TOHI GAUE A TE KAU APOSITOLO 24
24
Paulo i mua o te kovana ko Felise
1I te hili o aho e nima, nee kaku age leva te pule faisakilifisio ko Ananiasi mo he kau matua, mo he tagata poto palalau nee higoa ko Teletule. Nee natou tagi leva ki te kovana o uhiga mo Paulo.
2Nee kalagai leva Paulo, pea nee kamata fakalakahalai leva ia e Teletule, o ui:
3Afio a Felise, e ke foaki kia matou he tokalelei lahi, pea kua lakalaka ki mua te puleaga aeni i te u gaue lagafenua kua ke fakahoko uhi ko tau lagiaki fakapoto aipe; e matou fakamooni ki te mea aia, i te u mea fuli mo te u potu fuli mo he loto fakafetai katoa. 4Kae, o tupu ke aua naa taofi fualoa ia koe, e matou kole atu kia koe, ke ke fakalogo mai, i tou agalelei, ki te mea aeni e matou fia fakaha kia koe i ni kii kupu sii pe. 5Nee matou mau te tagata aeni, ae ko he tai mahaki kovi, ae e ina fakatupu ni maveuveu i te kau Sutea katoa o te malamanei, ae ko te pule o te magai lotu o te kau Nasaleti, 6ae foki nee faiga ke ina ulihi te fale tapu. Pea nee matou loto ke fakamaaui ia o mulimuli ki tamatou lao, 7kae nee hau leva te tilipino* ko Lisiasi, o too fakamalohi ia mai omatou nima, 8kae nee ina fakatotonu kia natou ae nee natou fakalakahalai ia ke matou omai kia koe. E feala anai kia koe totonu, moka ke fakafehui anai ia, ke ke iloi te u mea fuli aeni e matou fakalakahalai ai ia.
9Nee fakamooni leva te kau Sutea ki te palalau a Teletule, o natou ui e mooni fuli te u mea aena.
Tala a Paulo ia mua o Felise
10I te fakagafua age leva e te kovana kia ia ke palalau, nee tali leva e Paulo: E au iloi, e ke tui fakamaau ki te puleaga aeni talu mai ni tau lahi, koia e au palalau anai i te falala i ou mua, o uhiga mo toku puipui. 11E heeki fakalaka ni aho e hogofulu ma lua, e feala ke ke iloi te mea aia, nee au hake ki Selusalemi o atolasio. 12Nee mole natou mau au i te fale tapu, pee i he sinakoka, pee i te kolo, e au palalau mo he tahi, pee au fakatupu he maveuveu i te hahai. 13Pea e mole feala ke natou fakamooni ki te mea ae e natou fakalakahalai ai au i te aho nei. 14E au fakaha fakalauatea i ou mua te mea aeni: E au tauhi ki te Atua o aku tamai o mulimuli ki te ala ae e natou fakahigoa ko he lotu mavae, kae e au tui ki te u mea fuli e tohi i te lao pea mo te kau polofeta, 15pea e au mau i te Atua te amanaki lelei aeni, ae e natou mau foki e natou aeni, e i ai anai he toe tuuake o te kau agatonu mo te kau agahala. 16Koia e au faiga ke au mau tuumau he loto maa ia mua o te Atua mo mua o te tagata. 17I te osi o taku puli i ni tau lahi, nee au hau leva o fai ni meaofa ki toku puleaga, pea mo ni molaga. 18Pea nee mau leva au e ni ihi Sutea o Asia, nee au lolotoga fai te u lekula o toku fakamaa i te fale tapu, pea nee mole au nofo mo ni hahai kehe, pe nee au fakatupu he maveuveu. 19Ko natou aena nee tonu ke omai ki ou mua pea ke natou fakalakahalai au, mo kapau nee natou mau he mea ia au. 20Pea ko natou aeni, ke natou fakaha pe kotea te mea kovi nee natou mau ia au, i te temi nee au tuu ai ia mua o te fono lahi, 21naa mea age ape ko taku kalaga i lotomalie o natou: E tupu ko te toe tuuake o te kau mate, aeni e au tuu ai ia mua o koutou.
22Ko Felise, ae nee malama lelei ki te aluaga o te akonaki aena, nee ina toe holo atu ki muli te fakamaau, o ui: E au sioi anai te mea aena, mo kapau e kaku mai anai te tilipino* ko Lisiasi. 23Pea nee ina fakatotonu age leva ki te setulio ke leoleo Paulo, o tuku age kia ia hona ateaina, pea ke aua naa tapui ki he tahi i ona kaiga tana ahiahi kia ia.
Fakaloaloa o te pilisoni o Paulo i Sesalea
24I te hili o ni ihi aho ki ai, nee hau leva Felise mo tona ohoana ko Tulusila, ko he fafine Sutea, pea nee ina kalagai leva ia Paulo. Nee fakalogo leva ia kae palalau Paulo ki te tui kia Kilisito. 25Kae i te palalau a Paulo ki te faitotonu, mo te loto faakataki, pea mo te fakamaau fakamuli, nee tete leva Felise, o ui age kia ia: Alu, kua feauga te aho nei; ka au toe mau anai he tahi faigamalie, pea e au toe kalagai atu anai ia koe. 26Koteuhi nee amanaki ia e foaki age anai e Paulo he paaga kia ia; koia nee tautau tukulogo ai ia ke hau Paulo ke na faipalalau.
27Kae i te osi o te u tau e lua, nee fetogi leva Felise e Polisiusi Fesitusi. I te fia mata lelei a Felise ki te kau Sutea, nee ina tuku leva Paulo i te pilisoni.
ទើបបានជ្រើសរើសហើយ៖
TOHI GAUE A TE KAU APOSITOLO 24: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
