Tohi a Paulo ki te kau KALATE 1
1
Fakaalofa
1Ko au Paulo, ko te apositolo, mole mai te u tagata, pee i he tagata, kae maia Sesu-Kilisito pea mo te Atua te Tamai, ae nee ina fakatuuake ia mai te kau mate, 2pea mo te u tehina fuli e nonofo mo au, ki te u Ekelesia o Kalatia: 3Ke foaki atu kia koutou te kalasia mo te tokalelei e te Atua ko te Tamai pea mo te Aliki ko Sesu-Kilisito, 4ae nee ina foaki ia ia o uhiga mo atatou agahala, pea ke taaki ai tatou mai te sekulo kovi aeni, o mulimuli ki te finegalo o totatou Atua mo Tamai, 5ae e tuku ki ai te kololia i te u sekulo mo sekulo! Ameni!
Siaki o te Evaselio mooni e te kau Kalate
6E au punamauli i takotou situa vave kia ia ae nee ina paui koutou i te kalasia o Kilisito, o fakalaka ki he tahi age Evaselio. 7Ko te mooni e mole he tahi age Evaselio, kae e i ai ni hahai e natou fakamaveuveu koutou pea e natou loto ke fetogi te Evaselio a Kilisito.
8Kae kapau ko matou totonu, pee ko he aselo mai lagi, nee matou fakaha kia koutou he Evaselio e fehagai mo te Evaselio nee matou akonaki atu kia koutou, ke malaia ia! 9Nee matou fakaha atu ia i mua, pea e au toe liuga atu ia i te hola aeni: Kapau nee fakaha atu e he tahi he Evaselio e fehagai mo te Evaselio nee koutou tali, ke malaia ia!
10Pea i te temi nei, pe ko te ofa o te tagata ae e au holi ki ai, pee ko ae o te Atua? Pe e au kumi ke au lelei ki te tagata? Kapau kei au lelei ki te tagata, pea e mole ko te tagata faifekau leva au a Kilisito.
Tafoki mo te vokasio o Paulo
11E au fakapapau atu kia koutou, u tehina, ko te Evaselio ae nee au akonaki atu nee mole hau mai he tagata; 12koteuhi nee mole au tali ia pee nee au ako ia mai he tagata, kae maia Sesu-Kilisito ae nee ha mai kia au.
13He kua kotou logo ki taku aga i mua i te lotu fakasutea, mo taku fakatagai te Ekelesia o te Atua, pea mo taku maumaui ia ia; 14pea mo taku fakalaka mamao i te tauhi ki te lotu fakasutea i he kaugamalie o toku taitupu mo toku hahai, koteuhi nee au tauhi lelei age ia natou ki te u talatisio o taku u tamai. 15Kae, i te finegalo lelei o te Atua, ae nee ina vahei kehe au mai te fatu o taku fae, ae nee ina paui au aki tona kalasia, 16ki te fakaha o tona Alo ia au, ke au fakaha ia i te hahai pagani, i te temi pe aia, nee mole au kumi he tokoni ki te kakano mo te toto, 17pea nee mole pe au hake ki Selusalemi, kia natou ae nee apositolo mua atu ia au, kae nee au alu ki Alapia; pea nee au toe liliu mai ki Tamaso.
18Hili tau e tolu, nee au hake leva ki Selusalemi o feiloiaki mo Kefasi, pea nee au nofo ia aho e hogofulu ma nima i tona api; 19kae nee mole au sio ki he tahi ake o te kau apositolo, gata pe kia Sakopo, te tehina o te Aliki. 20I te mea aeni e au faitohi atu kia koutou, koeni, ia mua o te Atua, e mole pe au loi.
21Pea nee hili aia, nee au alu leva ki te u fenua o Silia mo Silisia. 22I te temi aena, nee heeki iloi oku mata e te u Ekelesia o Sutea ia Kilisito; 23kae nee gata pe i tanatou logo ki te palalau: ko ae nee ina fakatagai tatou i mua e ina fakamafola i te temi nei te tui ae nee faiga ia ke maumaui. 24Pea nee natou fakakololia leva ki te Atua o uhiga mo au.
ទើបបានជ្រើសរើសហើយ៖
Tohi a Paulo ki te kau KALATE 1: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland