Tohi a Paulo ki te kau LOMA 11
11
Nee mole siaki e te Atua tana hahai
1E au ui leva: Pe kua siaki e te Atua tana hahai? Kailoa! Koteuhi ko au foki, e au Iselaele, mai te hakoga o Apalahamo, mai te faahiga o Pesamino. 2Nee mole siaki e te Atua tana hahai, ae nee ina iloi fakatomua. Pe e mole kotou iloi te mea e fakaha e te tohi o uhiga mo Elia, i tana tagi ae nee fai ki te Atua o uhiga mo Iselaele: 3Aliki, kua natou tamatei au polofeta, kua natou maumaui ou aletale; ko au toko tahi pe kei toe, pea e natou kumi ke too toku mauli? 4Kae kotea te tali a te Atua? Nee au taofi kia au he kau tagata e toko fitu afe ae nee heeki peluki onatou tuli ia mua o Paale. 5Pea e toe fena foki i te temi nei, e i ai he toega o mulimuli ki te filifili a te kalasia. 6Nee ina filifili natou uhi ko tona kalasia kae e mole uhi ko anatou u gaue; koteuhi kapau e mole fena, pea ko te kalasia o te Atua e mole ko he kalasia mooni ia.
7Kotea koa ia? Ko te mea ae nee kumi e Iselaele nee mole ina mau ia. Gata pe kia natou ae nee filifili e te Atua nee natou mau ia; ko natou ake ae kua natou liliu o fakafefeka, 8o hage ko tona tuu i te tohi:
Kua tuku e te Atua kia natou he loto fakaauauganoa, ni mata ke aua naa sio, pea mo ni taliga ke aua naa logo, o kaku mai ki te aho nei.
Pea nee ui e Tavite:
9 Ke liliu tonatou laupapa ko he puleaki kaka kia natou,
Ko he kupega, ko he mea fakatupu higa, pea ko he tautea kia natou!
10 Ke fakapouli onatou mata ke aua naa natou sio,
Pea ke piko tuumau onatou tua!
Fakatokaga ki te kau pagani
11E au ui leva: Pe i te tukia a te hahai o Isalaele nee natou higa o talu osi? Kailoa aupito! Kae, i tanatou higa, nee mafai ai ki te hahai pagani ke natou mau te fakamauli, ke tupu ai te finenonofo a te hahai Iselaele. 12Pea kapau nee liliu tanatou faihala ko te fakakoloaaga o te malamanei, pea mo tonatou fakamasiva ko te fakakoloaaga o te kau pagani, e feafeai age anai te lahi o te u koloa mo kapau e natou tafoki fuli anai. 13E au fakaha atu kia koutou, hahai pagani: I toku uhiga ko te apositolo o te hahai pagani, e au fiafia i taku gaue fakaapositolo: 14E au fakaamu ke fakatupu i ai, mo kapau e feala, te finenonofo o natou o toku lanu, pea ke haofaki ai ni ihi. 15Koteuhi kapau ko tonatou siaki, ko te fakatokatoka aia o te malamanei mo te Atua, e feafeai age anai tonatou toe aumai? Ko te mauli anai aia kia natou ae nee mamate?
16Koteuhi kapau e maonioni te u uluaki fua, e toe fena foki mo te fua fuli; pea kapau e maonioni te aka, e toe fena foki mo te u vaa. 17Kae kapau nee tuusi ni ihi o te u vaa, pea kapau ko koe, ae nee oliveto vao, kua fakapipiki koe ki tonatou pipikiaga, pea kapau kua ke kau ki te aka ae e ina fagai te oliveto, 18aua naa ke sio lotokovi kia natou ae nee tuusi. Kapau e ke nekenekea, ke ke iloi e mole ko koe ae e mauli ai te aka, kae ko te aka ae e ke mauli ai. 19E ke ui anai: Nee tuusi te u vaa ke fakapipiki ai au ki te aka. 20E tonu te mea aia; nee tuusi natou i tanatou tuigataa, pea ko koe, e ke tuu i te tui. Aua naa ke fiamaoluga kae ke ke mataku; 21koteuhi kapau nee mole fakahao e te Atua te u vaa totonu, e mole ina fakahao anai mo koe foki. 22Koia, sio ki te agalelei mo te itaita o te Atua: itaita kia natou kua higa, pea agalelei kia koe, mo kapau e ke nofo tuumau i te agalelei aia; ka e kailoa, pea e toe tuusi anai mo koe foki. 23Pea ko natou foki, kapau e mole natou tuumau i tanatou tuigataa, pea e toe fakapipiki anai natou; koteuhi e mafimafi te Atua ke ina toe fakapipiki natou. 24Kapau ko koe, nee tuusi koe mai te oliveto vao, o mulimuli ki tou natula totonu, pea kua fakapipiki koe, o fakafehagai ki tou natula totonu, ki te oliveto mooni, e toe tahi age anai te fakapipiki o natou, o mulimuli ki tonatou natula totonu, ki tonatou oliveto totonu.
E haofaki anai Iselaele moka fakahemala anai ia ia
25Koteuhi e mole au loto, u tehina, ke kotou fakapouli ki te misitelio aeni, koteuhi ke aua naa kotou fia mealahi: Kua to he potu o Iselaele ki te fakafefeka, o kaku ki te temi ae e katoa ai anai te kau pagani ae e tonu ke ulu ki te fakamauli. 26Pea hoki fakamauli anai Iselaele katoa, o mulimuli ki te mea e tuu i te Tohi:
E hau anai te fakamauli mai Sione,
E ina fakamaliu anai maia Sakopo te u agahala;
27 Pea e fakahoko anai taku hai mo natou, i te aho ae e au too ai anai anatou agahala.
28O uhiga mo te Evaselio, kua natou fili o uhi ko koutou; kae o uhiga mo te filifili, e ofainai natou o uhi ko anatou tamai. 29Koteuhi e mole toe too e te Atua te mea kua ina foaki pea e mole toe fetogi manatu o uhiga mo natou nee ina kalagai. 30I te temi mua nee koutou logogataa ki te Atua; kae i te temi nei kua kotou iloi te manavaofa o te Atua, koteuhi nee logogataa te kau Iselaele. 31Pea e tatau foki mo natou, i te temi nei kua natou logogataa, koteuhi, i te manavaofa kua fai atu e te Atua kia koutou, ke feala foki kia natou ke natou iloi i te temi nei te manavaofa ae kua fai atu kia koutou. 32Koteuhi kua tuku e te Atua te u tagata fuli ki te logogataa, koteuhi ke ina fakaha tona manavaofa ki te u tagata fuli.
Poto hee tatau o te Atua
33Oiau! Te loloto o te u koloa, mo te poto, pea mo te malama o te Atua! Ko ai e feala ke ina fakamatala ana fakamaau, pea ko ai e feala ke ina iloi ona ala! O hage ko te fakaha e te Tohi.
34 Ko ai nee ina iloi te manatu a te Aliki,
Pe ko ai nee ina ako ia ia?
35 Ko ai nee ina uluaki foaki kia ia, ke ina toe totogi ake kia ia?
36Koteuhi ko te mea fuli maia ia, pea aki ia ia, pea kia ia. Kia ia te kololia i te u sekulo fuli! Ameni!
ទើបបានជ្រើសរើសហើយ៖
Tohi a Paulo ki te kau LOMA 11: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
