Sanghano 9
9
Saulo kachola Damasko; Kagaluka msindi wa Kristo
1Komu Saulo kabanza kuwadumbiza wanahina wa Mndewa, yogesa kuwakoma. Kamgendela Mtambika Mkulu 2na kulonda yamwinghe baluwa za lwamu, zandikigwe kwa Wakulu wa Kiyuda hiko Damasko, yachole nazo, giladi yahawona wanhu wa nzila ino, wambigalo na watwanzi, yawadaze na kuwagala Yerusalemu.
3Viyakalile yochola, yokwenhukila behi na Damasko, mhunde kamwemweselwa hosehose mulangaza behaa kulawa kuulanga. 4Kebwanha hasi, kahulika dizwi dimulongela, “Saulo, Saulo, habali unigaza?” 5Kedika, “Uli nani gweye Mndewa?” Kalonga, “Niye nene Yesu gweye uminga. 6Komu inuka wingile kukiwambo, na gweye kolongelwa gagambile kusanghana.”
7Na waja wanhu wacholile nayo hamonga, wema budaga, wadihulika idizwi, imunhu hawamonile. 8Saulo kenuka hasi; na meso gake viyagabunhule, hachonile kinhu; wamgoga mkono, wamgala kuvika Damasko. 9Kakala mazuwa madatu halola, haja wala hangʼwa.
10Baho Damasko kukala na mwanahina tagwa jake Anania; ayo Mndewa kamulongela muna zinzozi, “Anania!” Kedika, “Niye hano, Mndewa.”
11Mndewa kamulongela, “Inula uchole ugoge nzila ikemagwa Igoloke, ukauze mngʼanda ya Yuda munhu yokemigwa Saulo wa Tarso, lola yahalipula. 12Heyo kamona munhu tagwa jake Anania kengila, kamwikila mikono uchana mmwake, yalole kabili.”
13Anania kedika, “Mndewa, nigahulika ga munhu yuno kwa wanhu bwando, gehile bwando gayawatendele wangʼalile wako kuja Yerusalemu. 14Vyemela hano kanalo lwamu lulawile kwa iwakulu wa nhambiko, yawafunge wose wene kutambula tagwa jako.”
15Komu Mndewa kamulongela, “Genda tu, kwa mzoko munhu yuno kogalamka kiya kisagulwe cha kudigala tagwa jangu kwa walumwengu na watawala na wana Israeli. 16Na niye nomulagila gazo bwando jonda dimwandame kugaduswa kwa kilumbo cha tagwa jangu.” 17Anania kachola kengila muja mngʼanda, kamwika mikono, yolonga, “Ndugu Saulo, Mndewa Yesu kanhuma, heyo yakulawilile muna inzila iwizile, avo winghigwe kulola kabili, umemezwe Loho Yangʼalile.” 18Mhunde vilagala kulawa mmeso gake vinhu kamba vigome, kalola, kema wima, kabatizwa; 19kauja ugali, kagangamala. Kakukala hiko mazuwa madodo hamonga na wanahina wali hiko Damasko. 20Mhunde kampeta Yesu muna zingʼanda za nhambiko kamba heyo yuyo Mwana wa Mulungu. 21Wose wahulike wakangawala, walonga, “Siyo yuno yakalile yowagaza waja wakalile wodikema tagwa dino hiko Yerusalemu? Na hano keza kwa giladi dijo, yawadaze na kuwagala kwa iwakulu wa Nhambiko?”
22Saulo kabanza kuwa mgalu, kawagela jakamoyo Wayuda wakalile Damasko, viyosindila kamba Yesu iyo Kristo.
23Vizibitile siku bwando, Wayuda watenda msagu wamkome. 24Komu mzengwe wao Saulo kalongelwa. Wakala wamsepa hamilango ya diwambo imisi na ikilo, walole vonda wamkome. 25Baho wanahina wamsola ikilo, wamuhulumusa mulukingigo, ne heyo mkigelo mumo.
Saulo kawingwa na Wayuda, kabwela Tarso
26Saulo viyavikile Yerusalemu, kageza kwibandama na iwanahina, komu hewo wakala womdumba wose, hawavumile kamba heyo mwanahina. 27Avija Barnaba kamsola kamgala kwa Watumigwa, kawasimulila vija viyamuwene Mndewa mnzila na viyalongile nayo na viyasindile tagwa ja Yesu hiko Damasko bila ya kidumbo. 28Avo kakala hamonga na hewo muja Yerusalemu, yokwingila na kulawa chalinze yopeta tagwa ja Yesu. 29Kalonga na kwiuzagiza na Wayuda waja walawile isi za Wagriki; bali wayagwe wazahila kumkoma. 30Avo ndugu vuwagamanyile higo, wamuhilika kuvika Kaisaria, wamtuma yachole Tarso.
31Avo dale da wanahina wamana kuhongela muna Uyuda mose na Galilea na Samaria, dizengigwa digendelela kwa kumdumba Mndewa, kuno jokula muna zimhumuzi za Loho Yangʼalile.
Mbetembete Ainea kahona; Tabita kazuswa na Petro
32Petro viyakalile yozunguluka ngʼambu zose, kawavikila wanahina wakalile Lida. 33Kamona munhu hiko, twaga jake Ainea, hiyo katambalala mulusazi miyaka minane, viyakalile mtamu wa lunyondenyonde. 34Petro kamulongela, “Ainea, Yesu Kristo kokuhonya. Inuka, utandikile mwenyecho!”
Mhunde kenuka. 35Wanhu wose wakalile Lida na Saroni wamona, wamuwinza Mndewa.
36Aho Yafa kukala na mwanahina wa kitwanzi, tagwa jake Tabita, kihindukizo chake Dorkasi, iyo Mnokela; mtwanzi yuno kakala yamemile masanghano ganogile na nhosa ziyalavile. 37Siku zija kakala mtamu, avija kadanganika; na vuwamalile kumsunha, wamwika kuna digala. 38Kiwambo cha Lida vikikalile behi na Yafa, kileka wanahina waja wahulika kamba Petro kakuko, wawatuma wanhu wabili kumwake kumpembela, sikuyakawe kwiza kumwao.
39Petro kahalawa kailongoza nawo; viyavikile wamgala uchana kudigala, na wagane wose wema behi na heyo wolila, kuno womulagila zija zinghanju na zinguwo ziyasonile Dorkasi milongo ija iyakalile hamonga na hewo. 40Petro kawalava hanze wose, kafugama mavindi ula kwa ula na uja umtufi, kampula Mulungu, kalonga, “Tabita, inuka!”
Na heyo kabenzula gameso; viyamonile Petro, kagandamuka, kakala ukala. 41Kamgoga mkono, kamwinula, kawakema waja iwanahina na wagane, kamwimiza yali mgima. 42Dibwililika mkiwambo chose cha Yafa; wanhu bwando wamvumila Mndewa. 43Petro kakala hiko Yafa mazuwa dogome, mngʼanda ya munhu imonga msanghana mikwembe, tagwa jake Simoni.
ទើបបានជ្រើសរើសហើយ៖
Sanghano 9: ZAM75
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Zaramo © United Bible Societies, 1975.
