Mbete 2 Piyer 3
3
1Gun sanari, mbete a seɗe-u mí-i vbeh hi̧ wuri-ay. Kerɓay a teh-u ké ƴo law woiri da-ay mi ƴo ndukru hɔrɔ-u ke mbete-uri. 2Mbeteri ké mi vbeh ra ɓay dum law woiri tul ɓayri ké gun nzak pihna Ŋgerzah a ketinari ɓah lewsa̧ ke ɓay Gaŋ tul feri riw nzuk-ya̧ na a ye ké-e pih gun nzak pihna yeri keni. 3Tul ɓayay i tu-tu : ké ɓil nam a ɔh tɔruri ra nzuk-sa-saknari ɓay ti̧h-u. Sakna woyri si mbew ke law woyri kú-u dih fal ɗaka feri ké haymun woyri tasa̧yu. 4Ku ɓahri : « Wahɓay gina ye ra wa ɓay na ani munu le ? Ziihri poŋ tukala lewsa̧, mí fe hani sɔɓ ya. Gel na kandɔk a titilu ke sew-laɓ nunmbam ke tusiɓa. » 5Mí a bi Piyer ba, mi ɓahri, ku hi̧ ɓayay guh law woyri ya ɓa sa̧na. Ŋgerzah ɓah ɓay mí hi̧ tusiɓa ti̧h ke ɓil mbih ɓa gel a hɔku, ke kehr mbih a fál síɓa ɓa nunmbam. 6Ke ɓay ye pi mí lewsa̧ ke hi̧ tukala a sewaw zi ké ɓil mahmbih. 7Ɓay ye kara ƴo mbek nunmbam ke tusiɓa a seway ɓay zi ɓil hɔrɔ. Ke ƴo kɔru geŋ nam ké-e kehr nzukri gel seɗe : nzuk yeri ke nzukri ké ndoh mun woyri ɓil suya ɓa zina woyri ba. 8Dale ɓayay ɓá zi ké law woiri ya, gun sanari, ké ta̧w Gaŋ tul feri riw ra nam mbew mah ke sew sɔɗ sɔɗ boh (1.000), mí sew sɔɗ sɔɗ boh ba, mah ke nam mbew#3.8 Ɓayay na ɓil Mbete Siŋ (Psaumes) 90.4.. 9Wahɓay ké Gaŋ tul feri riw wah ra, ke i̧h sal sal ya. Nzuk a haniri ko ɓahri, ke i̧h mbamba mí ke ƴo ik law ɓay tul woiri, ke sa hi̧ nzuk mbew ɓá zi ya wara le, ke yih ɓay nzukri gbam ɓá mbi law woyri ké tul suya woyri ma fal el gi ta̧w ye.
10Mí nam Gaŋ tul feri riw ra, Gaŋ tul feri riw ɓay ti̧h-u kandɔk nzuk riɓa. Namaw ra nunmbam ɓay mgbe gbururu kal keni, sa̧w fe tukalari ɓay se hɔrɔ bilam bilam el zikri. Le tusiɓa ke feri gbam ké ƴo ɓilu, ketina woyri ɓay ti̧h-u ke seh nam-kehr nzukri-aw ra. 11Kandɔkaw feri gbam ɓay zi-zikri, kaŋaw mí mah ɓay í na ɓa nzuk pirmatul ké si siŋ sina mah nun Ŋgerzah, ké si mbew ke Ŋgerzah. 12I ƴo taw gina nam Ŋgerzah mí ke siŋ sina-aw i ƴo takra hi̧ namu ɓá gi gah. Namu-aw nunmbam ɓay lu hɔrɔ el zikri, sa̧w fe tukalari ɓay sa̧h mbem ke zaŋna hɔrɔ-aw. 13Dale nah ƴo geŋ nunmbam a foyu ke tusiɓa a foyu kandɔk ké Ŋgerzah wahɓayu, ɓa gel ké ketina Ŋgerzah ƴo te-teh ɓay sal in ye. 14Sa̧wu mí gun sanari ké i ƴo geŋ namu-aw le, í ta mun woiri ɓay hi̧ Ŋgerzah ɓá tu wuri ɓa nzukri ké ndɔh mah nun ye ɓa suki le, ké tu wuri ke ɗeŋ. 15Mí í ko ɓahri, ík law Gaŋ wah sal sal ra ɓa fe ké hi̧ wuri i ti̧h ke ndɔk hul. A ye maŋlaw wahri Pɔl kara ke vbeh wahɓay Ŋgerzah-aw hi̧ wuri ke ru̧na ké Ŋgerzah hi̧ ni pi. 16Kaŋ pi mí ke ƴo vbeh ɓayawri ɓil mbete yeri gbam. Gel fe vbehna a haniri, lah-u se-se, mí nzukri ké tih ke láh ɓay Ŋgerzah ya mini nzukri ké kanlaw woyri te-tehre, ku ƴo piŋna ɓayuri kandɔk kú-u ƴo laɓu ke fe vbehna mbete Ŋgerzah a ɓoruri mí si ziŋ niri ma zina. 17Kaŋ dale a woiri gun sanari, kandɔk ké i lah ɓayri-ay pol la-lah ra, í kɔr tul woiri rɔkɔ í mgba bɔh sina ziŋ nzuk-poŋ ɓay Ŋgerzahri-aw, rɔkɔ í poŋ ɓayri ké ƴo hi̧ wuri ɓer gi̧w. 18Wara le lawsuki Gaŋ wah ke tuna ké i tu ni a ye nzuk-ya̧ na Ŋgermbay Zezu, í ŋger ké ɓilu. Riŋ ɗina ɓa nzuku a ye sew a aŋay ka̧h nam a a̧y ké ɓay na ɓa ŋgɔh. Gelu munu.
ទើបបានជ្រើសរើសហើយ៖
Mbete 2 Piyer 3: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.