Mark 15
15
Pilate Zülo Jisü Sawu
1Inaqhe itheno achinetomiqo gholo kichimi, ayeza kükütsümi eno Jewmi hoho lo akemiqo kümtsü küqha no aküküpütsa shie. Tisheno panongu no Jisü tshü pesü wu no Pilate lau phesüve tsü.
2Pilate no iniju, “No ye Jewmiqo kükau keshea?”
Jisü no khochile, “Nono ti pivae.”
3Achinetomiqo no kütau kutomo pesü pa ngukue. 4Ikehu Pilate no itaghi pa vilo iniju, “No ye khochileni chemo keshea? Panongu ye thime khijehimu pesü O nguku ani keno julo.”
5Tishimu Jisü ye kiumu khochilemo, ikehu Pilate ye ighono akümzave.
6Ike tiqhitini ghuloki lo alhoaye lono#15:6 Hechekulu ghulhu tiqhitini piani timiqo no qhüiniju keu kiqi lono akughumi dolo lakhi kuqhopheve tsüche. 7Timi lakhi Barabbas ipikeu ye yepeka hebide ipeghi akemiqo eno timi heqhipithíve kemiqo gholo akughuki lo süpüae. 8Aqokitikhi no Pilate lau ighino pa no thosülo shiche ketoi, panongu ghenguno shitsü penike khue.
9Ikelo Pilate no iniju, “Nongu ye I pelo Jewmiqo kükau nongu lau kuqhopheve tsüpe nishi ani keshea?” 10Pa ye achinetomiqo no panonguw lüthü lá ghenguno Jisü pesü pa u lo phesü püakeu ithi ake. 11Ikemu achinetomiqo no Pilate pelo Barabbas khaqhiphe tsü penike aqokitikhi xukuthove.
12Ikelo Pilate no iniju, “Imaye nongu no Jewmi kükau ipi ku chekeu pesü I vilo kiu shivelo pi kea?”
13Panongu no ighamuku pi, “Pa yedavelo!”
14Pilate no iniju, “Kushiye kea? Pa ye ayeza heküxá kümlà kiu shipüani kea?”
Ikemu panongu no alau shi, “Pa yedavelo!” ipi igha kithe auve.
15Aqokitikhi lopiqive tsü niye Pilate no Barabbas khaqhiphe pe panoqo tsüve. Tisheno, Jisü ye akighikipili pesü heqhi no yeda pìthíve penike ikhiphe pe tsüve.
Ghüshimiqo no Jisü Junuqhi
16Ghüshimiqo no Jisü sasü akükaki lo ilove (hiye angh no ngo chekeu ki ke) eno ghüshimi mqo kümtsü kukütsüluve. 17Panongu no hughai keu chijeboboi-phi pesü pa pu-u, tisheno asahu ghoküna pe akütsükuqho mülà no pa pipe. 18Eno panongu no ighamuku ishi pithuve, “Jewmiqo kükau sheqhelo!” 19Panongu no aqhe-küsǘ pesü pa kütsü lo ide-ide hepuku tsü eno pa shou müsüte puku. Eno iqi qhoqhünhe no agigihu pa tsüke ghili shie. 20Eno kughou pa junuqhi tave keno, panongu no hughai keu chijeboboi-phi xave tsü püzü paw tiphimini pesü pa pu-uve. Tisheno pa yedave nike sasü wuve.
Jisü Yedave keu
21Cyrenemi lakhi, Alexander ngò Rufus pama papù, Simon ye tipa qha hokümxa lono ighino tipau hechesü wuche, ikelo ghüshimiqo no anguka lono pa pelo kros xapu pe. 22Panoqo no Jisü sasü Golgotha (tipau kiqi ye “akütsü boghe-a”) ipikeu-a lo ighi. 23Tisheno panongu no aji pesü müsüghüta lo kiteve keu pe Jisü tsü, ikemu pa no tipau ye tsümoe. 24Eno panongu no pa yedave. Tisheno panongu no Jisü’w tiphimini kijé no khiu no kiu ithulu kepu keno asaqhibejue.
25Panongu no Jisü yeda kelo inaqhe ayì tokú he ake. 26Jisü shou akipimí tsü keu yepìthi tsa hitoi yèpeqhie:
Jewmiqo Kükau.
27Panongu no hekibidemi kini pa gholo yeda pe qhie, tiye lakhi no pa u ajeu eno lakhi no pa u piyiu. 28Eno Kuchoyesü lo ishi pipüa keu shikupuve, “Pa ye ayeza heküxami gholo kihisüve.”#15:28 Kaku hami lo ye Lk 22:37 lo akeu toi keu süpüani 29Tipau vechesü wukemiqo no Jisü thaigha keu tsa pa shou pipuku eno panongu kütsü küngü ghi ishi pi, “No ye achineki kuboleve no atsala küthü lono shiqhepukuve niye kutò anike kumo? 30Kros lono iqighive no O likhi O xalulo!” 31Titoi achinetomi eno ayeza kükütsümiqo no panongu dolo no pa junuqhi. Eno ishi pi, “Pa ye kütami xalu kemu pa likhi pa xalu amoe! 32Israel kükau Messiah hipau pelo kros lono iqighive pelo, tishianguno ningu no ithulu püzü pülü nike.” Pa gholo yedapüa keu pama ghí pa pipütha.
Jisü Kithí
33Puchomta lono avelau ayì küthü kutólo àküzǘ no ayeghiqha kümtsü küzüpholuve. 34Ikelo avelau ayì küthü kihe lo Jisü no asütsa kuloghi lono igha no pi, “Eloi, Eloi, lema sabachthani?” (hipau kiqi ye, “I Lhou, I Lhou, no ye kushiye I qhivea kea?”).#15:34 Leshe 22:1
35Tilehi puthugho akemiqo dolo khami no ti chilu püzü no ishi pi, “Inilo, pa ye Elijah ku anie.”
36Tishi kemtsa panongu dolo milakhi no powu püzü aghüshi lakhi lo akiqhizü pütsüve püzü Jisü pelo müsüye penike aküsǘ lakhi lono jì pesü chhopuku tsüe. Ikemu kütami no pi, “Palokutove aghílo. Elijah no ighi püzü pa xalu nani keo xamla nani keno ningu juni nolo.”
37Jisü no aghügha kuloghi shi igha no pa thuthu süthahuve.
38Tishi kemtsa, achineki lo nhaqhiphi hu no atsǜqo lono abò kutólo ixü kütüta kini shive. 39Eno kughou aqhe shou zatsüu no Jisü zülo puthugho püzü pa no kíshi thive keno ithulu kelo, pa no pi, “Kuchou no timi hipau ye Alhou Nue!”
40Totimi khami ye putou ngo no jukuto ae. Panoqo gholo Mary Magdalene, Joseph thiküzüu ayitiu James eno pama pazá Salome ishi ake. 41Totimi hipaqo ye Jisü no Galilee lo akelo, pa pape eno pa vehupuqo jukuto tsü cheke. Totimi kütami kutomo khunoqo pa gholo no Jerusalem lo iqhoghi keno tipaqo ghí tile ae.
Jisü Qhove keu
42Hiye Kutokughoi keu Tsalà shi ake (tiye Sabbath tsalà zülo). Ike avelau shive kelo 43Arimathea nó ghami Joseph no amlo kumto shi Pilate lau wu püzü Jisü sükumo khue. Joseph ye Mijetsümi mqo lo akhotomi lakhi eno pa ye Alhou kükaphu ighi nikeu ngokhe acheke. 44Pilate ye Jisü thiva pikeu chilu no akümzave. Ike pa no aqhe shou zatsüu ku no pa vilo Jisü ye thivea keshea ipi iniju. 45Kughou Pilate no Jisü ye thivea kepi aqhe shou zatsüu lau no ithive keno, pa no Jisü sükumo Joseph tsüve. 46Ikehu Joseph no phephei keu phì hami qhü, eno kros lono akumo ikhiqhive püzü phephei keu phì pe küzüve no atu chhupho keu kumoki alou sǘve. Tisheno pa no atu tukulo pewo akumoki hukikha khave. 47Mary Magdalene eno Joseph pazá Mary pama ye asükumo khile qhove keno ithuluve.
ទើបបានជ្រើសរើសហើយ៖
Mark 15: STB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.