Lua tohi a Paulo ki te kau KOLINITO 12
12
E fakaha te malohi o te Atua i te vaivai o te tagata
1E tonu ke fakakololia… E mole lelei te mea aia. Kae e au fia palalau i te temi nei ki te u mea ae nee au sio ki ai mo logo ki ai pea nee fakaha mai e te Aliki kia au.
2E au iloi he tagata ia Kilisito, kua hili ki ai ni tau e hogofulu ma fa, nee hiki ake ki te tolu lagi (pe nee hoko i tona sino, e mole au iloi, pee mole hoko i tona sino, e mole au iloi, e iloi ia e te Atua). 3Pea e au iloi ko te tagata aia (pe nee hoko i tona sino pee hala i tona sino, e mole au iloi, e iloi ia e te Atua), 4nee ina hiki ake leva ia ki te Palatiso pea nee logo leva ia ki ni palalau logolelei osi ae e mole gafua ki he tagata ke ina fakaha.
Kafo o Paulo i tona sino
5E au fakakololia anai ki he tagata fena, kae kia au totonu e mole au fakakololia anai, e au fakakololia pe i oku gaegae. 6Kapau e au loto ke au fakakololia, e mole au hage anai ko he vale, koteuhi e au fakaha anai te mooni; kae e mole au fai te mea aia, ke aua naa mau e he tahi he manatu kia au e maoluga age i te mea ae e sio ia ki ai ia au pee ko te mea ae e logo ia ki ai maia au.
7Pea koteuhi ke aua naa au mapula i te fiamealahi i te u mea lelei ae nee fakasio au e te Atua ki ai, nee tuku ki toku sino he mamahi lahi, he aselo a Satana ke ina ta au pea mo ina taofi au ke aua naa au fiamealahi. 8Nee tua tolu taku kole ki te Aliki ke fakamamao te mea aena ia au, 9kae nee ina ui mai kia au: E feauga toku kalasia kia koe, koteuhi e fakahoko toku malohi i te gaegae. Koia e au fakakololia tafito anai i oku gaegae, ke nofo te malohi o Kilisito ia au. 10Koia e au fiafia i oku gaegae, mo oku laukovii, mo oku masiva, mo oku fakatagai, mo oku mamahi, o uhiga mo Kilisito; koteuhi e hoki au malohi, moka e hoki au vaivai.
Fakatokaga a Paulo
11Kua au vale: Nee kotou eke au ke au fena. Ko koutou ae nee tonu ke kotou puipui au, koteuhi nee mole au malalo pe i he mea i te u apositolo lelei pau aia, logo ai e mole hoku uhiga. 12Kua fakaha te u fakamooni o taku gaue fakaapositolo ia koutou i te kataki fualoa i te u ahiahi fuli, mo ni fakailoga, mo ni mea fakamanamana, pea mo ni milakulo. 13Pe nee i ai he mea nee au fai fakasiisii kia koutou i te u Ekelesia ake ae? Pe ko taku mole fakaamo kia koutou toku taupau? Koutou fakamolemole mai ki te hala aia!
14Koeni, ko te tua tolu aeni o taku tokalelei ke au alu atu kia koutou, pea e mole kotou taupau anai kia au; koteuhi e mole au kumi okotou koloa, kae ko koutou totonu: E mole gali ke tanaki e te u fanau o uhiga mo anatou matua, kae ko te u matua o uhiga mo anatou fanau. 15Kia au e au fiafia lahi anai i te foaki o te u mea fuli ae e au mau mo toku mauli totonu o uhiga mo okotou laumalie. Pe e kotou ofa veliveli anai kia au, mo kapau e au ofa lahi kia koutou?
16Io! Nee mole au liliu ko he kavega kia koutou; kae, o hage ko he tagata kaka, nee au puke koutou aki he puleaki kaka! 17Pe nee au mau he mea maia koutou i he tahi o natou ae nee au fekaui atu kia koutou? 18Nee au kole kia Tito ke alu atu kia koutou, pea nee au fekaui atu mo ia te tehina ae nee au palalau atu ki ai. Pe nee kole fakamalohi e Tito he mea kia koutou? Pe nee mole ma haele i he laumalie e tahi pea mo he ala e tahi?
19Lagi kua fualoa takotou ui e ma fakamatatonu maua i okotou mua. E ma palalau atu ia mua o te Atua, ia Kilisito: Pea ko te u mea fuli aena, ofaaga, e ma fakaha atu ke lagai ai koutou ki oluga. 20Koteuhi e au mataku naa mole au mau koutou, i taku tau atu, o hage ko te mea e au loto ki ai, pea ke kotou mau au o hage ko te mea e mole kotou loto ki ai. E au tuania naa i ai ni fekeaki, mo ni finenonofo, mo ni palalau lalahi, mo ni fefiliaki, mo ni fatufatu, mo ni laukovi, mo ni fiamealahi, pea mo ni maveuveu. 21E au tuania, i taku tau atu, naa toe fakamalaloi au e toku Atua i okotou mua, pea ke au tagi anai o uhiga mo he kaugamalie o natou ae nee agahala i mua, pea nee heeki fakahemala ki te aga uli, mo te faifeauaki, pea mo te u mea fakalialia fuli ae nee natou fai.
ទើបបានជ្រើសរើសហើយ៖
Lua tohi a Paulo ki te kau KOLINITO 12: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland