Tohi a Paulo ki te kau LOMA 16
16
Fakaalofa a Paulo ki te u tehina
1E au kole atu ke koutou tokaga kia Fope, totatou tuagaane, ae e tiakono i te Ekelesia o Senekele, 2o tupu ke kotou fakatalitali ia i te Aliki, i he fakatalitali e gali mo te kau sagato, pea ke kotou tokoni kia ia i te u mea e kotou aoga ai anai kia ia, koteuhi nee tokoni ia ki he kaugamalie pea mo au totonu foki.
3Avage oku ofa kia Pelesila mo Akilasi, ko oku kauga gaue ia Sesu-Kilisito, 4nee na foaki ona mauli ke haofaki ai toku mauli; e mole ko au pe ae e loto fakafetai kia naua, kae ko te u Ekelesia fuli foki o te kau pagani. 5Avage foki oku ofa ki te Ekelesia ae i tona api. Avage oku ofa kia Epainete, ko toku ofaaga, ae ko te uluaki fua o Asia ia Kilisito. 6Avage oku ofa kia Malia, ae nee lahi osi tana gaue kia koutou. 7Avage oku ofa kia Atoloniko mo Suniasi, ko oku kaiga pea ko oku kaumea i te pilisoni, ae nee ofainai lahi i te kau apositolo pea nee uluaki tafoki ia au kia Kilisito. 8Avage oku ofa kia Apiliato, toku ofaaga i te Aliki. 9Avage oku ofa kia Ulupano, tomatou kaumea gaue ia Kilisito, pea mo Setakisi, toku ofaaga. 10Avage oku ofa kia Apelesi, ae kua mamahi o tupu ko tana tui kia Kilisito. Avage oku ofa kia natou o te api o Alisitopule. 11Avage oku ofa kia Elotione, toku kaiga. Avage oku ofa kia natou o te fale o Nalesise ae e nofo i te Aliki. 12Avage oku ofa kia Tilifena mo Tilifosa, ae ko te u fafine gaue ki te Aliki. Avage oku ofa kia Pelesita te ofaaga ae nee lahi osi tana gaue ki te Aliki. 13Avage oku ofa kia Lufusi te filifiliia i te Aliki, mo tana fae ae ko taku fae foki. 14Avage oku ofa kia Asinikilito, Felekone, Elemesi, Patolopasi, Elemasi mo te u tehina ae e nonofo mo natou. 15Avage oku ofa kia Filoloke mo Sulia, mo Neleo mo tona tehina, feia kia Olepa mo te kau sagato fuli e nonofo mo natou. 16Ke kotou fefakaalofaaki i he uma maonioni. E fakaalofa atu kia koutou te u Ekelesia fuli o Kilisito.
Tokaga kia natou e fakatupu mavetevete
17E au fakalotomalohii koutou, nai tehina, ke koutou tokaga kia natou ae e natou fakatupu ni fakavaevaega mo ni mea fakatupu higa, mo fakatupu kovi ki te akonaki kua kotou tali. Koutou fakamamao maia natou aia. 18Koteuhi e mole faifekau te u faahiga tagata aia kia Kilisito totatou Aliki, kae e natou faifekau ki onatou fatu totonu; pea aki ni palalau malu mo fakalaupisi, e natou fakahehe te u loto o natou ae e faigafua. 19Kia koutou, kua iloi takotou fakalogo e te u tagata fuli. Koia e au fiafia ai o uhiga mo koutou, kae e au loto ke kotou fakapotopoto i te mea e lelei, pea ke kotou maa i te mea e kovi. 20Kua vave leva te malamalaki e te Atua o te tokalelei ia Satana i okotou lalo vae. Ke nofo mo koutou te kalasia o totatou Aliki ko Sesu-Kilisito!
21E fakaalofa atu kia koutou ia Timoteo, toku kaumea i te gaue, mo Lusiusi, mo Sasone pea mo Sosipatele, ko oku kaiga. 22E au fakaalofa atu kia koutou i te Aliki, ia au Teletiusi ae nee ina fai te tohi aeni. 23E fakaalofa atu kia koutou ia Kaiusi ae nee ina fakatalitali au, pea mo te Ekelesia katoa. E fakaalofa atu kia koutou ia Elaseto, te tagata taupau paaga o te kolo, pea mo te tehina ko Kaletusi.
24Ke nofo te kalasia o totatou Aliki ko Sesu-Kilisito mo koutou fuli! Ameni!
25Ki ae e feala ke ina fakamalohii koutou o mulimuli ki taku Evaselio pea mo te akonaki a Sesu-Kilisito, o mulimuli ki te fakaha o te misitelio ae nee ugia lolotoga o ni temi heegata, 26kae kua fakaha i te temi nei e te u tohi a te kau polofeta, o mulimuli ki te fakatuutuu a te Atua heegata, pea kua fakaha ke iloi e te u puleaga fuli, ke natou fakalogo ki te tui: 27Ke tuku ki te Atua, ko te poto e tahi, te kololia ia Sesu-Kilisito i te u sekulo mo te u sekulo! Ameni!
ទើបបានជ្រើសរើសហើយ៖
Tohi a Paulo ki te kau LOMA 16: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
