1 Kor. 10
10
Israel’w Xüghili Lono Pikichi Keu
1Athiküzümi eno achelimiqo, ni ye nongu pelo ningu pù-asüqo ye kíshive keno ithi penishi ani. Panongu ye kümtsü khüngküsü qholo cheche eno tisheno panongu kümtsü azüghi kathasü wulu ke. 2Panongu kümtsü khüngküsü eno azüghi lono baptiz shive püzü Moses gholo küqhaluve ke. 3Panongu kümtsü aghungu lo chuqu atho chuke 4eno aghungu lo zü atho ye ke; kughengu panongu ye panongu sasü chekeu ghungu tuqu lono ye ke, eno atuqu tipau hu ye Khristo ke. 5Tishi namu, Alhou ye panongu kutomo ju pesü amloqimove ke; eno panongu sükumoqo ye küghünamokeu-a lo apanagha peve ke.
6Ningu pelo panongu toi küsakügha thimeqo shou ningu mlo bepemo nike ghenguno kiche-kipiye shi ghi thime hipaqo shike. 7Panongu khami no shi ketoi ajulho kümlamí shi kevilo; kughengu ishi yèpüani: “Timiqo no chu eno sho niye iqa eno panongu ghapiqi ilhe niye puthugho ke.”#10:7 Ipe 32:6 8Ningu ye panongu khami no shikeu toi kipito xüküpsa kümlà shikepu kumoe—atsala lakhi lono pano qhethonhe mukuküthü thive ke. 9Ningu ye panongu khami no shikeu toi Khristo peju kepu kumoe—panongu no tishikehu apighi no mighiqhive ke. 10Eno panongu khami no shikeu toi nhenheshi kepu kumoe—panongu no tishikehu kütsave chekeu kungumi no pìthíve ke.
11Thime hipaqo ye kiche-kipiye toi panongu lau shike eno pikichi keu shi ningu tiqheli ashekuho lo xü akemi ghenguno yèpe qhike. 12Ike nono no ye ithamo no puthugho ani kepi kümsü aghí aye, no ye veqhimo kepu shi kutokupui lo. 13Ghukuju khijehi nongu zülo ighi keno kütami sheamzü lo ghí titoi ighino puju-shijuvea ke ipi kümsülulo. Alhou ye pükhübekuluu ke; pa ye nongu no puqhelu kepu nguno alau ye nongu ghuju pemo nani. Ikemu kughou O ghujuni keno, pa no O pelo theqhiluve pe kepu laghi O tsü nani.
Ajulho Kümlá
14Tighenguno I no kimiye chekemi shompamiqo, ajulho kümlá lau no pove lo. 15Ni ye vethakulumiqo vilo pi anike; I no kiu piani keno nolikhi nongu no xathaluve lo. 16Ningu no Ampeu ghulhu lo kükümgha jikhu khikhi Alhou shikimthi ghi peitha cheni keno tiye Khristo jì gholo küsaje anike kumo keshea? Eno ningu no asho süpho chekeu ye Khristo phimpi gholo küsaje anike kumo keshea? 17Kughengu ningu ye kutomo shi aghí namu ashopa lakhi lono ningu kümtsü kijechu cheni, eno tiye ningu kümtsü aphimpi lakhi ke.
18Israelmiqo ghili kümsüjulo: Timi khunoqo no aghakishi kümlaghoqo chuche keno panongu no akümlá-khache lo kutubo cheke kumo keshea? 19Tishiaye ni ye kiu piani kea? Achuqu pesü ajulho lhou lau aghakishi shi müláve keu lo kiuala akiqi ani keshea, momu ajulho lhou ye kiuala akhotou shiva keshea? 20Moe, ikemu Jewkumomiqow aghakishi ye Alhou lau kumo püzü tüghamiqo lau mülá acheni ke, eno ni ye nongu pelo tüghamiqo gholo kutubo kemi shipe nishi amoe. 21Nongu ye Ampeu jikhu lo ghí sho püzü tüghamiqo jikhu lo ghí shomlae; nongu ye Ampeu ghulhu lo ghí küsaje püzü tüghamiqo ghulhu lo ghí küsaje mülae. 22Ningu ye Ampeu nhekushu xukutho niye pükapütsa ani keshea? Ningu ye pa nguno akumtou keshea?
Küpülümiw Ghoshixü
23Nongu no, “Ni ye kiu-kiumu shilu kepu chipiu ani,” ipi cheni—ikemu thowkha kümtsü akivipu kumoe. “Ni ye kiu-kiumu shilu kepu chipiu ani,” ipi cheni—ikemu thowkha kümtsü xaqhekulupu kumoe. 24Timi khumu pa likhi pa kivipu phu kepu kumoe, ikemu kütami kivipu phu kepue.
25Alolo kighithi lo küpüna ghi iniju keu shikevi no ashi lhikishi-a lo kiu-kiu je aghimu kümtsü chulo, 26kughengu, “Ayeghiqha eno tilehi akeu kümtsü Ampeu’w ke.”#10:26 Leshe 24:1
27Pülümo kemi lakhi no alibe chu peniye nongu kusü kelo nongu no wu nishi aye, nongu zülo kiu-kiu qhi tsüní keno akükümsü lo küpüna ghi iniju keu shikevi no chulo. 28Ikemu khuala no nongu vilo, “Hiye ajulho lhou müláve keu ke,” ipi aye khuu no nongu vilo pi keno pa ghengu eno nongu kükümsü küpünamo nikeu ghenguno tipau chu kevilo. 29Ni ye nongu kükümsü küpüna keu ghili kumo no kütami kükümsü küpüna keu ghili pi anike. Kushiye timi kütami kükümsü pelo iw ghoshixü shou küghathabe apeni kea? 30I no shikimthiqhiyi alibe chu keu lo sǘ aye, kushiye I no Alhou shikimthi ghi kiula shikeu ghenguno I pipütha pe aní kea?
31Ike nongu no chuna shona momu kiu-kiu shi namu, kümtsü Alhou juküvüpu ghenguno shilo. 32Jewmi na, Greekmi na Alhou kukuhomi shi aghí namu shokukholu pemo kepu shi xülo. 33Ni ghí alaghi jeli thowkha lo nongu kümtsü mlopiqi tsü niye pükapütsa acheni ke. Kughengu ni ye I likhi I kivipu phu chemoe ikemu timi kutomo kivipu phu acheni, tishianguno panongu pelo xaluve peniye ke.
ទើបបានជ្រើសរើសហើយ៖
1 Kor. 10: STB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.