Mbete Fe laɓna Tempuki 15
15
Baw maŋna ké Zurusalem
1Ziɓ a haniri ké kan law tul Ŋgermbay, ku ur ke Zude ké ɓa tusiɓa sa̧w misoŋ gi Antiyos. Ku ƴo sɔk sa̧wnzuk a ɓoruri ké ɓa nzuk yi̧n ɓil Ŋgermbayri ɓahri : « I kuŋ ndi̧w kandɔk bolkusol ké Ŋgerzah hi̧ Moyiz vbeh ra ya le, i ta ƴo ke gun puh lakna Ŋgermbayri ya. »
2Dale fahɓay a bawu ur ké haŋsekle ziɓ a gi-uri ziŋ Pɔl ke Barnabas. Pɔl ke Barnabas ri̧h si̧w tul ɓay woyri, ziɓ a gi-uri ba, ri̧h si̧w tul ɓay woyri. Mí sa̧w nzuk Ŋgermbayri ké Antiyos ɓahri, kaŋ dale, Pɔl ke Barnabas ke sa̧w nzuk Ŋgermbay a ɓoruri ɓá si Zurusalem te-teh ɓayay ziŋ gun nzak pihna Ŋgermbayri ke ŋgernzuk vul misoŋri. 3Kaŋ mí ku so niri el pih niri. Ku mbi mahful, ku kal tusiɓa Fonizi ke tusiɓa Samari. Sina woyri-aw, ku ndazi ɓayri ke mahfulu mahfulu hi̧ nzuk yi̧n ɓil Ŋgermbayri ɓahri, sa̧wnzuk a ɓoruri mbi law woyri ké tul záh woyri ma fal el kan law tul Ŋgermbay. Ku lah ɓayaw le, law woyri rih niri keɗ keɗ. 4Pɔlri ka̧h Zurusalem, mí gun nzak pihna Ŋgermbayri ke ŋgernzuk vul misoŋri ke sa̧w nzuk Ŋgermbay a ɓoruri ya̧ niri ɓa suki. A woyri-aw, ku ndazi ɓay feri ké Ŋgerzah hi̧ niri ku laɓ, mí nzukri lah. 5Mí farizi a haniri ké kan law tul Ŋgermbay ba, ur ɓer ɓay ɓahri, sa̧wnzuk a ɓoruri ké kan law tul Ŋgermbay ɓá kuŋ ndi̧w, kú dih bolkusol a ɓoruri gbam ké Ŋgerzah hi̧ Moyiz vbeh ra pi. 6Wara mí gun nzak pihna Ŋgermbayri ke ŋgernzuk vul misoŋri ɗi maŋna ɓay fakla ɓayu.
7Ku fakla kpu̧ru kpu̧ru bale, Piyer ur, mí ke ɓahri : « Yi̧n biri ɓil Ŋgermbay, i tu wuri fe ké kal lewsa̧ ké haŋsekle wah tu-tu#15.7 Í ki̧ Mbete Fe laɓna Tempuki 10.1-18 ɓay tu fe ké kal lewsa̧ sew ké-e si puh Kɔrne.. Ŋgerzah pih mi si sɔk ɓaysuki Ŋgermbay hi̧ Kɔrne ké sa̧w ye ɓoɗ lah bale, a ye ke nzuk yeri, ku kan law tulu. 8Ŋgerzah ké tu ɓil law nzuk tu ra, ke lu lakna ɓay woyri, ke pih Tempuki hi̧ niri kandɔk ké-e hi̧ na ra pi, sɔk ɓahri, ku ɓa nzuk yeri. 9Ké sakra wah, ke kehr ziɓri ke sa̧wnzuk a ɓoruri ya. Ku kan law tul Ŋgermbay, mí ke lu ɓay hul buma ké tul woyri keni pi. 10Kaŋaw wa, ɓay fe mí i ƴo fah Ŋgerzah le ? I yih ɓay ɓaŋ bolkusol a yih-u kan tul nzuk-dih fal Ŋgermbayri le wo ? Sukna ra, zih wahri mini a wah gaŋ kara nah mah suku ya. 11Nzukri na ɓa gun puh lakna Ŋgermbay ɓay fe laɓna bolkusol Ŋgerzah ya. A wah kara Ŋgerzah ya̧ na ɓa nzuk yeri ɓay tul lawsuki Ŋgermbay Zezu ké nah kan law tulu kandɔk a woyri kaŋ pi. »
12Fal ɓay Piyer, nzukri gbam kaɓ silili. Barnabas ke Pɔl ba, ndazi ɓay fe saŋri ké Ŋgerzah hi̧ niri ku laɓ ké sakra sa̧wnzuk a ɓoruri. 13Ku ɔk nzak woyri, mí Zak ur, ke ɓahri se : « Yi̧n biri, í lah mi. 14Simu Piyer sɔk na ani mí Ŋgerzah ko kona tul sa̧wnzuk a ɓoruri ke titilu kaŋ, ɓay hi̧ nzuk a haniri ké sakra sa̧wnzuk a ɓoruri-aw ɓá na ɓa sa̧wnzuk ye. 15Ɓayay si mah hani ke ɓay ɓahna gun nzak pihna Ŋgerzah a lewsa̧ri. Ku vbeh ɓayu na ɓil mbete Ŋgerzah kandɔkay : 16-17Bol fal gbakra hani gun puh lakna ŋgermbay Daviɗri ra, Ŋgerzah ɓahri se, a ye, ke él gi. A ye, ke mbóh vul Daviɗ mbay a luki#15.16-17 Vul Daviɗ mbay a luki ké gel ki̧na-ay ta ɓa vul a mbo-mboh ya. Vulu ɓa gamɓay ɓah ɓay seɗe. Ɓay a mbewu, vulu ɓa puh lakna Daviɗ mbay a luki. Í ki̧ Mbete Matiye 1.1-17 ɓay tu ɓahri, Ŋgerzah pih nzuk Babiloŋri gi gbakra gun puh lakna Izarayelri mgba niri si puh mgbal. Bol falu Ŋgerzah hi̧ niri ku el tusiɓa woyri, mí pih Gun ye Zezu ɓa Ŋgermbay. Sa̧w Zezu a fál nzuk pirmatulri ɓa Daviɗ mbay a luki. Ɓay a seɗe-u. Vulu ɓa vul fe puhna Ŋgerzah ké na Zurusalem ke sewu-aw. Nzuk Babiloŋri gi haw. Ke gina Ŋgermbay Zezu, vulu el mboh ɓa foyu ɓáy. Í ki̧ Mbete Efezeri 2.19-22 ɓay tu ɓay vul kani Ŋgerzah-u. Ɓay vul ɓah ɓay a ɓoruri pi, kandɔk Zezu ɗi mun ye ɓa vul. Í ki̧ Mbete Za̧h 2.19 ɓay tu ɓayu. ké haw wuruk wurukaw ɓay hí̧ puh lakna ye el, ke ƴó gel ƴona ye a pol ɓay hi̧ tɔr nzukri ké toŋ ɓá ƴah ni ye, ɓay hi̧ sa̧wnzuk a ɓoruri gbam ké-e ɗi niri ɓa nzuk yeri, kú ƴah ni ye. Miƴori ɓah kaŋ, a ye ke laɓu. 18Ke ten sa̧w fe a lewsa̧ri. »
19Dale Zak kuŋ salɓay ra ɓahri : « Sa̧wnzuk a ɓoruri ké el gi ta̧w Ŋgerzah ra, su-su le, náh zukru kerɓay woyri ya. 20Su-su ɓay náh vbeh mbete hi̧ niri ɓay kú ɗih ke fe ké ɓay sih law nzuk ɗi-ɗih. Kú dim záh ya, kú laɓ nunpuki ya, hay a a̧y kú-u vbeh ya ra kú su̧ ya, kú su̧ sem ya pi#15.20 Í ki̧ Mbete Sa̧w fe 9.4,5 ke Mbete Lévitique 17.10-12 ɓay tu ɓahri, ɔkna feri na ɓil semu ɓa nzuku a Ŋgerzah. Nzuk ké su̧ sem ɓay ziŋ keni ŋgerna tem, mah hani ke dim záh.. 21Ɓayu ké bolkusol Ŋgerzah ké Moyiz vbeh ra, ku sɔk ɓayuri ke puhri gbam lewsa̧ kaŋ. Ku ƴo ki̧-u ké ɓil vul misoŋ woyri ke nam ɔknari riw. »
22Bale gun nzak pihna Ŋgermbayri, ŋgernzuk vul misoŋri ke sa̧w nzuk Ŋgermbay a ɓoruri gbam ku ko su-su ɓay lu nzukri ké sakra woyri ɓay pih niri si Antiyos ziŋ Pɔl ke Barnabas. Ku lu Silas ke Zuda ké riŋ ye a ɓoru ɓa Barsabaɗ. Seɗe mbɔk woyri, nzuk yi̧n ɓil Ŋgermbayri lu lakna ɓay woyri lu. 23Ku vbeh mbete kandɔkay pih niri keni :
A wah gun nzak pihnari ke ŋgernzuk vul misoŋri ké Zurusalem, nah vah wuri a woiri sa̧wnzuk a ɓoruri ké i ɓa yi̧n wah ɓil Ŋgermbay, ké i kaɓ Antiyos, tusiɓa Siri ke tusiɓa Silisi.
24Nah lah ɓahri se, nzuk a haniri ké sakra wah-ay ur si zɔklɔ wuri. Ku zukru kerɓay woiri ke ɓay ɓahna woyri, mí ɓay hi̧ nzukri ké kan law tul Ŋgermbay ɓá kuŋ ndi̧w ra le, ɓayaw ur ké ta̧w wah ya. 25-26Kaŋ mí nah mbu̧h nzak mbew, nah ko su-su mí nah lu Silas ke Zuda. Nah pih niri si ta̧w woiri, mí ku ɓaŋ maŋlaw wahri Barnabas ke Pɔl kú-u poŋ mun woyri lewsa̧ hi̧ hul ɓay tul Gaŋ wah Ŋgermbay Zezu.
27Nah pih Zuda ke Silas. Ku ka̧h le, ku ndázi ɓayri ké nah vbeh-ay ra hi̧ wuri í lah. 28Nah pih niri ɓayu ké ɓayri ké na ɓil mbete-ay rih law Tempuki, rih law wah pi. Nah pih ɓay hi̧ bolkusol-kuŋ ndi̧w ke bolkusol a ɓoruri ké Ŋgerzah hi̧ Moyiz vbeh ra ɓá na ɓa sukna a yih-u ké tul woiri ya. Wara le, ɓa ɓayri-ay mí nah pih hi̧ wuri : 29Í ɗih wuri ɗih ke fe su̧na kú-u puh hi̧ záhri. Í su̧ sem ya. Hay a a̧y ké vbeh ya kara, í su̧ ya. Í laɓ nunpuki ya. I saŋ feri-ay le, ɓa fe suki mí i laɓaw.
A wah yi̧n woiri ɓil Ŋgermbay, nah vah wuri.
30Silasri ur ké Zurusalem tɔr. Ku si ka̧h Antiyos. Ku mbu̧h sa̧w nzuk Ŋgermbayri, mí ku ndar mbete ra ndoh ndɔk woyri. 31Ku ki̧ bale, law nzukri rih niri rih ɓay tul ɓay a suki ké na ɓil mbete-u voh law woyri. 32Silas ke Zuda, ku ɓa gun nzak pihna Ŋgerzah mí Tempuki ɓaŋ ɓay ɓa ŋgi̧-u ndoh nzak woyri, ku ɓah hi̧ nzuk yi̧n ɓil Ŋgermbayri. Ku hew niri mí ku ƴo ke Ŋgermbay ɓa kpuh-u kpatara. 33Ku kaɓ ri nam mah fe, mí nzuk yi̧n ɓil Ŋgermbayri vbar niri ke ɗeŋ hi̧ ku el si ta̧w nzukri ké pih niri. 34#15.34 Ŋgi̧na mbete sa̧w nzak ta ke gel ki̧na-ay ya, sa̧wu mí nzuk-sɔɓ mbete-ay sɔɓ ya.
Ti̧hna Pɔl a bɔk seɗe-u ɓay si ka-kah ɓaysuki Ŋgermbay
35Pɔl ke Barnabas kaɓ Antiyos. A woyri ke daɓa nzuk-dih fal Ŋgermbay a ɓoruri, ku sɔk ɓay lak mbay Ŋgermbay Gaŋ tul feri riw, ku ka-kah ɓayu hi̧ nzukri lah. 36Laɓ nam mah fe dara mí Pɔl ɓah hi̧ Barnabas ɓahri : « Náh el si ko yi̧n wah ɓil Ŋgermbayri ké puhri gbam ké nah ka-kah ɓay lak mbay Gaŋ tul feri riw ké ri ɓay ko ani mí yi̧n wah ɓil Ŋgermbayri ƴo tul ɓay ké ku lah ra le. »
37Barnabas yih ɓay maŋ Za̧h-Marki si ziŋ niri. 38Mí Pɔl ko ni ke mah ɓay si ziŋ niri ya, a ye ke poŋ niri ké Pamfili, ke laɓ pihna ziŋ niri mba. 39Fahɓay ur ké sakra woyri hi̧ ku kehr hani. Barnabas mbi Za̧h-Marki. Ku puh gel kaɓna ɓil kumbon tɔr si Siper. 40Pɔl ba, lu Silas. Nzuk yi̧n ɓil Ŋgermbayri poŋ niri ku̧ ɓil ndɔk Gaŋ tul feri riw ke lawsuki ye dara mí ku tɔr ɓáy. 41Pɔl si tusiɓa Siri ke tusiɓa Silisi ƴo hi̧ sa̧w nzuk Ŋgermbayri ŋgerna kú ƴo ke Ŋgermbay ɓa kpuh-u.
ទើបបានជ្រើសរើសហើយ៖
Mbete Fe laɓna Tempuki 15: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
