Mbete Fe laɓna Tempuki 22
22
Pɔl ɓah nzak ye
1« Bah biri ke yi̧n biri, í te wuri suk lah ɓay bi ké mi ɓáh-ay. »
2-3Ku lah ɓay ɓahna ké-e ƴo ɓah hi̧ niri ke nzak mbuŋna woyri bale, ku kaɓ silili, mí Pɔl ɓah hi̧ niri ɓahri : « A bi ra, mi ɓa ziɓ gaŋ. Ku mbuŋ mi ké Tarsi tusiɓa Silisi. Mi hu̧h ké Zurusalemay. Gamalyel#22.2-3 Í ki̧ Mbete Fe laɓna Tempuki 5.34 ɓay tu ɓay Gamalyel. mí firma mi bolkusol ké Ŋgerzah hi̧ zih wahri ke gelu gelu. Mi ri̧h si̧w tul ɓay Ŋgerzah ke huhrumun bi kandɔk a woiri guri-ay pi. 4Ziɓri ké ko Zezu ɓa mahful ra, mi faŋ bol woyri ɓay si ziŋ niri ma koseh hul. Mi mgba wo̧rori ke wu̧yri mbih vul mgbal. 5Ŋgernzuk fe puhna ke ŋgernzuk ziɓri mah lu lakna ɓay fe laɓna bi-aw. A woyri gaŋ mí ku vbeh mbete pih mi keni ɓay mi hi̧ yi̧n wah ziɓri ké kaɓ Damas. Mí-i si ri, ɓay gelke mi ziŋ ziɓri ké ƴo dih fal Zezu ké ri le, mí mgba niri gi keni Zurusalem ɓay kú kuŋ salɓay ku̧ tul woyri.
6Mi ƴo tul ful. Mi toŋ ɗih ya ɓay ka̧h Damas. Seh ƴo tul puh bale, gel tehna ti̧h ké nunmbam kandɔk sakna mbam teh gel gberere ɗoŋ mi gbuk. 7Mi lih ɓu siɓa, mi lah kusol nzuk ɗi mi ke riŋ mbuŋna bi ɓahri : “Sɔl, Sɔl ma. Ɓay fe mú-u faŋ bol bi ƴo laɓ mi koseh kari-ay le ?”
8Mí-i vbi ɓahri : “Mbay, i ɓa ge le ?”
Ke yih nzak bi ɓahri : “A bi, Zezu nzuk Nasareɗ ké mu faŋ bol bi ƴo laɓ mi koseh ra munu.”
9Bɔh gahru biri ko gel tehna ko. Mí ɓay ké-e ƴo ɓah ziŋ mi ra, ku lah ya. 10Bale mi vbi ni ɓahri : “Gaŋ bi, a fe mí-i laɓu le ?”
Ke yih nzak bi ɓahri : “Mú ur síɓa. Mú si Damas.” Ku ɓay sɔk mi feri gbam ké ƴo geŋ mi ɓay mí laɓ. 11Gel tehna ra ra̧h nun bi, mí bɔh gahru biri ba, mgba ndɔk bi, ku maŋ mi si ka̧h Damas.
12Ziɓ a hani ƴo ri. Riŋ ye ɓa Ananiya. Ke ƴo dim Ŋgerzah, ke ƴo tul bolkusol Ŋgerzah ɓa suki. Ziɓri gbam ké kaɓ Damas lu lakna ɓay ye lu. 13Mí ke gi ƴo ɓel bi, ke ɓah hi̧ mi ɓahri : “Yi̧n bi Sɔl, nun wo ɓá mgbur.”
Sa gelaw mí, nun bi mgbur. Mi ko gel. 14-15Ananiya el ɓah hi̧ mi ɓahri se, Ŋgerzah zih wahri lu mi, a bi Sɔl, lewsa̧ ɓay mí tu kerɓay ye, ɓay mí ko Ŋgermbay Nzuk Lawpuki ɓay mí lah nzak ye. Ɓay fe le mi ná ɓa nzuk-ɓah tehɓay feri ké mi ko ke ɓayri ké mi lah gbam ké pol nzukri riw. 16Ananiya el ɓah hi̧ mi ɓahri : “Mí aŋay ba, a fe mú-u geŋ ɓáy le ? Ur síɓa, mú ti̧h mbih batem ke riŋ Ŋgermbay ɓahri, Zezu ɓa Ŋgermbay wo. Mú hi̧ ni ké lu salɓay ké tul wo.”
17Falu, mi el gi Zurusalem. Mi ƴo goŋ Ŋgerzah ɓil ila vul kani, mí Tempuki rih tul bi hi̧ mi, mi ko fe saŋ. 18Mi ko Ŋgermbay. Ke ɓah ɓay hi̧ mi kandɔkay : “Sɔl, mú tɔr ɓa gah-u ké Zurusalemay, mú geŋ ya ɓay fe le, nzuk puh-uri ta ya̧ lakna ɓay bi ké mu lu ra ya.”
19Mi yih nzak ye ɓahri : “Gaŋ bi, nzuk puh-ayri tu te-teh. A bi ra, mi si vul misoŋ ziɓri ɓoɗ ɓoɗ. Mi vba̧ nzuk a a̧yri ké kan law sa tul wo, mi mgba niri kara si mbih vul mgbal pi. 20Nam ké ku i Eten nzuk-ɓah tehɓay wo ra, mi ƴo gelu pi. Hul Eten rih law bi. Nzukri ké vbuk ni ke kasaw i ni, mi kɔr mah gar woyri.”
21Ŋgermbay el ɓah hi̧ mi ra ɓáy ɓahri se : “Mú si ɓay fe le, mi píh mu ɓa ɗih-u ma ta̧w sa̧wnzuk a ɓoruri.” »
22Pɔl ɓah ɓay sa̧wnzuk a ɓoruri dale, ziɓri vba̧ nzak gbaw ɓahri : « Sam nzuk a kandɔkaw mah kaɓ tukala ya. Ɓá i ni i. »
23-24Ŋgernzuk kumandah ko ku ƴo vba̧ nzak gbaw gbaw, ku vbuk mah gar woyri, ku ɔr kasal, mí ke hi̧ sozeri rih ziŋ Pɔl ma gel kaɓna woyri. Ke sɔk kú vba̧ ni ke ndehdɔŋ fakla sa̧wɓay vba̧ nzak nzukri ké tul ye-aw. 25Ku ŋga̧h ni kparaŋ kparaŋ ɓay vba̧ ni, mí Pɔl ɓah hi̧ kumandah ké ƴo gelu-aw ɓahri : « Gun puh lakna Rɔm a a̧y kú-u kuŋ salɓay tul ye ya ɓáy ra wa, bolkusol Rɔmri hi̧ ful vba̧ ni mgbum le ? »
26Ke lah ɓayaw kaŋ bale, ke si ta̧w ŋgernzuk woyri. Ke vbi ni ɓahri : « Ŋgernzuk, i tu fe ké i yih laɓu-ay gaŋ le ? Nzukaw ɓa gun puh lakna Rɔm. » 27Ŋgernzuk kumandah ra lah ɓayu kaŋ bale, ke si ta̧w Pɔl. Ke vbi ni ɓahri se : « Mú sɔk mi, mu ɓa gun puh lakna Rɔm ley ? »
Pɔl yih nzak ye ɓahri : « Ketina, mi ɓa gun Rɔm gaŋ. »
28Bale ŋgernzuk ra sɔk ni ɓahri : « A bi ra, mi puh lari ɓa ŋgi̧-u dara mí-i ti̧h ɓa gun tusiɓa Rɔm. »
Mí Pɔl yih nzak ye ɓahri : « A bi le, ku mbuŋ mi ɓa gun tusiɓa Rɔm gaŋ. »
29Bale sozeri ké lek mun woyri ɓay vba̧ ni ra el ke mun ma fal fal ké ta̧w ye. Ŋgernzuk kumandah tu ɓahri, Pɔl ɓa gun tusiɓa Rɔm ké-e hi̧ ku ŋga̧h ni-aw bale, hȩkme laɓ ni.
Pɔl ké haŋsekle ŋgernzuk ziɓri
30Ŋgernzuk kumandah yih ɓay tu tehɓay gohna ké ziɓri goh Pɔl. Tipele, ke ɗi ŋgernzuk fe puhna ke nzuk-kuŋ salɓayri gbam gi mbu̧h hani. Ke hi̧ sozeri sel Pɔl maŋ ni ɗer gi ƴo pol woyri.
ទើបបានជ្រើសរើសហើយ៖
Mbete Fe laɓna Tempuki 22: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
