Mbete Fe laɓna Tempuki 13
13
1Ké sakra sa̧w nzuk Ŋgermbayri ké Antiyos, gun nzak pihna Ŋgerzahri ƴo ri, nzukri ké firma nzukri ɓay Ŋgerzah ƴo ri pi. Ké sakra woyri-aw, riŋ nzuk a haniri mí na-ay : Barnabas, Simyoŋ nzuk a piru, Lukyus ké tusiɓa Siren, Manahem ké hu̧h mbew ke mbay Eroɗ Antipa ké kerpuh mbew, Sɔl pi. 2Nam a hani, sa̧w nzuk Ŋgermbayri mbu̧h hani ƴo dim Ŋgerzah. Ku saŋ mbih pi. Le Tempuki ɓah hi̧ niri ɓahri, kú lu Barnabas ke Sɔl ku̧ ɓoɗ ɓay laɓ pihna ye ké-e mbi niri ɓayu. 3Sa̧w in Ŋgermbayri ɔh saŋ mbih ke goŋ Ŋgerzah, mí ku ɓaŋ ndɔk ku̧ tul Barnabas ke Sɔl poŋ niri tɔr si laɓ pihna ké Tempuki lu niri ɓayu ra.
Barnabas ke Sɔl ka-kah ɓaysuki ké tusiɓa Siper
4-5Kaŋ mí Tempuki pih Barnabas ke Sɔl. Ku si Selusi. Ku puh gel kaɓna ɓil kumbon mí si ka̧h Salamin ké tusiɓa Siper. Ku mbi ɓay ké vul misoŋ ziɓri ɓoɗ ɓoɗ sɔk ɓay Ŋgerzah ɓahri, Zezu ɓa Ŋgermbay. Za̧h-Marki kara si ziŋ niri ƴo so niri#13.4-5 Í ki̧ Mbete Fe laɓna Tempuki 12.12,25 ɓay tu ɓay Za̧h-Marki.. 6-8Ku ha̧rma tusiɓa Siper ur ke Salamin kpu̧ru ka̧h Pafos. Ke gelaw mí ku ziŋ ziɓ a hani, riŋ ye ɓa Bar-Zezu. A ye-aw, ke ƴo ɗi mun ye ɓa gun nzak pihna Ŋgerzah, mí ɓa kuŋɓay kaŋto. Ke ɓa nzuk sa̧wkpuh. Riŋ ye ke nzak a ɓoru ɓa Elemasi. Ke ƴo sakra nzukri ké ƴo ɓel guvener Siper. Riŋ guvener ra ɓa Serze Pɔl. A ye ra, ke ɓa nzuk fe tuna. Ke ɗi Barnabas ke Sɔl gi. Ke yih tu sa̧w nzak pihna ké Ŋgerzah pih niri. A ye Elemasi nzuk sa̧wkpuh ra ba, ke ƴo mbi ɓay a ɓoru zukru ɓay ɓahna woyri ɓay hi̧ guvener ɓá reh mahful rɔkɔ ké kan law tul Ŋgermbay. 9Sɔl ra riŋ ye a ɓoru ɓa Pɔl. A ye ké Tempuki ya̧ mun ye gbam mí ke ko kona kpo̧h ma nun nzuk sa̧wkpuh ra. 10Mí ke ɓah hi̧ ni ɓahri : « A wo, nzuk nzak rɔkna, nzuk law mgbɔrɔ, gun mbay záh tukala, fe ketinari gbam, mu ɓa nzukbaa-u. Mu ƴo ra̧h mahful sina Gaŋ tul feri riw ma kperu wu̧m ley ? 11Mú lah, aŋay gaŋ mí Gaŋ tul feri riw ɓay vba̧ mu ndɔk mbew. Mu ra̧h-u. Mu ta ko gel mba, nam ɓay mah fe. »
Sa gelaw mí Elemasi ra̧h. Ke ha̧rma ɗoŋ ɓa koro koro ƴah nzuk mgbá ndɔk ye. 12Guvener ko feri ké kal bale, ke kan law ye tul Ŋgermbay Gaŋ tul feri riw. Ɓay Ŋgermbay ké Barnabas ke Pɔl sɔk ra na ni yer ɓa fe saŋ.
Pɔl ke Barnabas ka-kah ɓaysuki ké Antiyos-Pisidi
13Pɔl ke nzukri ké ƴo ziŋ ni, ku puh gel kaɓna ɓil kumbon ké Pafos. Ku tɔr si Perge ké tusiɓa Pamfili#13.13 Í ki̧ Mbete Fe laɓna Tempuki 2.10 ɓay tu ɓay Pamfili.. Za̧h-Marki ba, el ma Zurusalem poŋ niri. 14Mí a woyri-aw, ku ur ke Perge si ka̧h Antiyos ké ɓel tusiɓa Pisidi#13.14 Antiyos a a̧y na ɓoɗ ke Antiyos a tusiɓa Siri ɓil Mbete Fe laɓna Tempuki 11.9. Antiyos a a̧y na tusiɓa Galaɗ. Guri, ku ɗi tusiɓa-aw ɓa Turki.. Nam ɔkna ziɓri, ku gi rih ɓil vul misoŋ woyri, ku kaɓ ri. 15Bol fal ki̧ mbete Ŋgerzah a titiluri kandɔk mbete Moyiz ke mbete vbehna gun nzak pihna Ŋgerzahri, ŋgernzuk vul misoŋri ɓah hi̧ niri ɓahri : « Yi̧n biri, i ƴo ke nzak hewna ɓay ɓah hi̧ na le, í ɓah ge. »
16Bale Pɔl ur síɓa. Ke ɔr ndɔk hi̧ nzukri ɓá te suk, mí ke ɓahri : « Yi̧n bi gun Izarayelri ke sa̧wnzuk a ɓoruri ké i dim Ŋgerzah wah, í lah ɓay bi-ay. 17Lewsa̧ Ŋgerzah lu zih wahri gun Izarayelri ku̧ ɓoɗ ɓa sa̧wnzuk ye. Sew kú-u kaɓ tusiɓa Eziɓte ɓa mgbal, ke hi̧ niri ɔr tul woyri. Ke huhrumun, ke ten niri. 18Ke ik law ye ké tul woyri mah mbihmbam bon niŋ ɓil lawkɔr#13.18 Mahful-sɔɓ sa̧w nzak a ɓoru mí na-ay : Ke hɔl niri mbihmbam bon niŋ ɓil lawkɔr.. 19Ke maŋ niri si ka̧h tusiɓa Kana. Ke hi̧ nzuk yeri haw ŋgermu nah puh lakna sa̧wnzuk a ɓoruri ké toŋndɔk sayaw#13.19 Í ki̧ Mbete Exode 3.8 ke Mbete Deutéronome 7.1 ɓay tu ɓay sa̧wnzuk a ɓoruri ké toŋndɔk sayaw.. Ku duh niri. Ke el hi̧ niri tusiɓa-aw ra ɓa nzuku a woyri#13.19 Í ki̧ Mbete Josué ɓay tu ani mí ku nah tusiɓa Kana ɓa fe woyri.. 20Kú-u ya̧ tusiɓa-aw laɓ mbihmbam sɔɗ sɔɗ niŋ ke bon ndiɓi (450), ke lu ŋgernzukri ké nda pol woyri kpu̧ru ka̧h ŋgernzuk a ɔh tɔru ké ɓa Samuyel gun nzak pihna Ŋgerzah#13.20 Í ki̧ Mbete Judges ɓay tu ɓayu.. 21Ku vbi Samuyel, ké mbi mbay hi̧ niri#13.21 Í ki̧ Mbete 1 Samuel 10. 21-24 ɓay tu ɓayu.. Mí Ŋgerzah pih Samuyel mbi Sawul gun Kisi ké mi̧hri Bezameh hi̧ niri. Ke lak mbay mbihmbam bon niŋ. 22Mí Ŋgerzah poŋ Sawul el mbi Daviɗ hi̧ ke lak mbay tul woyri#13.22 Í ki̧ Mbete 1 Samuel 15.24 si ka̧h 16.1 ɓay tu ɓayu.. Ke lu lakna ɓay Daviɗ mbay a luki ɓahri se : Mi ko Daviɗ gun Zeseh rih law bi mbamba. Ke láɓ feri ké mi yih riw. 23Kandɔk ké Ŋgerzah wahɓayu lewsa̧ ziŋ Daviɗ ɓahri, ke mi̧hri Daviɗ, ke ɓay ten nzuk-ya̧ nzukri, nzuku mí ɓa Zezu#13.23 Í ki̧ Mbete 2 Samuel 7.12-16 ɓay tu ɓay wahɓayu..
24Za̧h lek ful gina Zezu. Ke ka-kah hi̧ gun Izarayelri gbam ɓay kú ti̧h mbih batem a mbilaw. Kú mbi law ké tul fe laɓna suya woyri ma fal el gi ta̧w Mbay woyri. 25Za̧h ƴo ɔh pihna ye, mí ke toŋ ɓah hi̧ nzukri ɓahri, a ye, ke ta ɓa Ŋgermbay kú-u ƴo geŋu ra ya. Wara le Ŋgermbay ƴo gina ké fal ye. Ɗíŋ tul ɓay sel sal sabɔk Ŋgermbay kara ke mah ya. 26A woiri yi̧n bi gun zih Abarahamri ke sa̧wnzuk a ɓoruri ké i ƴo dim Ŋgerzah ziŋ na, mi sɔk wuri ɓahri se, ké ta̧w wah ziɓri mí Ŋgerzah pih Ŋgermbay gi ɓay ten nzukri ké puh lakna a tukala-ay. 27Yi̧n wahri ke ŋgernzuk wahri ké Zurusalem ki̧ ɓayu ɓil fe vbehna gun nzak pihna Ŋgerzah a lewsa̧ri ke nam ɔknari gbam, mí ɓayu guh law woyri ya dih. Le ku kuŋ salɓay hul ké tul ye Ŋgermbay. Hul ye laɓ kandɔk ké Ŋgerzah ɓah lewsa̧. 28Ɓay a hani ké mah laɓ ɓay hul mbew kan tul ye ta-a pi, mí ku goŋ Pilaɗ ɓá i ni. 29Ku laɓ fe ké mbete Ŋgerzah sɔk si tul ye ɔh. Nazi hul nzukri ta ni ké tul kpuh#13.29 Í mgba Mbete Galaɗri 3.13 ke Mbete Deutéronome 21.23 tuh ke gel ki̧na-ay., ku ɗer hul ye si kan ni ɓil lɔkɔ. 30Mí Ŋgerzah ten ni ké sakra záhri ke pa̧ymun a foyu.
31Ke sɔk mun ye nam ŋgi̧-ŋgi̧ hi̧ nzukri ké ƴo ziŋ ni ke titil pihna ye ur ke Galile ka̧h Zurusalem. Ku ɓah tehɓay ti̧hna ye hi̧ na gun Izarayelri. 32Mí nah gi sɔk wuri ɓay a suki-ay ɓahri se, fe ké Ŋgerzah wahɓay laɓu hi̧ zih wahri ra, laɓ da. 33Ke laɓ fe-u ke gelu gelu ɔh hi̧ na gun zih Abarahamri. Ɓay fe le ke sɔk Zezu hi̧ na ɓa Ŋgermbay, gun Ŋgerzah. Ɓayu na ɓil Mbete Siŋ Ŋgermbay mah-u seɗe ɓahri se : A wo mu ɓa gun bi. Ur ke guri-ay, mu ɓa mi̧hri bi#13.33 Í mgba gel ki̧na-ay ke Mbete Luk 3.22 ɓay tu sa̧w ɓay ɓahna Ŋgerzah ké nam batem Zezu.. 34Ŋgerzah hi̧ ni ti̧h ke puh záh ke pa̧ymun a foyu, ke ta hu mba wu̧m kandɔk ké-e wahɓayay ziŋ Daviɗ mbay a luki ɓahri se : Mi ƴo tul wahɓay bi ké mi ŋga̧h ziŋ Daviɗ ɓay tul woiri, mí wahɓayu ta sɔɓ ya, ɓayu na ɓa ŋgɔh#13.34 Ɓayay na ɓil Mbete Esaïe 55.3. . 35Ɓay ké-e wah ra na gel ki̧na a ɓoru ɓahri, ke ta poŋ gun sana ye puŋ mbuluk mbuluk ké ɓil lɔkɔ hul ya. 36Ke sew ké Daviɗ lak mbay, ke laɓ pihna ké law Ŋgerzah yih, mí ke hu. Záh ye mbu̧h ziŋ záh zih yeri. Haymun ye ba, puŋ ké lɔkɔ. 37Mí nzuk ké Ŋgerzah ten ni ke puh záh ba, ke puŋ ya. Pihna ye ti̧h suk kpatara. 38Kaŋ dale yi̧n biri, su-su ɓay í tu ɓa teh-u : Bolkusol Ŋgerzah sɔk ɓahri se, lu salɓay hul ké tul nzuk ur ké ta̧w Ŋgermbay Zezu mbew yaŋ. Ɓay Ŋgerzah ké-e ŋga̧h ziŋ Moyiz vbeh kan ɓil mbete ta hi̧ nzukri ƴo ke Ŋgerzah ɓa záh woyri dan ɓay ya. 39Ɓa a ye Ŋgermbay Zezu mí ke mah hi̧ nzuk a a̧y ké kan law tul ye ƴo ke Ŋgerzah ɓa záh ye. 40Mí le í ru̧ ke mun woiri rɔkɔ ɓay ké gun nzak pihna Ŋgerzahri vbeh ra ɓá laɓ wuri. 41Ŋgerzah ɓahri :
“A woiri nzuk-sak ɓay biri, í ko.
Í hi̧ fe laɓna bi ké mi laɓ ké nun woiri ɓá na wuri yer.
Pihna ké mi laɓ ra, nzuk lu mberemu hi̧ wuri kara, i yá̧ ɓayu ya. I zi da.” »
42Pɔl ke Barnabas ƴo ti̧h ké vul misoŋ bale, nzukri roh niri ɓay kú el gi ke nam ɔkna a ɓoru ɓay sɔk nzukri ɓayay ra ma pol ɓáy. 43Nzukri gbakra hani bale, ziɓri ke nzuk-dim Ŋgerzahri ké sɔɓ mun woyri ɓa ziɓ ŋgi̧-ŋgi̧ dih fal Pɔl ke Barnabas, mí a woyri-aw ba, ku hew nzukri ɓá ƴo tul suki ké Ŋgerzah laɓ ziŋ niri.
44Nam ɔkna a ɓoru ka̧h, mí ŋgi̧na nzukri ké puh-aw mbu̧h hani mer mer ɓay lah ɓay Ŋgermbay Gaŋ tul feri riw. 45Ziɓri ɓá ko daɓa nzukawri le, sere mbah ɓil law woyri mbamba. Ku ma̧y ɓay ɓahna Pɔl, ku ɓeɓ keni riŋ Ŋgermbay. 46-47Mí Pɔl ke Barnabas ɓah ɓay hi̧ yi̧n woyri ziɓri ɓa teh-u. Ku ɓahri se : « Na ani ani gaŋ kara, su ɓay náh sɔk wuri ɓay Ŋgermbay pol dara sa̧wnzuk a ɓoruri ɓá lah kandɔk ké bolkusol Ŋgerzah Gaŋ tul feri riw ɓah hi̧ na ziɓri ɓahri, ke lu na ɓa gel tehna hi̧ sa̧wnzuk a ɓoruri. Nah hí̧ sa̧wnzuk a ɓoruri ka̧h gbu̧h tusiɓa, ɓay kú ziŋ mahful ti̧h ké ndɔk hul#13.46-47 Í mgba gel ki̧na-ay tuh ke Mbete Esaïe 49.3-6.. I sa na ɓa gel tehna ra ya, mí i to ɓayu ma fal le, i ƴo laɓ ɓay ɓu tul woiri ɓahri, kaɓ ke ɔkna ɓil puh lakna Ŋgermbay ra, i mah ziŋu ya. Kandɔkaw le, nah sɔ́ɓ nun wah ma ta̧w sa̧wnzuk a ɓoruri wara. »
48Sa̧wnzuk a ɓoruri lah ɓayay le, ku laɓ mun rihna. Ku pir ɓay Gaŋ tul feri riw, mí ku kan law tul ye, a ge ge ké riŋ ye na ke riŋ gun puh lakna Ŋgermbayri. 49Ɓay Gaŋ tul feri riw ya̧ gelri gbam ké tusiɓa Antiyos-Pisidi. 50Mí ziɓri ra laɓ hi̧ law wu̧y riŋ ɗinari ké ƴo dim Ŋgerzah ziŋ niri ke law ŋgernzuk puhri fa̧h tul Pɔl ke Barnabas, mí ku mbu̧h haniri laɓ niri koseh. Ku ni̧h niri ke tusiɓa woyri. 51Pɔl ke Barnabas kpoh kasal bɔk woyri ɓahri, ku ta sakra woyri ya. Mí ku tɔr si puh a hani. Riŋ puh-u ɓa Yikoniyam. 52Nzuk-dih fal Ŋgermbayri ba, law rihna Tempuki mbah law woyri.
ទើបបានជ្រើសរើសហើយ៖
Mbete Fe laɓna Tempuki 13: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
