Tohi a Paulo ki te kau KALATE 3
3
E faitotonu te tagata i te tui pe hala mo te u gaue o te lao
1Oi kau Kalate vavale! Ko ai aena kua ina fakauluvale koutou, ke aua naa kotou fakalogo ki te mooni, koutou ae nee fakaha tautonu ki okotou mata ia Sesu-Kilisito nee kolusifikoi? 2Koeni pe te mea e tahi e au fia iloilo ki ai: Pe nee kotou tali te Laumalie Maonioni uhi ko te u gaue o te lao, pee uhi ko te akonaki o te tui? 3Pe kua kotou hala fakakaukau osi? I te osi o takotou kamata i te Laumalie Maonioni, pe kua kotou loto i te temi nei ke kotou fakaosi i te kakano? 4Pe nee kotou katakii noa te u mamahi fuli? Mo kapau e feala ke noa ia!
Ko te hai mo Apalahamo ko he hai o te tui
5Ko ia ae e ina foaki kia koutou te Laumalie, pea mo ina fakahoko ni milakulo ia koutou, pe e ina fai te u mea aena uhi ko te u gaue o te lao, pe e uhi ko te akonaki o te tui? 6O hage ko te tui a Apalahamo ki te Atua, pea nee lau leva ia kia ia ko te faitotonu, 7ke kotou iloi foki ko natou e natou mau te tui a Apalahamo ko te u foha natou o Apalahamo. 8Koia i te iloi fakatomua e te Tohi e fakamatatonu anai e te Atua te hahai pagani aki te tui, nee ina fakaha fakatomua kia Apalahamo te logo lelei aeni: E tapuakina anai te u puleaga fuli ia koe! 9Koia ko natou fuli e tui e tapuakina natou fakatahi mo Apalahamo, te tagata tui.
Ko ae e pipiki ki te u gaue o te lao e nofo i te malaia o te lao
10Koteuhi ko natou fuli e pipiki ki te u gaue o te lao e natou nofo i te malaia; koteuhi e tohi: Malaia he tahi pe e mole ina tauhi te u mea fuli e tohi i te tohi o te lao, pea e mole ina fai natou. 11Pea e mahino lelei foki, e mole fakamatatonu he tahi ia mua o te Atua e te lao, koteuhi e tuu i te tohi: E mauli anai te tagata faitotonu aki te tui. 12Kae e mole fakalogo te lao ki te tui; he e ui e te lao: Ko ia ae e ina fai anai te u mea fuli aena e mauli anai i ai.
Nee amo e Kilisito te malaia o te lao
13Nee totogi tatou e Kilisito mai te malaia o te lao, i tana liliu ko te malaia uhi ko tatou – koteuhi e tuu i te Tohi: Malaia ia ae e tautau i te akau – 14nee fai feia ke fakahoko te tapuaki o Apalahamo ki te kau pagani ia Sesu-Kilisito, pea ke tou tali aki te tui te Laumalie nee fakapapau mai. 15U tehina, (e au palalau o hage ko te u tagata), ka fai e he tagata he fakapapau o mulimuli ki te u lekula totonu, logo ai e fai ia e he tagata, kae e mole toe holoi ia e he tahi, pea e mole toe hili e he tahi he mea ki ai. 16Koia, nee fai te u fakapapau kia Apalahamo mo tona hakoga. Nee mole ui: Mo ona hakoga, o hage nee kaugamalie ni hakoga, kae ko te hakoga pe e tahi, pea ki tou hakoga, ko tona uhiga kia Kilisito.
Nee mole toe hilifaki e te lao he mea foou ki te hai mo Apalahamo
17Koeni, te mea e au fia fakaha: ko he hai ae nee fakamooni e te Atua i mua, e mole feala ke toe holoi ia, pea e mole toe feala foki ke fakanoai te fakapapau ae e muli i ai, e te lao ae nee tuku kae kua hili ki ai ni tau e fageau tolugofulu. 18Koteuhi kapau e hau te tofiga mai te lao, pea e mole toe hau anai ia mai te fakapapau; koteuhi nee foaki te tofiga e te Atua kia Apalahamo aki te fakapapau.
Ko te gaue a te lao ko te tautea mo te teuteu
19Kotea nee foaki ai te lao? Nee foaki mai ia ki muli ke iloi ai te u agahala ki te finegalo o te Atua: Nee tonu ke tuu ia o kaku ki te kaku mai o te hakoga o Apalahamo ae nee fai ki ai te fakapapau; nee tuku te lao aia e ni aselo kia nima o he tagata fakahoko lea. 20Kae ko te tagata fakahoko lea e mole ko he fakahoko lea a he toko tahi, kae ko te Atua i tana fakapapau kia Apalahamo nee toko tahi ia. 21Pe e fakafehagai te lao ki te u fakapapau a te Atua? E kailoa osi! Kae nee foaki mai he lao ae e feala ke ina foaki te mauli, e hau mooni anai te faitotonu mai te lao. 22Kae nee fakaha e te Tohi e taomi te malamanei katoa e te agahala, o uhi ke foaki te mea ae nee fakapapau aki te tui kia Sesu-Kilisito kia natou ae e tui. 23I mua o te kaku mai o te tui, nee leoleo tatou i te pilisoni e te lao, o talitali ki te tui ae e tonu ke fakaha. 24Pea nee hage te lao ko he tagata faiako e ina taki tatou o kaku kia Kilisito, ke fakamatatonu tatou e te tui.
E tupu te maonioni o te kilisitiano i te kalasia kae kailoa i te lao
25I te kaku mai o te tui, e mole kei tou nofo leva o fakalogo ki te tagata faiako aia.
Ko ae kua tui e liliu ko he foha i te famili o te Atua
26Koteuhi ko te u foha fuli koutou o te Atua aki te tui kia Sesu-Kilisito; 27ko koutou fuli, ae nee papitema ia Kilisito, kua kotou kofu ia Kilisito. 28E mole kei i ai he Sutea, pee ko he Keleka; e mole kei i ai he tagata popula pee ateaina; e mole kei i ai he tagata pee ko he fafine koteuhi kua kotou liliu fuli ko he mea e tahi ia Sesu-Kilisito. 29Koia, kapau ko kotou a Kilisito, pea ko te hakoga kotou o Apalahamo, ko te u fanau mau tofiga koutou o te fakapapau.
ទើបបានជ្រើសរើសហើយ៖
Tohi a Paulo ki te kau KALATE 3: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland