Tohi a Paulo ki te kau LOMA 4
4
Faitotonu i te tui: Apalahamo mo Tavite
1Kotea anai tatatou ui o uhiga mo Apalahamo tatatou tamai i te kakano? Kotea nee ina mau? 2Kapau nee fakamatatonu ia Apalahamo e ana gaue, nee feala leva ke nekenekea ia ia, kae ia mua o te Atua nee mole ina fai te mea aia. 3Koteuhi kotea te ui a te Tohi? Nee tui ia Apalahamo ki te Atua, pea nee lau leva te mea aia kia ia ko he faitotonu. 4Kae ki ae e ina fai he gaue, e tuku kia ia he totogi, o mole hage ko he kalasia, kae o hage ko he mea e maua; 5pea ki ae e mole ina fai pe he gaue, kae tui ia kia ia ae e ina fakamatatonu te tagata agahala, e lau e te Atua tana tui ko he faitotonu kia ia.
6O hage ko te fakaha foki e Tavite te manuia o te tagata e tuku ki ai e te Atua te faitotonu, hala gaue:
7 Manuia natou ae kua fakamolemole anatou hala,
Pea kua uufi anatou agahala!
8 Manuia te tagata ae e mole lau e te Aliki tana agahala kia ia!
9Pe e gata pe te manuia aeni i te kau silikosisio, pe e toe kau foki i ai te kau hee silikosisio? Koteuhi e tou ui kua lau te tui a Apalahamo ko he faitotonu kia ia. 10Pe ko te temi fea nee lau ai tana tui kia ia? Pe i te osi o tona silikosisio, pe i mua o tona silikosisio? Nee heeki silikosisio ia, nee kei hee silikosisio ia. 11Pea nee ina tali leva te fakailoga o te silikosisio, o hage ko he fakamooni o te faitotonu ae nee ina mau i te tui kae kei hee silikosisio ia, koteuhi ke hoko ia ko te tamai a te kau hee silikosisio fuli ae e tui, pea ke lau foki kia natou te faitotonu, 12pea ko te tamai foki a te kau silikosisio, ae nee mole pe gata i tonatou silikosisio, kae nee natou haele foki i te u lakaaga o te tui a tatatou tamai ko Apalahamo i te temi nee heeki silikosisio ai ia.
13Koteuhi nee mole fai te fakapapau ke tuku te tofiga o te malamanei kia Apalahamo pee ki tona hakoga, i te lao, kae i te faitotonu o te tui. 14Koteuhi kapau ko natou pe ae e fakalogo ki te lao e natou mau te u koloa o te fakapapau, e mole aoga anai te tui pea e mole he uhiga o te fakapapau. 15Koteuhi e fakatupu e te lao te hauhau o te Atua; kae i te kogamea e mole mau ai he lao, e mole mau ai foki he hala ki te lao. 16Koia, e tou mau ai te tofiga o te fakapapau aki te tui, o tupu ke tuu ia ko he kalasia, pea ke tuu mau te fakapapau ki te hakoga katoa, o mole gata pe ki te hakoga ae e fakalogo ki te lao, kae ki te hakoga foki ae e ina mau te tui a Apalahamo, tatatou tamai fakatahi, o hage ko tona tuu i te Tohi: 17Nee au fakanofo ia koe ko te tamai o ni puleaga lahi osi. Ko ia ko tatatou tamai i mua o ia ae nee tui ki ai, te Atua, ae e ina foaki te mauli ki te kau mate, pea e ina ui ki te u mea e heeki tupu o hage kua natou tupu. 18Nee tui Apalahamo o amanaki lelei, kae nee mole kei ai he amanaki, pea nee liliu leva ia i ai ko te tamai o ni puleaga lahi osi, o mulimuli ki te mea nee fakaha kia ia: E fena anai te lahi o tou hakoga. 19Nee tau teau ia ape, kae nee mole toe vaivai tana tui i tana vakai ifo kua mate tona sino, pea kua mate te alo o Sala. 20Nee mole toe lotolotolua ia o uhiga mo te fakapapau a te Atua, i he tui gataa; kae nee fakamalohii ia e te tui, o ina fakakololia ai ki te Atua, 21pea mo ina iloi papau i tona loto ko te mea ae kua fakapapau e te Atua, e ina fealagia foki tona fakahoko. 22Koia nee lau ai te mea aia kia ia ko he faitotonu.
23Kae e mole tupu pe ko ia toko tahi ae nee tohi ai, ko te mea aia kua lau kia ia; 24e tupu foki ko tatou, ae e toe lau anai ki ai te mea aia, tatou aeni e tui kia ia ae nee ina toe fakatuuake mai te mate ia Sesu totatou Aliki. 25Nee tuku age ia ki te mate o uhiga mo atatou agahala, pea nee toe fakatuuake ia o uhiga mo totatou fakatonuhia.
ទើបបានជ្រើសរើសហើយ៖
Tohi a Paulo ki te kau LOMA 4: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
