Tohi a Paulo ki te kau LOMA 13
13
Te fakalogo ki te u pule fakamalama
1Ke fakamalalo te tagata fuli ki te u pule e taki; koteuhi e mole he pule e mole hau mai te Atua, pea ko natou kua fakanofo, nee fakanofo natou e te Atua. 2Ko ae e agatuu ki te pule, e agatuu ki te fakatuutuu a te Atua, pea ko natou e agatuu, e natou aumai anai kia natou te tautea. 3Koteuhi e mole he mataku ki te kau taki i he mea lelei, kae i he mea e kovi. Kapau e ke loto ke aua naa ke mataku ki te pule, fai te mea e lelei, pea e fakamooni anai ia kia koe. 4Ko te pule ko te tagata faifekau ia a te Atua o uhiga mo tou lelei. Kae kapau e ke fai te kovi, ke ke mataku; koteuhi e mole ina too noa te heleta: Ko ia ko te tagata faifekau a te Atua, ke ina fai te lagavaka pea mo ina tauteai ae e ina fai te kovi. 5Koia e aoga ai ke fakamalalo, o mole pe tupu ko te mataku ki te tua, kae o tupu foki ko te loto.
6Ko te tupuaga foki aia o takotou totogi te u tukuhau. Koteuhi ko te u pule ko te u tagata faifekau natou a te Atua, ke tokaga ki te gaue aia. 7Ke kotou liufaki ki te tagata fuli te mea ae e tonu ke natou mau: Te tukuhau ki ae e tonu ke kotou hui ki ai, te totogi ki ae e tonu ke kotou totogi ki ai, te mataku ki ae e tonu ke kotou mataku ki ai, te fakaapaapa ki ae e tonu ke kotou fakaapaapa ki ai.
Te ofa fakatautehina
8Aua naa kotou tuu maua ki he tahi, kae ke kotou maua feofaofani i okotou vahaa, koteuhi ko ae e ofa kia natou ake ae kua ina fai te lao. 9Koia ko te u fekau: E mole ke tono anai, e mole ke fakapo anai, e mole ke kaihaa anai, e mole ke manumanu anai, pea mo ihi atu fekau, e fakanounou fuli i te folafola aeni: E ke ofa anai ki tou kaiga o hage ko koe totonu. 10E mole fai e te ofa he kovi ki te kaiga: Koia ko te ofa ko te katoaaga aia o te lao.
Mauli alaala
11E mauhiga te mea aia koteuhi kua kotou iloi foki te temi kua tou nonofo ai: Ko te hola aeni ke kotou alaala ai mai te moe, koteuhi i te temi nei kua toe asilisili ovi mai kia tatou te haofaki i te temi ae nee tou tui ai. 12Kua vave pe te osi o te pouli, kua ovi pe te aho. Koia ke tou siaki osi te u gaue o te pouli, kae ke tou tui te u mahafu o te malama. 13Ke tou haele agatonu, o hage ko te haele i te aho, o mamao mai te kai fakavale, mo te kona, mo te u fiafia fakavale, mo te u faifeauaki, mo te fekeaki pea mo te finenonofo. 14Kae ke kotou kofu ki te Aliki ko Sesu-Kilisito, pea ke aua naa kotou tokaga ki te sino o mulimuli ki ona holi.
ទើបបានជ្រើសរើសហើយ៖
Tohi a Paulo ki te kau LOMA 13: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
