TOHI GAUE A TE KAU APOSITOLO 27
27
Fekaui o Paulo ki Loma
1I te kua tonu leva ke matou olo vaka ki Italia, nee tuku leva ia Paulo mo ni ihi age tagata pilisoni ki he setulio nee higoa ko Suliusi, mai te kau solia a Aukusito. 2Nee matou hopo leva ki he vaka mai Atalamite, ae nee tonu ke alu ia tafatafa o Asia, pea nee matou olo leva mo Alisitake ko he Masetonia mai Tesalonika.
3I te aho ake, nee matou tau leva ki Sitone; pea ko Suliusi, ae nee tokaga lelei kia Paulo, nee ina fakagafua leva ke alu ia ki ona kaumea o fakaaoga tonatou ofa kia ia. 4Nee matou mavae leva i ai o fakalaka atu i te motu ko Sipele, koteuhi nee fakafehagai te matagi. 5I te osi o tamatou fakalaka i te tai o Silisia mo Pafilia, nee matou kaku leva ki Mila i Lisia. 6I ai nee mau leva e te setulio he vaka mai Alekasia ae nee alu ki Italia, pea nee ina fakaheka leva matou ki ai.
7Nee kua hili he u aho ki tamatou folau, nee faigataa tamatou fakatau ki Kinite, nee mole feala koteuhi ko te matagi. Nee hoko atu leva tamatou folau, o matou fakalaka leva ia tafa o te motu ko Kelete, o tuha tonu ake mo Salemone. 8Nee faigataa aupito tamatou fakalaka i ai, pea nee matou kaku leva ki he kogamea nee higoa ko taulaga lelei, e ovi ki te kolo ko Lasea.
9Nee kua hili foki he temi fualoa, pea kua hoko mai leva te temi faigataa o te faifolau i te tai, koteuhi kua osi te temi sesunio ae nee lelei ki te folau. 10Koia nee tokoni age leva e Paulo o ui kia natou: Kau tagata, e au sio e mole hao anai te folau mo tuutamaki pea mo maumau; e mole gata pe ki te uta mo te vaka, kae e toe tatau foki ki otatou mauli. 11Kae nee tui leva te setulio ki te pailate mo te kapiteni, kae nee mole falala ia ki te u palalau o Paulo. 12Pea o tupu nee mole lelei te taulaga ki te tau i ai i te temi momoko, nee loto leva te toko lahi ke fusi ake te taula, o ahiahi ke kaku te vaka, mo kapau e feala, ki Fenisia, ko te taulaga o Kelete ae nee hagahaga ki te potu saute uesite pea mo te noleto uesite, o tupu ke tau ai i te temi momoko.
13Nee kamata agi leva he kii matagi maamaa mai te potu saute, kae i tanatou ui e natou pulei ia, nee natou fusi leva te taula, o natou folau leva ia tafatafa o Kelete.
Te afa
14Kae nee mole fualoa, pea nee maliu leva te matagi o agi mai te motu, ko he matagi afa nee higoa ko Elakilone. 15I te tafea o te vaka koteuhi nee mole kei feala ke natou fakatau ki te matagi, nee matou tuku leva ke matou tafea. 16Nee matou fakalaka leva i te saute o he kii motu nee higoa ko Kalauta, pea kua matou kinakina lahi i te tataofi o te vakapa. 17I te osi o tona hiki ake ki te vaka, nee matou taliu leva ia, mo haihai ia aki ni kapa ki te vaka. I te mataku naa mahaia te vaka i te lauone nee higoa ko Site, nee tuku leva ki lalo te u la kae matou tuku leva matou ke tafea. 18I tomatou ta kovii e te afa, i te pogipogi ake, nee matou laku leva te uta ki te tai. 19I te tolu aho, nee matou laku leva aki omatou nima totonu te u mea gaue o te vaka. 20Nee mole toe ha leva te laa mo te u fetuu i ni tuuga aho, pea nee tuu malohi aipe te afa, o puli ai leva ia matou te amanaki lelei ki te mauli.
21Nee mole matou kai talu mai fualoa, pea nee tuu ake leva Paulo i lotomalie o natou, o ui: Kau tagata, nee tonu pe ke kotou fakalogo mai kia au, ke aua naa tou mavae mai Kelete, o feala ai leva ke aua naa hoko te tuutamaki mo te maumau aeni. 22I te temi nei e au kole atu kia koutou ke kotou lotomalohi; koteuhi e mole puli anai te mauli o he tahi pe o koutou, gata pe ki te vaka. 23Koteuhi nee ha mai kia au i te po aeni he aselo o te Atua, ae e au fakalogo mo tauhi ki ai, 24o ui mai kia au: Paulo, aua naa ke mataku, koteuhi e tonu ke ke tuu ia mua o Sesale, pea koeni, kua foaki atu e te Atua kia koe te mauli o natou fuli e folau mo koe. 25Koia kau tagata, ke kotou lotomalohi koteuhi e au tui ki te Atua, e hoko anai o hage ko tona fakaha mai kia au. 26Kae e tonu ke tou kaku mua ki he motu.
27I te kaku ki te hogofulu ma fa po, nee fetaaki matou i te tai o Atiliatike, pea nee mahalohalo leva te kau vaka, i te maupo, kua ovi mai he kele. 28I te osi fua o te loloto o te tai, nee natou mau leva ko te tolugofulu ma ono meta; pea nee toe hoho atu ki mamao, nee natou toe fua leva, o mau ko meta e uafulu ma valu. 29I tanatou mataku naa mahaia te vaka i te lauhakau, nee natou tuku leva te u taula e fa i te taumuli, pea nee natou talitali leva ke mafoa ake te aho.
30Kae nee faiga leva te kau matelo ke feholaki mai te vaka, o natou tuku leva ki te tai te vakapa, o hage e natou fia tuku ki mamao te u taula o te taumua. 31Kae nee ui age leva e Paulo ki te kau setulio mo te kau solia: Kapau e mole nonofo natou aeni i te vaka, e mole feala ke kotou mauli. 32Pea nee tuusi leva e te kau solia te u maea o te vakapa onatou tuku leva ke to ia ki te tai.
33I tanatou talitali ke mafoa mai te aho, nee kole ake leva e Paulo ke natou kai, o ina ui leva: Ko te hogofulu ma fa aeni o te u aho mo takotou talitali pea mo takotou nonofo pakupaku, nee mole pe kotou kai he mea. 34Koia, e au kole atu kia koutou ke kotou kai, koteuhi e aoga ki tokotou mauli, pea e mole puli anai he foi fului ulu o he toko tahi pe ia koutou. 35I te osi o tana palalau, nee ina too leva he pane, pea nee fakafetai leva ia ki te Atua ia mua o natou fuli, o ina tofitofi, pea mo ina kamata kai leva. 36Nee natou lotomalohi fuli leva o natou kai. 37Ko tomatou kaugamalie i te vaka ko te toko luageau fitugofulu ma ono. 38I te osi o te kai, nee natou fakamaamaa leva te vaka o laku te fulumeto ki te tai.
Mou o te vaka i te motu ko Malete
39I te mafoa mai o te aho, nee mole natou iloi te higoa o te fenua, kae nee natou sio leva ki he ava mo he mataone, pea nee natou fakatotonu leva ke natou fakaulu i ai te vaka mo kapau e feala. 40Pea nee natou veteki leva te u taula o siaki i te moana, pea nee natou veteki te u hai o te foe uli; pea nee natou toho leva te la o te taumuli, o natou olo ai leva ki uta. 41Nee natou felavei leva mo he afua i lotomalie o te ava, o mahaia ai leva te vaka; nee ulu leva te taumua i te one o mau ai te vaka, kae nee maofa leva te taumuli i te malohi o te u peau.
42Nee loto tahi leva te kau solia ke tamatei te kau pilisoni i tanatou mataku naa kauga he tahi ia natou ki uta o hola. 43Kae nee taofi leva natou e te setulio, ae nee loto ke fakamauli ia Paulo. Pea nee ina fakatotonu leva kia natou ae e poto i te kauga ke uluaki fakato ki te tai o kauga ki uta. 44Kae kia natou ake ae, e natou olo anai ki uta i ni papa pee ko ni koga o te vaka. Pea nee natou kaku haohaoa fuli leva ki uta.
ទើបបានជ្រើសរើសហើយ៖
TOHI GAUE A TE KAU APOSITOLO 27: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
