Sanghano 17
17
Usenga vuuvikile Tesalonike na Berea
1Na hewo wabita ha Amfipoli na Apolonia, wavika Tesalonike; ako kukala na ngʼanda ya nhambiko ya Wayuda. 2Paulo kamba viyazowele, kengila muja, kaiuzagiza nawo malonga ga Jandiko, kamambukiza siku ndatu za ukuhumula. 3Kawagubulila na kuwapetela kamba imwandama Kristo kugazwa na kuzuswa kulawa kwa wafile; avo Yesu yuno inimpetelani mweye kivugulo chake, yuyo Kristo.
4Wayagwe mmwanza wawo watogola, wegondanya na Paulo na Sila, hamonga na Wagriki bwando nghani wene kumdumba Mulungu, na watwanzi bwando wene nhogolwa. 5Bali Wayuda wona migongo, wawasola wanhu chaka wali bule nhogolwa, waulundiza mtinghano, watenda kimbembele hadiwambo, wawagendela wa mngʼanda ya Yasoni, wawazahila Watumigwa giladi wawagale haja haumtinghano. 6Vuwalekile kuwona, wamgoga Yasoni na wanahina wayagwe, wawakwekwesa kwa iwakulu wa idiwambo, kuno wotowa nyangi wolonga, “Wanhu wano wahindule ulumwengu wavika kuno nako; 7Yasoni kawagomela; awo wose wotenda magweka kimoso cha lwamu lwa Mtawala Kaisari, wolonga, hambwe kabaha mndewa iyagwe yokemigwa Yesu.”
8Vuwalongile higo, waudinghula uja mtinghano na iwakulu wa idiwambo. 9Na hewo wamgobanya Yasoni yalihe kanda ja Mhazi, wamuleka heyo na wayage wachole na zawo.
10Baho wanahina wawahilika Paulo na Sila ikilo, wavike Berea.Vuwavikile hiko, wengila mngʼanda ya nhambiko ya Wayuda. 11Na wanhu wano wakala wagolo kubanza waja wa Tesalonike; wadibokela dija dilonga kwa uholo wa moyo na kuwalanga gandikigwe mazuwa gose, wolola kamba magweka higo vivo gali. 12Wanhu bwando mmwanza wawo watogola, hamonga na watwanzi na wambigalo bwando wa Kigriki wene nhogolwa. 13Bali Wayuda wa Tesalonike vuwahulike, kumbe mbuli ya Mulungu yopetigwa na Paulo hiko Berea, wavika hiko nako, wawagadusa wanhu na kuwadinghula vivija. 14Mhunde hiyo iwanahina wamuhilika Paulo, yachole yavike mhwani; bali Sila na Timoteo wasigale kuko. 15Waja wamuhilike Paulo wamgala kutali kudiwambo ja Atene; na vuwabwelile, Paulo kawalagiza Sila na Timoteo weze chambwisa, sikuwakawe kumuwinza; na hewo wachola.
Paulo kapeta mbuli za Yesu hana Areopago, Atene
16Paulo viyakalile Atene yowabeta, kehilwa mmoyo mmwake, yolola luto lwa wambo dija vidimemile vinyago. 17Kawauzagiza Wayuda na wene kumdumba Mulungu mngʼanda ya nhambiko, na kulonga na waja weyetinghane nawo hagulilo mazuwa gose. 18Komu walangulizi wayagwe wakemagwa Waepikureo na Wastoiko wene fiyuko, waiuzagiza nayo. Wayagwe walonga, “Mwehu yuno kolonda kulonga kilihi?” Wayagwe walonga, “Kokoneka kamba mbwililisa kiloto cha milungu yungwa!” – kwa mzoko kakala yosimulila kivugulo cha Yesu na Kuzusigwa. 19Baho wamsola, wailongoza nayo hanhu hakemagwa Areopago, walonga, “Che, todaha ku-tanga mzoko wa fiyuko zino za sambi ziulonga? 20Kilumbo kogala viloto yungwa mmagutwi getu; tolonda utulongele gweka dino konda dizigilile?” 21Kilumbo wenekaye wose wa Atene na wahenza wavikile muja, kibanzile chowokala wasulukila, iko kulonga hebu kutegeleza ga isambi.
22Paulo kema hagatigati ya Areopago kalonga, “Mweye wanhu wa Atene, hose hose nomonani mweye vumtambikila milungu nghani. 23Kwa mzoko vinghalile nibita hiko na hiko na kulola hanhu bwando ha nhambiko zenu, niyona meza yandikigwa malonga gano, Kwa mulungu hatangike; avo niye nowapetelani viloto vyake heyo, mweye momtambikila hamumtangile. 24Mulungu yausanghane ulumwengu na vinhu vyose vili mumo, hakala muna zingʼanda zizengigwe na makono ga wanhu, kwa mzoko yuyo Mndewa wa ulanga na isi. 25Wala hasulukila vinhu vya kugolelwa na wanhu visanghanwe nawo, kilumbo yuyo yowagwelela wose ugima na mhumuzi na vinhu vyose.
26Na heyo kiyasanghane, ngholo zose za wanhu zilawa mwa munhu yumwe, kawengha kukala kose muisi zose; imala avija viyanogelwe aho ichanduso, kawekila kikomo cha mazuwa gawo, kawakanhila kizigililo cha ukazi wawo. 27Giladi wamzahile Mulungu, kuno wonyaluka-nyaluka wamone; wala mmwanza wetu tweye haduhu imonga, Mulungu yamkalile hamwande. 28Kwa mzoko mgati mmwake Heyo tokula, tochola na kukala, kamba vija Mfunga lwila viyalongile kumwenu, Tweye wose twa ulelwa wake. 29Avo ihawa tweye wose welesi wa Mulungu, havigambile kugelegeza Ulungu wake ugalamke mgano wa zahabu hebu mhiya hebu mabwe, vinhu visongoligwe kwa sanghana na fiyuko za wanhu.
30Basi imiyaka ija ya utotwe, Mulungu ketenda kamba halola, komu vino kowalagiza wanhu wose hohose wagaluke. 31Kilumbo kaika siku yonda yamwinghe munhu yumwe iyasagule sanghana hiyo, yawataguse waulumwengu wose kwa ihoko; komu tanhu kowaswagiza wose wamtogole, kwa mzoko kamzusa kulawa kwa wafile!”
32Vuwahulike kivugulo cha kuzusigwa wafile, wayagwe watenda mchalango; wayagwe walonga, “Tokutegeleza viyagwe muna zimbuli hizo.” 33Avo Paulo kachola kawaleka. 34Wanhu wayagwe wegondanya nayo, watogola, mmwanza wawo kukala na munhu wa Areopago, yuyo Dionisio, na mtwanzi imonga twaga jake Damari, na wayagwe hamonga na hiwo.
ទើបបានជ្រើសរើសហើយ៖
Sanghano 17: ZAM75
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Zaramo © United Bible Societies, 1975.
