1 Kor. 3
3
Akukuhou lo Sakiphemiqo
1Athiküzümi eno achelimiqo, ni ye Aghungu lono xü chekemi pütsa ketoi nongu pütsa mülae ikemu itehi kutólo ayeghilomi küxü ghola lo akemi, tiye Khristo lono angá kughunu shi akemiqo toi nongu pütsa anike. 2I no mükamüghai keu chuqu kumo püzü akichhizü nongu tsüke, kughengu nongu ye mükamüghai keu chuqu chumla ke. Mütsüqhei no itehimu nongu ye chumla nani ke. 3Nongu ye itehimu ayeghilomi küxü qhemi lo aphike. Kughengu itehi kutólo nongu dolo anhekushu eno kütsala keu aphike, nongu ye ayeghilomi küxü ghola lo xü aphike kumo keshea? 4Kughengu kughou timi lakhi no, “Ni ye Paul papemi,” eno kütami no, “Ni ye Apollos papemi,” ipi pìní keno tiye nongu ye ayeghilomi küxü ghola lo xü aphike kumo keshea?
5Tishiaye Apollos ye kiu shi chekemi kea? Eno Paul ye kiu shi chekemi kea? Panongu ye aqemiqo ke, eno Ampeu no pama lakhi-khi lau akümlà tsüpüa keu kiqi lono panongu vechewo nongu ye pülülu ke. 6I no asübo shosü, Apollos no azü pusǘ, ikemu Alhou no tipau thuwulu pe ke. 7Ikehu shosü keu pina azü pusǘ keu pinamu akhoto kumoe, ikemu Alhou khuu no abòqo thuwulu pe cheni keno pa likhi no akhotou ke. 8Timi khuu no asübo shosü eno timi khuu no azü pusǘ keno pama ye akimiji lakhi ke, eno pama kinikujo pama kümlà kiqi lono qesaxu tsü kepu shi nani. 9Kughengu ningu ye Alhou kümlà lo mülà küqha akemiqo ke; eno nongu ye Alhou’w aki-alu ke.
10Alhou no küpükini I tsüpüa keu vechewo ni ye aki kishimi alokütsümi lakhi toi aboqha qhapüa tsü ani, ikelo ye kütami khami no tipau shou aki shipuku anie. Ikemu khukhumu aboqha hipau shou shipukuni aye, kutokughoi moayesa nani. 11Kughengu aboqha khikhi qhavea keno tiye Jisü Khristo ke, tinguno alau ye khunomu aboqha kütau qhamla nani. 12Khiuala no ameshoyi, ghükayi, amekusho-tu, asǜ, atsüni momu aghijini pesü aboqha shiqhepuku aye, 13tiye kiu keno panongu kümlà vechewo pìye nani, kughengu tipau Tsalá lono aküvü lo saipeghive nani. Tiye ami gholo no pephe-piye nani, eno ami no timi lakhi-khi kümlà meküa pitiju nani. 14Kiu mülà pepüa keno tipau pitivemo aye, akümlàu ye qesaxu ithulu nani. 15Ikemu tipau pitive aye, akümlàu ye amhekiqi shive nani ikemu tishiaghimu xaluve nani—eno tiye akushukulu ami küqü mtá lono pokajolu akeshi nani ke.
16Nongu likhi nongu ye Alhou’w achineki eno Alhou Ghungu no nongu gholo acheni kepi nongu ye mtha keshea? 17Timi khukhumu Alhou chineki kütsave aye, Alhou no timi tipau kütsave nani; kughengu Alhou chineki ye akimthe ke, eno nongu kümtsü Alhou chineki tipau ke.
18O likhi O pishiqhi kevilo. Nongu khiuala no hipau tiqheli küxü ghola kiqi lono alokütsümi kepi kümsü aye, no ye alokütsü shilu nike ghenguno “nikhanigha” shive moayesae. 19Kughengu hipau yeghiqha lokütsü ye Alhou gizülo nikhanigha ke. Tiye Kuchoyesü lo ishi yèpüa keu toi ke: “Pa no alokütsümi müqükini lono panoqo meluve cheni”#3:19 Job 5:13; 20eno itaghi ishi yèpüani, “Ampeu ye alokütsümi kükümsü ye ameküha kepi ithi ani.”#3:20 Leshe 94:11 21Tishiaye, timi sakiphemi khumu pükhü pe qheza akepu kühae! Kughengu thowkha kümtsü nonguw ke, 22Paul na Apollos na Peter na ayeghiqha na aküxü na akithí na itehi akeu na ighi nikeu pinamu—thowkha kümtsü nonguw ke, 23eno nongu ye Khristo’w ke, eno Khristo ye Alhou’w ke.
ទើបបានជ្រើសរើសហើយ៖
1 Kor. 3: STB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.