Sanghano 15
15
Mtinghano wa watumigwa hiko Yerusalemu
1Kukala na wanhu walawile Uyuda, wavika Antiokia, wawalanguliza iwanahina wolonga, “Kamba hamwingile kumbi, Mose viyalagize, honda mkomboke.” 2Baho Paulo na Barnaba wasongile kwiibamilila na wanhu wano, waiuzagiza nawo nghani; avo wanahina wawalalika, Paulo na Barnaba na wayagwe mmwanza wao wachole Yerusalemu kwa Watumigwa na Wavyele, kilumbo cha mkwekwe wa mbuli hiyo. 3Na hewo vuwagaligwe na didale da iwanahina, wabita isi ya Ufeniki na Samaria, wazibwililisa mbuli za walilingwa vuwamuhindukile Mndewa; wawanogeza iwanahina nghani.
4Vuwasikile Yerusalemu, wagomelwa na wanahina na Iwatumigwa na Iwavyele, wawasimulila magweka gose, Mulungu gayasanghane hamonga na hewo. 5Komu wamana kwinuka Mafariseo wayagwe wene kutogola, walonga, “Walilingwa viwandama kwingila kumbi, na walagizwe kuzigoga Nzuma za Mose!” 6Baho Watumigwa na Iwavyele welundiza hamwe, giladi wadilole goya longa hijo.
7Bamilo vidikalile kulu, Petro kema wima kawalongela, “Mowandugu zangu, mweye mvimanya kamba mazuwa gabitile Mulungu kasagula mulomo wangu, vinimulongeleni mweye, giladi walilingwa wadihulike Longa dinogile, na kuditogola. 8Mulungu mwene kutanga miyoyo ya wanhu wose kawabokela, kawasindila na kuwengha Loho Yangʼalile kamba vija viyatwinghile tweye. 9Kabili hatendile msosokanyo kumwetu tweye na wawo, kawasunha miyoyo yao kwa nhamanilo. 10Avo vilihi momgeza Mulungu kuwadwika mtwalo wanahina, viyemela tata zetu hebu tweye hatudahile kuugala? 11Komu tutamanila kukomboligwa tuhagolelwa unozi wa Mndewa Yesu, kamba waja nawo vuwali.”
12Dale jose dinyamala, wawategeleza Barnaba na Paulo wowasimulila kivugulo cha vinzonza vyose na vilolomboto viyasanghane Mulungu kwa usenga wao muna iwalilingwa.
Kizumo cha Yakobo, walilingwa sikuwengile kumbi
13Na hiwo vuwanyamale, Yakobo kedika kalonga, “Mo-walume ndugu, nhegelezeni! 14Simoni kasimulila, Mulungu viyasongile kuwasagula walilingwa, kadigwelela twaga jake dale da wanhu nako kumwao. 15Nawo ulonzi wa Walaguzi upetaga gago, kamba viyandikigwe,
16Gano gahaziga nobwela,
nikizenge kabili kitutuwa cha Daudi kigwile;
haja habomoke nohazenga, kwiza nokinula kabili.
17Giladi wanhu wasigale wose wamzahile Mndewa hamonga
na walilingwa wose walongelwe twaga jangu.
18Vivo yalongile Mndewa yotambulilaga higo kulawa umwaka. – 19Avo niye nokona vino, Sukutuwagaze waja iwalilingwa wonda wamtogole Mulungu! 20Komu tuwandikile, wainege na ubweto wa vinyago, na ugoni na nyama zibotigwe, na mulopa. 21Kwa mzoko kulawa umwaka Mose kanawo wanhu wasimulilaga magweka gake mviwambo vyose, kabili gasomagwa mazuwa gose ga Sabato mzingʼanda za ukupulila.”
Lupwilili kwa walilingwa, miko yawo
22Baho Watumigwa na Iwavyele na wanahina wose wamana kwiduganya, kusagula wanhu wayagwe mmwanza mmwao, na kuwagala Antiokia hamonga na Paulo na Barnaba; awo iwo Yuda yokemigwa Barsaba, na Sila, wene nhogolwa mwa iwandugu. 23Wandika lupwililiso, walugala na mikono yao, “Tweye Watumigwa na Wavyele tomulamusani ndugu zetu muli hiko Antiokia, Siria na Kilikia, mulawile kwa walilingwa, hongeleni! 24Tuhulika kamba wanhu wayagwe walawile kumwetu, na tweye hatuwalagize mbuli, wamgazani kwa ulonzi, wamgelani yakayaka mmoyo. 25Avo tutwinghanila vutuli na moyo umwe, twigondanya kusagula wanhu, tuwagale kumwenu hamonga na wano wayetu wanogelwa Barnaba na Paulo. 26Awo iwo wanhu wailavile wenyego wagwaduke kilumbo cha twaga ja Mndewa wetu Yesu Kristo. 27Hamonga nawo towatuma Yuda na Sila, na hewo womulongelani wenyego malonga gago. 28Kwa mzoko imnogela Loho Yangʼalile na tweye, sikutumdwikeni mzigo kubanza uja umweneleni. 29Avo mwinege na nyama zisikigwa za nhambiko ya vinyago, sikumuje mulopa hebu nyama za kubotwa, na muleke ugoni; muhagateganya higo, mosanghana goya. Hongeleni!”
30Vuwamalile kusindikizwa wachola, wavika Antiokia; wawalundiza didale jose, wawalavila luja lupwililiso. 31Na hewo vuwamalile kusomelwa, wemozamoza kwa vija vuwagangamazwe. 32Kabili Yuda na Sila vuwakalile walaguzi wawo wenyego, wawazuma iwanahina na malonga bwando, wawagangamaza. 33Na vuwamalile kukala mazuwa madodo, wasindikizwa na wanahina, wawabwelele waja wawagalile. 34Komu Sila kanogelwa kukala kuja. 35Na heyo Paulo na Barnaba wakala kuko Antiokia, wolanguliza na kuipeta mbuli ya Mndewa, hamonga na wanhu wayagwe bwando.
Barnaba na Paulo waihagula
36Mazuwa vigabitile, Paulo kamulongela Barnaba, “Haya tubwele kabili, tukawakagule wanahina mviwambo mose muja mtupetile Longa da Mndewa, walize!” 37Komu Barnaba kalonda kumsola na Yohana yokemigwa Marko. 38Bali Paulo havonile goya kumsola hiyo yawalekile hiko Pamfilia, yalemile kuchola nawo kukazi. 39Avo dilawilila bamila, waikomhokela, wamana kwibagula; Barnaba kamsola Marko, kengila mjahazi, kachola Kipro. 40Na heyo Paulo kamsola Sila; katambikilwa na iwanahina, wamtula kwa mhiko ya unozi wa Mndewa. 41Kabita isi ya Siria na Kilikia na kuwagangamaza iwanahina.
ទើបបានជ្រើសរើសហើយ៖
Sanghano 15: ZAM75
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Zaramo © United Bible Societies, 1975.
