TOHI GAUE A TE KAU APOSITOLO 5
5
Loi a Ananiasi mo Safila
1Kae ko he tagata nee higoa ko Ananiasi, mo tona ohoana ko Safila, nee ina fakatau leva he kele, 2pea nee ina taofi leva he koga o te paaga, o iloi ia e tona ohoana; pea nee ina ave leva te tahi koga o te paaga, o tuku kia vae o te kau apositolo. 3Nee ui age leva e Petelo kia ia: Ananiasi kotea kua fakafonu ai e Satana tou loto, o tupu ai tau loi ki te Laumalie Maonioni, pea mo tau taofi he koga o te paaga o te kele? 4Kana nee mole ke fakatau ia, kei ke nofo pe mo ia? Pea i te osi o tau fakatau ia, pe nee mole ke faifaitaliha ki tona totogi? Pe nee feafeai tau fealagia te tuku ki tou loto he fakatuutuu feia? Nee mole ke loi ki ni tagata, kae ki te Atua. 5I te logo a Ananiasi ki te u palalau aia, nee toka leva ia ki lalo, o mate. Pea nee nofo leva he mataku lahi ia natou fuli nee logo ki ai. 6Nee tutuu ake leva ki oluga ni kau tupulaga, o kofukofu ia, pea nee natou ave leva ia o tanu.
7Pea nee hili ape ni hola e tolu ki ai, nee ulu ake leva ki fale tona ohoana ko Safila, kae nee mole ina iloi te mea nee hoko. 8Pea nee ui age leva e Petelo kia ia: Fakaha mai, pe ko te gataaga pe aeni o te totogi o te kele? Pea nee ina tali leva: Ei, ko tona totogi aia. 9Pea nee ui age leva e Petelo kia ia: Kotea kua kolua fia ahiahii ai te Laumalie o te Aliki? Koeni natou ae nee natou tanu tou ohoana kua tutuu i te matapa, pea e natou toe fata anai koe ki fafo. 10I te lakaga pe aia, nee toka leva ia kia vae o te apositolo, o mate. Pea nee ulu ake leva te kau tupulaga o mau ia kua mate; pea nee natou ave leva ia, o tanu ia tafa o tona ohoana. 11Pea nee to leva he mataku lahi i te Ekelesia katoa, pea mo natou fuli nee logo ki te u mea aia.
Milakulo a te kau apositolo
12Nee fai e te nima o te kau apositolo ni milakulo mo ni mea fakaofoofo ia mua o te hahai. Nee natou tutuu fuli fakatahi i te Poletike o Salomone. 13Pea nee mole toa he tahi kehe o alu ake o fakatahi mo natou; kae nee vikiviki lahi te hahai kia natou. 14Pea nee tui he hahai kaugamalie ki te Aliki, tagata mo fafine, pea nee natou fakalahi tonatou kaugamalie. 15Koia nee natou fata ai te hahai mahaki ki te u ala, o fakamomoe natou i ni palepale mo ni moeaga, koteuhi, i te fakalaka a Petelo, ke lave ia ki ni ihi o natou pee ko tona malu. 16Nee hau foki he hahai kaugamalie mai te u kolo nee ovi ki Selusalemi, o aumai ni mahaki mo ni avea; pea nee fakamauli natou fuli.
Gaohi kovii o te kau apositolo
17Kae nee tuu ake leva te pule faisakilifisio, pea mo natou fuli nee kau mo ia, i te faahiga o te kau satuseo kua natou fonu i te fuaa, 18pea nee natou puke nima leva te kau apositolo, o fakaulu ki te pilisoni lahi, 19kae, i te pouli, nee avahi leva e he aselo o te Aliki te u matapa o te pilisoni, pea nee ina taki leva natou ki fafo, o ui age kia natou: 20Koutou olo, o tutuu i te fale tapu, pea koutou fakaha ki te hahai te u folafola fuli o te mauli aeni. 21I tanatou logo ki te mea aia, nee natou ulu leva ki te fale tapu i te pogipogi uhu, o akonaki i ai. I te temi aia, nee kaku age leva te pule faisakilifisio mo natou nee kau mo ia, o tanaki te fono lahi mo te kau matua fuli o te u foha o Iselaele, pea nee natou fekau leva ni ihi ke aumai te kau apositolo mai te fale pilisoni. 22I te kaku a te kau leo ki te fale pilisoni, nee mole natou mau leva natou i ai. Pea nee natou toe liliu leva, o fakaha: 23Nee matou mau atu te fale pilisoni nee tapunu fakalelei, pea mo te kau leo pilisoni nee tutuu ia mua o te u matapa; kae i tamatou avahi atu, nee mole matou mau he tahi i loto.
24I te logo a te pule o te fale tapu mo te kau pule faisakilifisio ki te u palalau aia, nee mole natou iloi he manatu ki te kau apositolo pea mo te ikuaga o te mea aena. 25Kae nee kaku age leva he tahi, o ui age kia natou: Koeni te u tagata ae nee koutou tuku ki te fale pilisoni e tutuu i te fale tapu, pea e natou akonaki ki te hahai.
26Koia nee olo ai leva te pule solia mo te kau leo, o taki fakalelei age te kau apositolo koteuhi nee natou matataku naa tuki makai natou e te hahai. 27I te osi o tanatou taki age te kau apositolo, kia mua o te fono lahi, nee fehui age leva e te pule faisakilifisio kia natou, o ui: 28Pe nee mole matou tapui fakamalohii atu kia koutou te akonaki i te higoa aeni? Pea koeni, kua kotou fakafonu Selusalemi aki akotou akonaki, pea e koutou loto ke to kia matou te toto o te tagata aeni!
29Pea nee tali leva e Petelo mo te kau apositolo: E tonu ke fakalogo age ki te Atua i te tagata. 30Nee fakatuuake e te Atua o atatou tamai ia Sesu, ae nee kotou tamatei, o tautau ia ki te akau. 31Kua hiki ia e te Atua aki tona nima matau ko te hau pea ko te fakamauli, koteuhi ke foaki ki Iselaele te fakahemala mo te fakamolemole o te u agahala. 32E matou fakamooni ki te u mea aia, feia mo te Laumalie Maonioni, ae kua foaki e te Atua kia natou e fakalogo kia ia.
33Nee natou fakalili leva i te ita i te u palalau aia, pea nee natou loto leva ke natou tamatei natou.
Palalau a Kamaliele
34Kae nee tuu ake leva he tahi ki oluga i te fono lahi, ko he faliseo, ko tona higoa ko Kamaliele, ko he toketa o te lao, pea nee fakaapaapa ki ai te hahai katoa, o fekau ke fakamavae mua ki fafo te kau apositolo i he kii temi. 35Pea nee ina ui age leva kia natou: Kau tagata Iselaele, koutou tokaga ki te u mea ka koutou fai anai ki te u tagata aeni. 36Koteuhi nee heeki fualoa, nee ha mai Teotasi, o ui ko he tagata mauhiga ia pea nee kau leva kia ia he kau tagata, ko te toko fageau: Nee tamatei leva ia, pea ko natou fuli nee mulimuli ia ia nee natou mavetevete leva, o pupuli noa. 37Pea osi ia kae ha mai leva Sutasi ko he tagata Kalilea, i te temi nee tohi ai te hahai o te fenua, pea nee ina toho leva he kaugamalie ki tana kautahi: nee toe mate foki ia, pea ko natou fuli ae nee mulimuli ia ia nee natou toe mavetevete leva. 38Pea koeni, e au ui atu kia koutou, aua naa koutou tokaga ki te u tagata aeni, kae koutou tuku natou ke natou olo, koteuhi kapau e hau te fakakaukau aeni pee ko te gaue aeni mai ni tagata, e maumau anai ia toko tahi; 39kae kapau e hau ia mai te Atua, e mole koutou fealagia anai tona maumaui. Koutou tokaga pe naa koutou tau anai ki te Atua i te mea aeni.
Haha o te kau apositolo
40Pea nee natou loto tahi leva mo ia. Pea nee natou kalagai te kau apositolo, o fakatotonu ke haha natou aki ni akau, pea nee natou tapui age leva kia natou te palalau i te huafa o Sesu, pea nee natou tuku age leva natou.
41Pea nee mavae leva te kau apositolo maia mua o te fono lahi i te fiafia, koteuhi kua fakamaaui natou e natou gali i te tali o te u laukovi o uhiga mo te huafa o Sesu. 42Pea i te aho fuli, nee mole toe tuku tanatou akonaki pea mo tanatou fakaha te logo lelei o Sesu-Kilisito, i te fale tapu, pea mo te u fale fuli.
ទើបបានជ្រើសរើសហើយ៖
TOHI GAUE A TE KAU APOSITOLO 5: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
