Mishiraachechinaꞌo 1
1
Yaafe Ayaanoon Bi Asheenaꞌoyich Imma Yeeri Gibenikkoo
1-2Teefilooso, Yesuusi kaacciꞌi bi wocheti mishiraachechinaꞌoyich Yaafe Ayaanee giidoona gettiichii, shimaajj bi kechimmi wottoon, bi shuuneti shuunoonaa bi dojjiti mooyo bullinon batti batti ta macaafooch koorito taane.#Luqa. 1:1-4 3Yesuusi wodde xuuxoona bi qititoyee gubb, mishiraachechinaꞌoyich xalla bekkeebee kashecho bi tunoon wodde gommona manjiihe. Aabbe qemon bekkeꞌi, Yeerichi taatittineechon boonoshich dojjii beehe. 4Wotta boonoshina tookkii beebee boonoshich ishichiye: “Yerusaalemee bara kechaahote. Tunebaani ta waanee ittoshi waayeti ta Nihoo gibenikkiti gibenoon quyebote.#Luqa. 24:49 5Yowannisi asheenaꞌon aacona afaallitone; tunebaani and giisheche aaboyee gubb Yaafe Ayaanoona afaalleyemmo ittoshine” iꞌi gettiye.
Shimaajj Yesuusi Keyo
(Maariqoosi 16:19-20; Luqaasi 24:50-53)
6Yesuusi wocheti mishiraachechinaꞌo biinna tookkii ikkooch kiceeꞌi beebee, “No Doonocho, hini yemeenee maacooch taatittinoon Israꞌeeleenaꞌoyich wochiree immenne?” iꞌi echeheete.
7Biyoo wochiꞌi, “Ta Nihoo bi hajjee shalligoona bi neechiti ageneenaꞌonaa yemeeneenaꞌonon ittoshi ariyemmoyich, ittoshich daaggaanoone. 8Tunebaani Yaafe Ayaano ittoshi toommooch bi kindiyooba, giidoon danemmo ittoshine. Arooba Yerusaalem, Yihudee showoo bulliich, Shamaaree showooch, showee tuggo bulliichoo ta mooyon miixemmo ittoshine” iye.
9Yesuusi ebin bi gettitoyee gubb, bi wocheti mishiraachechinaꞌo ciinnii beetaa, shimaajj kechiye; quboo boonoshi aafoochee biin qeriye.
10Shimaajj bi keyon manjiiꞌi boonoshi ciinnii beetaa, nacce tahoon taheti gutte asheenaꞌo boonoshi gaꞌooch neexeechii, 11“Hini Galiilee asheenaꞌote, kaama shimaajj ciinniibee amoyich neexee beetote? Hini ittoshi waanee shimaajj kechiti Yesuusi, shimaajj bi keyaa ittoshi beeggitoommon, ebiyoommon wotteree woyemmone” iyeete.
Yihudi Keroyich Maatiyaasi Kaacceyoo
(Maatiyoosi 27:3-10)
12Ebiyee gubb, mishiraachechinaꞌo Zayitee Michi guudoochee Yerusaalem wotteheete. Hini aroochee tiijjii Yerusaalem beddaahaa beeti gommo shambetee gomma#1:12 Shambetee gommo, ikke kiilo meetir bede gommone. bedoone. 13Katemooch shaggiꞌi, boonoshi beeti, kechi toommeexi kexooch kechiyeete. Boonoshiyoo Pheexiroosi, Yowannisi, Yaaqobi, Indiriyaasi, Filipphoosi, Toomaasi, Baritelemoosi, Maatiyoosi, Ilfiyoosichi bushoo Yaaqobi, bi aagetoyich qanaatechi Simooni, Yaaqobichi bushoo Yihudi, eboshine. 14Eboshi bulli genneenaꞌonaa Yesuusichi indee Maariyamina tookkii, wotta Yesuusichi maneenaꞌona tookkii bulli aaboon ikkottee kiceeꞌi corootii beeheete.
15Ikke areddoon kiceeꞌi boonoshi beetaa, balli hiya bede Yesuusichi asheenaꞌo daggooch Pheexiroosi tiyii neexeꞌi ishichiye: 16“Ta maneenaꞌote! Ebiyee aaf Daawitin Yaafe Ayaano shalligichaa, Yesuusin yechiti asheenaꞌon dabbiiꞌi deebiti Yihudichi mooyon keemmitone. Hini bi keemmiti macaafee qaaro ceenn bedo bi tunetoyich ceennitone. 17Hini are Yihudi no daggooch bacceeꞌi no shuunee gogecho tunetone” iye.
18Hini are uro bi daneti axaaxee gijjoona showoo kemeehe. Biyoo baroona guufeꞌi gutta gaahehe; bi maacee meenoo shekirehe. 19Hini mooyo Yerusaalem beetinaꞌo bullich waayeehe. Ebich are showoo boonoshi noonoona Akalidami getaa shigehe. Ebi getoo Damee Showoo getone.
20Pheexiroosiyoo daakkiꞌi, “Ebich Shoddee Macaafoochaa,
‘Bi beeyi xaaꞌoo shokko echebe;
arooch koniyoona gafaaye,’
wotta
‘Bi ukkirittinoon baroo ukkirebe’#Shod. 69:25; 109:8
getaa kooreetone. 21-22Ebich no daggooch bacceeree, Yesuusi qitoochee bi timon miixemmi ikke ashoon kaacone; biyoo Yowannisi aacona afaalloochee tiijjiꞌi, Doono Yesuusi shimaajj bi kechiti aabooch beddaahaa, no daggooch bi shaꞌeti areddoo bulliich noonna tookkii beeti asheenaꞌo daggoochee ikkoo tuno qaawiihe” iye.
23Ebich gutte asheenaꞌon Yusxoosi woyee Barisiyaani getteebeeti Yooseefinaa Maatiyaasinon neechiichii, 24-25ishichiꞌi corootiyeete: “Bullichi mulloon ariibeeti no Doonocho, Yihudi bi shuunoon deqqa hammiibee, duppii bi hammiti xaaꞌooch mishiraachechinaꞌona tookki bi shuunemmoyich ne kaacceton hini gutteenaꞌo daggoochee aabi gaata nooch bekkiibe” iyeete. 26Boonoshi ishichitoyee gubb, ixoon duppiyeete; ixoo Maatiyaasin yechiye; ebina Maatiyaasi aaraa ikke mishiraachechinaꞌo toommooch daakkeeꞌi haddeehe.
ទើបបានជ្រើសរើសហើយ៖
Mishiraachechinaꞌo 1: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
