Mbete Rɔmri 6
6
1Mí kaŋaw ba, ɓay fe mí-i él ɓah ɓáy le ? Náh toŋ laɓ suya ɓay hi̧ lawsuki ye ɓá seh ma pol le wo ? 2Kaŋ ya ! Nah hu poŋ suya da ba, ani wara mí nah el mbí suya si keni siŋ sina ra ɓáy le ? 3Guh law woiri ya ɓáy le wo ? Ɓay fe le a wah ké nah ti̧h ɓil batem Mbay Zezu da ra, nah ti̧h ɓil batem ye hu ziŋ ni. 4Ɓil batem ye-aw nah hu ziŋ ni ké ɓilu, ku gɔr na ziŋ ni mbew yaŋ. Kandɔk Ŋgermbay ké ti̧h ké sakra hulri ɓay riŋ ɗina baah, kaŋ pi mí a wah kara nah ti̧h ziŋ ni ke ɔkna ɓa nzuk pirmatul a foyu ɓay náh si siŋ sina nzuk pirmatul a foyuri. 5Sa̧w wah mbew ziŋ ni kandɔk ké nah eŋ ni ɓil hul ye-aw le, nah éŋ ni ɓil ti̧hna ye ke pa̧ymun a foyu ra pi.
6Nah tu wuri ɓahri se, sa̧w mbuŋna wah a titilu hu ziŋ ni mbew ké tul kpuh vbatay ɓay ɔh ziŋ Suya hi̧ Suya ɓá lak mbay tul mun wah mba#6.6 Í mgba Gun mbete 1 Za̧h 3.8 tuh ke gel ki̧na-ay. . Dale nah ɓa mgbal Suya mba. 7Nzuk ké hu ziŋ Ŋgermbay le, lák mbay Suya ko ni mba. 8Gelke nah hu ziŋ Ŋgermbay le, law wah te sa tul ɔkna ye ké ƴo ziŋ na pi. 9Nah tu ɓahri se, Ŋgermbay ti̧h ké sakra hulri, ke ta hu hul mba. Hul ta ɗi riŋ ye mba wu̧m. 10Ké-e hu ra, ke hu bɔk mbew yaŋ i ŋgerna Suya, ké-e el kaɓ ke ɔkna le, kaɓna ye gbam, ke el hi̧ Ŋgerzah. 11Kaŋ pi mí a woiri ké i ƴo ziŋ Mbay Zezu ra, ɓay Suya le, í ko mun woiri ɓa hul ɓayu ké i sɔɓ fal ti Suya. Sa̧w kaɓna woiri ɓa Ŋgerzah wara.
12Dale Suya ɓá lak mbay tul mun woiri mba hi̧ mun woiri ké ɓay pu-puŋ ɓá laɓ fe ké Suya tasa̧y laɓu keni mba. 13-14Í hi̧ mun woiri hi̧ Suya ya rɔkɔ ké mbi mun woiri ɓa fe rem-laɓ suya ye. Le kandɔk nzukri ké ti̧h ké sakra hulri el kaɓ ke ɔkna, í poŋ mun woiri yɔɗ hi̧ Ŋgerzah ɓay ké mbi mun woiri ɓa fe rem ketina ye ɓa záh woiri ma, ɓayu ké Suya ta lak mbay tul woiri ya ɓayu ké mbete bolkusol Ŋgerzah mgba tul woiri mba. Le lawsuki Ŋgerzah mí mgba tul woiri wara.
15Ké nah ɓa mgbal mbete bolkusol mba, mí nah ɓa mgbal lawsuki le, náh el laɓ suya ɓáy le wo ? Kaŋ ya ! 16I tu wuri ya lo ? Gelke i hi̧ tul woiri hi̧ nzuk ɓay lah nzak ye dale, i ɓa mgbal nzuku. Kusol nzuk a suŋ suŋ ké i lah nzak ye le, i ɓa mgbal ye. Ɓa ra Suya ké si ziŋ mu gel hul mini ɓa hȩ́k Ŋgerzah ké mbu̧h mu mbew ziŋ ni le, i ɓa mgbal ye.
17Lawsuki ɓa nzuku a Ŋgerzah ɓay fe le, lewsa̧ i ɓa mgbal Suya, keni-aw kara i lah sa̧w fe sɔkna mbete bolkusol ké i mgba giri giri ma law. 18Mí sal mgbal Suya nzom ké tul woiri da-ay, i ti̧h ɓa mgbal sal in Ŋgerzah ké-e ŋga̧h ziŋ wuri ɓa záh woiri wara. 19Mi ƴo ɓah hi̧ wuri ke sam ɓay ɓahna nzuk pirmatul ɓay ŋgerna woiri ké mah ya kandɔk ké lewsa̧ i mbi mun woiri ɓa mgbal fe laɓna a pipiri-u ké mah nun Ŋgerzah ya, ké i ɓa gun-mba nzak Ŋgerzah pi ɓay laɓ keni mgbɔrɔ. Aŋay ba, kandɔkaw pi mí í mbi mun woiri ɓa mgbal sal inu ké mbu̧h wuri mbew ziŋ Ŋgerzah ɓay í poŋ mun woiri ɓa nunu a ye. 20Sew ké i ɓa mgbal Suya ra, law in Ŋgerzah le ɗi tul woiri ya. 21Sewu-aw sam fe laɓna a suŋ mí ɓa pihna woiri le ? Pihna-aw eŋ lehna kpuh, mí lehna-u ɓa su̧hru hi̧ wuri aŋay ɓayu ké ɔh tɔr lehna-u ɓa hul. 22Mí aŋay sal mgbal Suya nzom ké tul woiri da-ay, i ti̧h ɓa mgbal Ŋgerzah wara. Mi̧hri woiri ɓa sam mi̧hri ké leh lehna hi̧ i ɓa nunu a Ŋgerzah dale, ɔh tɔru ɓa ɔkna ké na ɓa ŋgɔh. 23Kpaŋndɔk Suya ra ɓa hul, mí fe hi̧na ké Ŋgerzah hi̧ na a wah ké nah ƴo ziŋ Mbay Zezu Gaŋ wah ba, ɓa ɔkna ye ké ƴo ziŋ na sew ke sew.
ទើបបានជ្រើសរើសហើយ៖
Mbete Rɔmri 6: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
