Mbete Rɔmri 2
2
1Sa̧wu mí ya̧m mun ta-a. Nzuk pirmatul, mu ɓa ge ra wara mú-u ɓaŋ ɓay kan tul nzuk mbaŋ wo lo ? Ɓay fe le ɓay ké mu ɓaŋ kan tul mbaŋ wo-aw, mgba tul wo da ɓayu ké mu ƴo laɓ fe-u pi. 2Nah tu wuri tu, nzukri ké ƴo laɓ fe a kaŋawri ra, kúŋ salɓay Ŋgerzah si tul woyri ke gelu gelu ɓa ketina.
3Nzuk pirmatul, ɓayu ké mu mgba mbaŋ wo ke ɓay, mí mu toŋ laɓu ra wa, salɓay Ŋgerzah ta mgba tul wo keni ya le ? 4Uwa, mu ɓahri, iklaw ye, káɓ ɗeŋ ye, lawsuki ye gbam ɓa kɔk fe. Mu tu ya le wo ? Lawsuki ye ké-e yih laɓ ziŋ mu ra ƴo ɓay kɔklɔ mu ké ɓil tí̧h zer wo el gi ta̧w ye. 5Mí tul wo kpuh, mu sa mbi law wo ké tul fe laɓna wo ya. Mu ƴo hi̧ haŋ fa̧hna Ŋgerzah ka̧y tul hani ka̧y tul hani ɓay tul wo. Ké ɓil sew haŋ fa̧hna ɓa sew ké ketina salɓay Ŋgerzah ten mun, fe-u ɓay toh tul wo. 6Mí ke hí̧ nzuk a suŋ suŋ le kpaŋndɔk mah ke fe laɓna ye, fe laɓna ye#2.6 Ɓayay na Mbete Siŋ (Psaumes) 61.13 ke Mbete Proverbes 24.12.. 7Nzukri ké ƴo ƴah riŋ ɗina, ƴah pirna, ƴah káɓ ɓa ŋgɔh, mí ku su̧h law ƴo laɓ suki le, kpaŋndɔk woyri ɓa ɔkna sew ke sew. 8Mí nzukri ké lah nzak rɔkna kú-u sɔɓ fal ti Ŋgerzah, mí ku to ketina ma fal ɓay ɓil woyri le, kpaŋndɔk woyri ba, ɓa haŋ fa̧hna ké ur tuh tuh. 9Koseh ke fe-se law na ɓay tul nzuk a suŋ suŋ ké pihna woyri ɓa láɓ suya titilu ké tul sa̧w ziɓri pol dara mí sa̧wnzuk a ɓoruri pi. 10Riŋ ɗina, pirna, ɗeŋ ɓa nzuku a nzukri gbam ké ƴo laɓ suki, sa̧w ziɓri pol dara mí sa̧wnzuk a ɓoruri pi. 11Kandɔkaw, Ŋgerzah kehr nzuk ya.
12Mí sa̧wnzukri ké ta ke bolkusol Ŋgerzah ya, ku laɓ suya le, ku zíŋ ɓeɓna ɓay suya woyri kú-u laɓ dan bolkusol ra. Ziɓri ba, ku ƴo ke mbete bolkusol Ŋgerzah, ku laɓ suya le, bolkusolaw mí salɓay woyri ɓay kuŋ keni. 13Ɓay fe le tú bolkusol kaŋto mí hi̧ Ŋgerzah ŋga̧h sal in ziŋ nzuk ya. Wara le, nzukri ké ƴo tul bolkusol ye mí Ŋgerzah ɓay ŋga̧h sal in ziŋ niri. 14Gelke sa̧wnzuk a ɓoruri ké ta ke mbete bolkusol Ŋgerzah ya, mí fe laɓna woyri mah hani ke bolkusol ye dale, a woyri kú-u ta ke mbete bolkusol ya ra, bolkusolaw mí na law woyri. 15Fe laɓna woyri ƴo sɔk ɓahri, bolkusol Ŋgerzah vbeh kan law woyri da. Kerɓay woyri ke law woyri ƴo lu lakna ɓayu ziŋ hani mbɔk. Ku ƴo ruh ziŋ hani. Seh a ɓoru le, ƴo laɓ ɓay kan tul woyri. Seh a hani bale, ƴo ten tehɓay woyri. 16Namu mí Ŋgerzah ƴo ten ɓay ké mu̧h ɓil law nzukuri, ɓay kehr ɓay ké si mah hani ke ɓaysuki Mbay Zezu ké mi ka-kah-u.
17Mí a wo ziɓ ké mu vba̧ haŋ ɓay sa̧w wah ké ɓa ziɓ, mu poŋ mun wo ɓu ɓil mbete bolkusol Ŋgerzah, mu vba̧ haŋ ɓay sa̧w záh wah Ŋgerzah. 18Mu tu fe ké-e yih, mu hi̧ tul wo hi̧ mbete bolkusol ké sɔk mu mahful Ŋgerzah ke gelu gelu. 19A wo ziɓ, mu ko sa̧w wo, mí mu ɓahri, mu ɓa gun-mgba ka̧w ra̧wri. Mu ko sa̧w wo ɓa gel tehna sa̧wnzuk a ɓoruri ké ƴo ɓil tirim. 20Mu ɓahri, mu ɓa nzuk-sɔk bolkusol hi̧ kɔk sa̧wnzukawri-aw ké tu bolkusol ya. Mu ɓahri, mu ɓa nzuk-nda pol gunri pi, sɔk ɓahri, ziɓ ƴo ke mbete bolkusol, mí mu ziŋ fe tuna ke ketina ké ri. 21Kaŋ mí a wo ziɓ, mu sɔk ɓay Ŋgerzah hi̧ sa̧wnzuk a ɓoruri, mí mu sɔk tul wo ya dih lo ? Mu sɔk ɓahri, riɓa su ya, mí mu ri-riɓa ley ? 22Mu ɓahri, nunpuki su ya, mí mu laɓ nunpuki ley ? Mu gen fe záh a ɓoruri ŋgeŋ ŋgeŋ, mí mu lɔm fe kani záhri-aw ley ? 23Mu ƴo vba̧ haŋ ɓay bolkusol, mí mu ko Ŋgerzah mah nun wo ya, ɓayu ké mu poŋ bolkusol ye. 24Sa̧wnzuk a ɓoruri ko, mí ku sak riŋ Ŋgerzah ɓay tul woiri#2.24 Ɓay ké gel ki̧na-ay eŋ gel ki̧na Mbete Esaïe 52.5.. Kaŋ mí ku vbeh kan ɓil mbete lewsa̧.
25Mu hȩk bolkusol Ŋgerzah le, kúŋ ndi̧w ké Ŋgerzah lu keni ziɓri ɓa fe a kpakpaŋu hi̧ mu, mí mu to suyɓay bolkusol Ŋgerzah ma fal le, sa̧w wo mah hani ke sa̧wnzuk ndi̧w ɓɔlri. 26Mí nzuk ndi̧w ɓɔl ba, ke ƴo tul ketina bolkusol Ŋgerzah le, Ŋgerzah ɓay ko ni ɓa sa̧wnzuk-kuŋ ndi̧w, ya lo ? 27Kaŋ mí a ye ké sa̧w ye ɓoɗ ké-e kuŋ ndi̧w ya, ke ƴo tul bolkusol ra ɔh, ke ndíh mu ke ɓay, a wo ziɓ ké mu ƴo ke mbete bolkusol, ké mu ƴo kuŋ ndi̧w, mí mu to suyɓay bolkusol Ŋgerzah ma fal, 28ɓayu ké tí̧h ɓa ziɓ ɓa fe ké nzuk ko ke nun ya. Kúŋ ndi̧w kara ɓa haymun kaŋto ya pi. 29Mí tí̧h ɓa ziɓ le, sa̧wu na ɓil law. Kúŋ ndi̧w kara ɓa sal in ké Tempuki ŋga̧h ké law, ta ɓa sal in kú-u ŋga̧h ké mbete ya. Ziɓ a kandɔkaw, nzuk-pir riŋ ye ta ɓa nzuk pirmatul ya, mí ɓa Ŋgerzah mí pir ni#2.29 Í mgba Mbete Deutéronome 10.16 ke 30.6 tuh ke gel ki̧na-ay..
ទើបបានជ្រើសរើសហើយ៖
Mbete Rɔmri 2: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
