Apostolmi 18
18
Corinth lo
1Hipathiu Paul ye Athens qhive no Korinth lo wuve. 2Tilehi Paul no Pontus nó ghami Aquila ipikeu Jewmi lakhi sasü kusholu. Aquila ghí tipau dolo no pa nipu Priscilla sasü Italy lono ighi ae, kughengu Qhasükükau Claudius no Jewmi kümtsü vilo Rome phughi qhive no chevelo pi azah tsüke. Paul no pama pütsa niye wu, 3eno pama gholo akümlà shi ghi ngove, kughengu pama hutoi pa ghí aphiki tsüghǘ no qechu chekemi ke. 4Sabbath tsalà kümtsü synagog lo wu no Jewmi eno Greekmi pütsaqhi niye küptsa-kiqiju ache.
5Kughou Silas ngò Timothy pama no Macedonia lono ighive keno, Paul ye ado kümtsü ikhiphe no kütsü eno Jewmiqo vilo Jisü ye Messiah kepi ashepe shiae. 6Ikemu kughou Jewmi no pa lachile eno pipütha keno, Paul no alomishi pa phimini kuthó pìye püzü panoqo vilo ishi pi, “Nongu kithí ye nolikhi nongu makho ke! Tiye I makho kumoe! Hinguno hilau ni ye Jewkumomiqo lau wuni ae.”
7Ikehu pa no synagog lono cheve, tisheno tipau phivilo Alhou mülá chekemi Titius Justus ipikeu ki lo ilove. 8Tipathiu, synagog lo sakipheu Crispus ipikeu ye pa kibolomi kümtsü sasü Ampeu pülüluve: eno Paul no pikeu tsa chilu püzü pülülu kemi Korinthiami kutomo no baptiz shilue.
9Kijili lakhi Ampeu no kungunhetsü lono ishi Paul pütsae: “Msà kevilo; tamo no pialo, inaqhoi ngove kevilo. 10Kughengu I no O gholo ani, eno khunomu O ghüzamo nani, kughengu mishighüna hipau lo iw timi kutomo anike.” 11Ike Paul ye ampe lakhi no tüxa tile ngove, eno Alhou tsa pesü timiqo shika ghi ae.
12Kughou Gallio no Achaia qhalo Rommiw Angh shi akeno, Corinth lo Jewmiqo küqha no Paul kügha pesü küghaki lo sasü ighi. 13Panongu no Paul ngukube ghi ishi pi, “Timi hipau ye ayeza hebide ghi timiqo pelo Alhou mülá penike pütsaqhi anie.”
14Paul no atsa pi niye kemtsa, Gallio no panonguqo vilo ishi pi, “Tsalá nongu Jewmiqo no kiuala akumou kümlà momu ayeza heküxá zapuzaghi tsa vehu muchho aghí kena pi aye, I no tsaqütsalei nongu tsa iniju tsüní cheke. 15Ikemu hiye atsa, aje eno nongu likhi nongu yeza ghili iniju kilé akeu vehu ke nongu likhi nongu no xathaluve lo. Ni ye hikithipu vehu küghatha tsümlae!” 16Tisheno pa no küghaki lono panongu hapheve. 17Ikelo panongu no synagog lo Jewmi sakipheu Sosthenes tsüqüluve eno küghaki zülo no pa heqhi; ikemu Gallio no tipau lo kitilamu alomsü tsümoe.
Priscilla, Aquila eno Apollos
18Paul ye ado hami ghenguno Corinth lo ache. Tisheno pa ye athiküzümi ngò achelimiqo qhive no Priscilla ngò Aquila pama sasü Syria lo wu niye zükilu lono cheve. Ashuka lo iku mphi lono, Cenchreae ipikeu-a lono pa no ashoqhi shipüa keu kiqi lono pa kütsüsa miyeve. 19Panongu no Ephesus lo ighi eno Paul ye Priscilla ngò Aquila pama tile qhive no wuve. Paul ampi ye synagog lo ilo no Jewmiqo sasü küptsa-kiqiju ae. 20Panongu no pa vilo panongu gholo ado hami ngo aghí tsülo pi kemu pa no milive. 21Ikemu wuve niye akelo Paul no ashoqhi shi ghi panoqo vilo pi, “Alhou pulou shi aghí aye, ni ye nongu lau ideighi nani.” Tisheno zükilu lono Ephesus lo wuve. 22Kughou pa no Caesarea tolu keno, Jerusalem lo chesü iqho püzü akukuhomiqo sasü kusholu eno tithiu Antioch lo iqive.
23Paul ye Antioch lo ado hami ngove kethiu Galatia ngò Phrygia qhalo a-a lakhi lono lakhi lo kicheghüzü shi wu no küpülümiqo kümtsü shikumto tsüe.
24Tishi akelo Alexandria lo xüküami Jewmi lakhi Apollos ipikeu ghí Ephesus lo ighi. Timi hipau ye akighithimi eno Kuchoyesü tsaqütsalei ithi akemi ke. 25Pa ye Alhou sükümsa laghi lo akivishi shika puthu püa kemi, eno pa ye John baptiz likhi ithi akemi kemu ighono pulopiniyi shi Jisü ghili pikülha eno piküqümo no kütsü pìye chekemi ke. 26Pa no amlo kumto shi synagog lo atsa pithuve. Priscilla ngò Aquila pama no Apollos tsa chilu kelo pama no pama ki lo pa kusü eno Alhou laghi pesü Apollos vilo aghileshi hepho-piye.
27Kughou Apollos no Achaia lo wu nishi akeno, athiküzümi eno achelimiqo no pa shikumto eno akhopemiqo vilo pa sasǘ tsülo ipi akiyé yètsü. Kughou pa no Achaia tolu keno, Alhou’w küpükini lono küpülümi shiluve keqo lau pa ye akukuphu kijè shilu. 28Kughengu pa no aqha zülo kighe kelo akumto shi Jewmi pa lachile akeqo gheqhilu, eno Jisü ye Messiah kepi Kuchoyesü lono kimchi tsüke.
ទើបបានជ្រើសរើសហើយ៖
Apostolmi 18: STB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
