi qaaroon oogiiheete. Yeeri bulli yemeenee kashoon boonoshi danemmoyich, bi kaaccitinaꞌo bulli boonoshi mulloon Yesuusi toommooch tooꞌiiheete.
49Ebich Doonochi qaaro are showoo bulliich gaminniye. 50Tunetaa Ayihudeenaꞌo “Yeerich qeyehone” ii beeti gaannechi genneenaꞌonaa katemeexi ogooge asheenaꞌonon kocciꞌi, Phawuloosinaa Barnabaasinochi toommooch kaaroon tiijjiꞌi, boonoshi showoochee kichiyeete. 51Ebina Phawuloosinaa Barnabaasina boonoshi baateexi quttoon tebbeechii tiyiꞌi, Iqooniyooni katemooch hammiyeete.#Maat. 10:14; Maar. 6:11; Luqa. 9:5; 10:10-11 52Arooba Yesuusichi dabbeenaꞌo oogichii emiriyeete; Yaafe Ayaanoonoo ceenniyeete.
ទើបបានជ្រើសរើសហើយ៖
Mishiraachechinaꞌo 13: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
