Tohi a Paulo ki te kau LOMA 2
2
Te fakamaau a te Atua
1Oi tagata, ko ai ia koe, ia koe ae e faifakamaau, e mole ke hao anai; koteuhi, i tau fakamaaui natou ake ae, e ke fakamaaui ia koe totonu, koteuhi ko koe ae e ke fakamaaui, e ke toe fai foki te u mea aena. 2Koia, e tou iloi ko te fakamaau a te Atua kia natou ae e natou fai te u mea aena e mulimuli ki te mooni. 3Pe e ke ui anai, tagata, ae e ke fakamaaui natou ae e natou fai te u mea aena, pea e ke toe fai natou, e ke hao anai i te fakamaau a te Atua? 4Pe e ke fakanoai anai te u koloa o tona agalelei, mo tana kataki fualoa pea mo tona manavaofa faifualoa, o mole ke iloi e ekenaki ia koe e te agalelei o te Atua ki te fakahemala? 5Kae, i tau fakafefeka pea mo tou loto hee fakahemala, e ke tanaki ai kia koe he koloa o te hauhau ki te aho o te hauhau pea mo te fakaha o te fakamaau totonu a te Atua, 6ae e ina totogi anai ki te tagata takitahi o mulimuli ki ana gaue: 7Ko te mauli kia natou ae, i tanatou kataki fualoa o fai te mea e lelei, e natou kumi te kololia, mo te fakamauhiga, pea mo te mauli hee mate; 8kae ko te hauhau mo te mamahi lahi kia natou ae e natou agatuu, mo logogataa ki te mooni kae logogafua ki te agahala. 9Ko te mamahi mo te tuania ki te u tagata fuli ae e natou fai te kovi, o uluaki ki te Sutea pea ki te Keleka! 10Ko te kololia, mo te fakamauhiga, pea mo te tokalelei, ki ae e ina fai te lelei, o uluaki ki te Sutea pea ki te Keleka! 11Koteuhi e mole fakakehei e te Atua he tahi i ona mua.
12Ko natou fuli ae nee agahala hala lao e mamate anai hala lao, pea ko natou fuli ae nee agahala i te lao e fakamaaui anai e te lao. 13Koteuhi e mole ko natou ae e fakalogo ki te lao e faitotonu ia mua o te Atua, kae ko natou ae e natou fai te lao e faitotonu. 14Ka ko te kau pagani, ae e mole natou mau te lao, e natou fai mahani te mea e fakaha e te lao, e natou liliu, natou aena e mole natou mau te lao, ko he lao kia natou totonu; 15e natou fakaha i ai ko te u mea e fakatotonu e te lao kua tohi natou i onatou loto, pea e fakamooni ki ai onatou loto, mo anatou manatu ae e natou valoki natou i ihi lakaga pea e natou fakatonuhia natou i ihi lakaga. 16Koena te mea e ha anai i te aho ae e fakamaaui ai anai e te Atua ia Sesu-Kilisito te mea fuape e fufu i te mauli o te u tagata, o mulimuli ki taku Evaselio.
Te kau Sutea mo te Lao
17Ia koe, e ke higoa ko te Sutea, e ke falala katoa ki te lao, e ke nekenekea i tou Atua, 18e ke iloi te finegalo o te Atua, pea nee ako kia koe e te lao ke ke poto i te filifili o te mea e lelei; 19e ke tui ko koe ko he tagata takitaki ki te kau kivi, ko he malama kia natou e nofo i te fakapouli, 20ko he tagata fakahinohino ki te kau vale, ko he faiako ki te kau toe liliki, koteuhi kua ke mau i te lao te lekula o te poto mo te mooni; 21koia, ko koe ae e ke ako te tahi kaiga, e mole ke ako ia koe totonu! Ko koe ae e ke akonaki ke aua te kaihaa, e ke kaihaa! 22Ko koe ae e ke ui ke aua te tono, e ke tono! Ko koe ae e ke fakalialia ki te u taulaatua, e ke kaihaa te u fale lotu! 23Ko koe ae e ke nekenekea i tau mau te lao, e ke fakamatagafuai te Atua i tau maumaui te lao! 24Koteuhi kua laukovii te huafa o te Atua i te kau pagani o tupu ko koutou, o hage ko tona tohi.
25E aoga te silikosisio, mo kapau e ke fai te lao, kae kapau e ke maumaui te lao, e mole he uhiga o tou silikosisioi. 26Koia kapau e fai e te tagata hee silikosisio te u fakatotonu o te lao, pe e mole lau anai tona hee silikosisio ko he silikosisio? 27Ko te tagata ae e hee silikosisio i tona kakano, kae e ina fai te lao, e ina fakamaaui anai ia koe, ae e ke maumaui te lao, logo ai e ke mau te lao i te tohi pea kua ke silikosisio i te kakano? 28Koteuhi ko te Sutea mooni e mole ko ia ae e ina mau te agaaga; pea ko te silikosisio, e mole ko ia ae e ha i te kakano. 29Kae ko te Sutea mooni e ko ia ae e silikosisio i loto, ae e silikosisio i tona loto, i he silikosisio e fakalogo ki te Laumalie o te Atua kae kailoa ki te matai tohi o te lao. Ko te fakavikiviki o te tagata Sutea aia e mole hau mai te tagata kae mai te Atua.
ទើបបានជ្រើសរើសហើយ៖
Tohi a Paulo ki te kau LOMA 2: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
