Marko 9
9
Yesu kagaluswa lukuli kudigongo
1Kawalongela, “Ihoko nomulongelani, bahano hana wanhu wemile, na hewo honda wailanze ifa ngʼo, kikomo vonda wawone undewa wa Mulungu uhamala kwiza na mhiko.”
2Vizibitile siku sita, Yesu kamsola Petro, Yakobo na Yohana, kakwela hamonga nawo kudigongo tali waliyeka hakifiso. 3Kagaluka lukuli lwake hameso gawo; zija nguwo zake zikala nzelu nghani, zomelemeta, haduhu galu muisi yonda yadahe kuzisunha zingʼale kamba vija. 4Walawilwa na Eliya hamonga na Mose, wakala walongelela na Yesu. 5Petro kananula mulomo, kamulongela Yesu, “Mkulufunzi, hano hanoga kukala tweye; na tuzenge vibanda vidatu, kimonga chako, kimonga cha Mose, na kimonga cha Eliya.” 6Na heyo hamanyile diyalongile, kilumbo wengilwa na kingwaya kikulu. 7Imalabaho hakala na wingu, diwagela kiziza, na dizwi dilawa muna diwingu dilonga, “Yuno yuyo Mwanangu inogele, mtegelezeni yuyo!” 8Mhunde vuwalolile kuno na kuno, hawawene munhu komu Yesu yaiyeka hamonga na hewo. Eliya kamala koneka 9Vuwakalile wohulumuka kudigongo, kawagomesa sukuwampetele munhu wowose gawawene, komu aho Mwana wa Munhu vondayamale kuzuswa kulawa kwa wafile. 10Wadigoga longa dino na kwiuzagiza wawo kwa wawo, “Ako kuzuswa kulawa kwa wafile, mzoko wake choni?” 11Wamuuza walonga, “Wana Nzuma wolongaze, imwandama Eliya yalongole kwiza tanhu?” 12Kawalongela, “Wona, Eliya kolongola kwiza yavihindule vyose viwe vya sambi; komu Mwana wa Munhu kandikilwaze, kamba yagaduswe nghani na kulemwa? 13Avo nomulongelani, Eliya keza kamala, na hewo wamsanghanila gose gawatendile, kamba viyandikilwe.”
Mmhale yavagalwe
14Vuwezile kwa iwanahina, wajona dale da wanhu bwando diwabiduke; na hewo Wananzuma wakala baho, wokibamilila nawo. 15Mhunde dale jose vidimonile, wasinhuka, wamgendelela mbwisa, wamulamusa. 16Kawauza, “Mokibamilila choni?” 17Imonga wa waja iwanhu kamwidika, “Mkulufunzi, nimgala mwanangu kumwako, kana mzuka wa bubuwi. 18Na kamba uhamgoga, womkunhizakunhiza kwa mhiko, na heyo kolava hovu na kugegeda meno, imala lukuli lwake lonyala; na niye niwapembela wanahina wako wauwinge uno mzuka, komu hawadahile.” 19Yesu kawedika, “Mweye wa ulelwa ulekile kumgoga Mulungu! Nokala hamonga na mweye vino na kwahi? Niwazaganye vino na kwahi? Mgaleni hano hanili!” 20Wamgala hamwake. Na heyo viyamonile, mhunde umzuka umvagala, umbwanha hasi, kagalagala yolawa hovu. 21Yesu kamuuza itata wa ija mmhale, “Hivo kasonga zuwaki?” Kalonga, “Kulawa unghele wake. 22Miyanza bwando umbwanha hamoto hebu mmazi, giladi umkome; komu uhadaha kinhu, tutaze utonele bazi!” 23Yesu kamulongela, “Uhadaha kunhamanila; gose godahika kumwake yonhamanila.” 24Mhunde baho tata wa ija immhale kalila kuno yolonga, “Notamanila, unhaze niye nili bule nhamanilo!”
25Yesu viyawene wanhu bwando vuwommemela chambwisa, kaukomhokela uja umzuka imchapalisi, kaulongela, “Gweye mzuka wa bubuwi na kihuli, nokulagiza umulawe yuno, sukuumwingile kabili!” 26Baho yagutile, umkenhezakenheza kwa mhiko, umulawa; na heyo koneka kamba kafa, avo wanhu bwando walonga, “Kadanganika.” 27Komu Yesu kamgoga mkono, kamnyagamula; baho kema wima.
28Yesu viyengile mngʼanda, wanahina wake wamuuza vu-wakalile waliyeka, “Habali tweye hatudahile kuwinga mzuka uja?” 29Kawalongela, “Mizuka igambile uja haidahika kulavigwa komu kwa mhiko za kupula na kuleka kuja.”
Migazo ya Kristo, langulizo lwekabili
30Wahalawa haja, watembela mgatigati ya Galilea. 31Na heyo halondile munhu yavimanye kakwahi; kilumbo kakala yowalangukiza wanahina, kawalongela, “Mwana wa Munhu kogeligwa mmakono ga iwanhu, na hewo womkoma; komu yahamala kukomigwa, zihabita siku ndatu kozuka.” 32Na hewo hawadimanyile longa dino, kabili wadumba kumuuza.
Kuwinza ukulu
33Vuwavikile Kapernaumu na kwingila mngʼanda, kawauza, “Mnzila mkala mkibamilila choni?” 34Wanyamala, kwa mzoko wakala wokibamilila mnzila wawo kwa wawo, kamba yalihi yondayawe mkulu? 35Kakala hasi, kawakema waja umulongo umwe na wabili, kawalongela, “Munhu yahalonda yawe kilanja, vigamba yaibweze kuchugu kwa wayage wose, yawasanghanile.” 36Imalabaho kasola chana, kakimiza wima hagatigati yawo, kamfagatila, kawalongela, 37“Munhu yonda yambokele chana kimonga kigambile kamba kino kwa kilumbo changu, avo kambokela niye; na munhu yahambokela niye, hambokele niye bule, kambokela Yuja Yangalile.”
Kugomesa munhu lilingwa
38Baho Yohana kamulongela, “Mkulufunzi, tumona munhu yowinga mizuka kwa twaga jako, komu hailongoza na tweye, na tweye tumgomesa, kilumbo haikoleleza na tweye.” 39Yesu kalonga, “Sukumumgomese, kilumbo haduhu mwene kutenda mhiko kwa twaga jangu, imala mhunde yadahe kunilonga gehile. 40Kilumbo munhu yalekile kwihasanya na tweye, kaiduganya na tweye. 41Na munhu yonda yamngʼwezeni mweye kikata cha mazi kilumbo mwa wanahina, ihoko nomulongelani, kitumetume chake honda chage ngʼo.
42Bali munhu yonda yamuhonze imonga wa wano iwadodo wonhamanila, vokuwa goya nghani yahabasikwa muugosi dibwe kulu da kusagila, imalabaho yakutuligwe mbahali. 43Kamba mkono wako uhakuhonza, uukanhe; kilumbo vonoga kumwako kwingila hali uugima, kuno ulemale, sembuse uhawa na mikono mibili, kwiza wingile hali umoto hauvuvuwalaga. 45Na mgulu wako uhakuhonza, ukanhe, kilumbo vonoga kumwako kwingila hali ugima uli bulugwa, sembuse uhawa na migulu mibili, kwiza wasigwe mkolongo da umoto. 46Aho mngʼonyo mwene kulumiza hafaga, kabili aho umoto hauvuvuwalaga. 47Na siso jako dihakuhonza, dingʼole ujase kutali, kilumbo vonoga kumwako kwingila muundewa wa Mulungu mwene gele, sembuse uhawa na meso gako mabili, kwiza wasigwe mkolongo da umoto. 48Aho mngʼonyo mwene kulumiza hafaga, kabili aho umoto hauvuvuwalaga.
49Kilumbo mkele wa kumkolela munhu wowose (kamba nhosa) uwo umoto. 50Mkele unoga; komu mkele uhawa bule ukolelo, chogeligwa choni, kileka ukolele? Muwe na mkele mmiyoyo yenu; mwange sesa, mkale na tindiwalo!”
ទើបបានជ្រើសរើសហើយ៖
Marko 9: ZAM75
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Zaramo © United Bible Societies, 1975.