OVILINGA 9
9
1Saulu puãi, lopo wa kala loku lendela olondonge via Ñala loku vi salowaisa oku vi ponda. Wa enda kocitunda cinene, 2kuenje wa pinga ovikanda vioku enda lavio kolosunangonga vio ko Damasko okuti, nda o sangamo vakuanjila yaco, ci kale alume, ci kale akãi, iya lavo lovikolo ko Yerusalãi. 3Vonjila, eci a pitila ocipepi loko Damasko, ocinyi cokilu co tuila ocipikipiki. 4Oco wa kupukila posi, kuenje wa yeva ondaka ya popia laye yiti, A Saulu, A Saulu, nye o ñangisila? 5Eye hati, A Ñala, ove elie? Ondaka yiti, Ame Yesu, u o kasi loku kangisa. 6Votoka, iñila vimbo, omo va ku sapuila eci o linga. 7Alume va enda laye va kala ño ndovitende, va yeva ondaka, puãi lomue va mola. 8Oco Saulu wa votoka. Eci a patuluka ka muile cimue, oco vo kuata peka kuenje vo songuila vo Damasko. 9Oloneke vitatu wa kala omeke, ndaño oku lia ka lile, pamue oku nyua ka nyuile.
10Vo Damasko mua kala ondonge yimue onduko yaye Ananiya. Ñala wa popia laye konjoi hati, A Ananiya. Eye hati, A Ñala, ame ulo. 11Oco Ñala wa popia laye hati, Katuka, kuende koluwa lua tukuiwa Luasuñama. Ka vanje umue o tukuiwa Saulu u Tarso vonjo ya Yuda. Momo o kasi loku likutilila, 12kuenje wa mola ulume umue onduko yaye Ananiya, wa iñila, wo kapa ovaka okuti o letuluka. 13Ananiya wa kumbulula hati, A Ñala, omunu waco, va lua va sapuila ndomo a kasi loku kangisa olosandu viove vo Yerusalãi. 14Kulo o kasi lomoko yo wihiwa lovitunda vinene oku kuta vosi va tukola onduko yove. 15Puãi Ñala wa popia laye hati, Kuende ño, momo ame ndo nola. Eye o linga ocikuata coku ambatela onduko yange loku yi tuala ku vakualofeka, lo kolosoma viavo, kuenda ku va Isareli. 16Momo ame ndu lekisa ohali yosi a talela onduko yange. 17Oco Ananiya wa enda, wa iñila vonjo. Wa kapa Saulu ovaka aye hati, A manjange, a Saulu, Ñala Yesu, una wa ku tukulukila vonjila eci veya, eye wa numa kokuove okuti o letuluka kuenje o yuka Espiritu Sandu. 18Tuli a ci popia haico kovaso a Saulu kua tunda cimue ca soka ndolombande, yu wa letuluka. Oco, oku katuka, wa papatisiwa. 19Noke wa lia kuenje wa kuata vali ongusu.
Wa kala oloneke vimue kumue loloñame vio ko Damasko, kuenje 20haico muẽle a kundila Yesu volosunangonga okuti eye Mõla a Suku. 21Vosi vo yeva va komoha vati, Heyeko hẽ una wa kaile vo Yerusalãi kuenje wa kangaisa ava va tukula onduko yaco? Kuenje oco muẽle eyilila kulo okuti o va kapa kovikolo loku va tuala kovitunda vinene. 22Saulu puãi wa amamako kongusu, kuenje wa tangelekisa va Yudea va tunga vo Damasko, momo wa toñomãla okuti Yesu eye Kristu.
23Eci pa pita oloneke via lua oco va Yudea vo tumbika ongombo yoku wipa, 24puãi ongombo yaco ya yevala ku Saulu. Vo lavekela volombundi kutanya lo kuteke ha vo wipa. 25Oloñame viaye puãi via enda laye uteke, vio kapa vohumba, vio pitisa ponjanela yovocimbaka kuenje vio lowisila kofeka.
26Eci Saulu eya ko Yerusalãi oco wa soka oku litokeka lolondonge, puãi vosi vo kuatela usumba, momo ka va kolelele okuti wa linga ocili oñame. 27Puãi Barnaba wa enda laye, wo tuala kovapostolo, kuenje wa va sapuila ndomo a mõla Ñala vonjila, lomo Ñala a vangula laye. Wa va lomboluila ndomo vo Damasko a kuata ca lua utõi woku kundila vonduko ya Yesu. 28Oco Saulu wa kala lavo vo Yerusalãi kuenje wa endaenda lavo. 29Wa kuata utõi woku kundila vonduko ya Ñala. Wa vangulavo la va Helasi loku lipatãla lavo. Ovo puãi va sanda oku wipa. 30Eci vakuetavo va ci limbuka oco vo tuala ko Kaisarea kuenje vo tuma ko Tarso.
31Ekongelo lioko Yudea yosi, lo ko Galilea, kuenda ko Samária, lia linala lombembua kuenje liamamako. Lia endela vonjila yoku sumbila Ñala loku kolisua le Espiritu Sandu, kuenje lia vokiyiwa.
32Oco, eci Petulu a kala loku ñuala ñuala kuosi, weyavo kolosandu via tunga ko Luda. 33Oko a sanga ulume umue onduko yaye Ainea, wa kala pula anyamo ecelãla, momo wa fa ovolu. 34Petulu wa popia laye hati, A Ainea, Yesu Kristu wa ku kayisa. Votoka. Yalula ula wove, kuenje haico a votoka. 35Vosi va tunga ko Luda lo ko Sarona vo mola kuenje va pongolokela ku Ñala.
36Vo Yopa mua kala ondonge yimue yukãi, onduko yaye Tavita, ca lomboloka citi, Kambambi. Eye wa kala ukuahenda, kuenje wa kuatisa va lua. 37Oco koloneke viaco wa vela yu wa fa. Eci vo sukula vo langeka vonjo yosapalalo. 38Omo ko Luda ocipepi lo ko Yopa, oco olondonge via yeva okuti Petulu oko a kasi, kuenje vo tumisa alume vavali oku u pañinya vati, Enju lombili. Ku ka taluke. 39Oco Petulu wa katuka yu wa enda kumue lavo. Eci a pitila va enda laye vonjo yosapalalo. Ovimbumba viosi vio ñuala, via lila kuenje vio lekisa uwalo lasanya osi Kambambi a tongele osimbu a kala kumue lavo. 40Petulu puãi, eci a va tundisamo vosi, wa kekama kolongolo, kuenje wa likutilila. Oco, oku pongolokela kocivimbi, wa popia hati, A Tavita, pasuka, kuenje eye wa patuluka. Eci a mola Petulu, wa tumala, 41kuenje Petulu, oku u kuata peka, wo votola. Eci a kovonga olosandu lovimbumba, oco wa weca kokuavo lomuenyo. 42Ondaka yaco ya yevala kuosi ko Yopa, kuenje va lua va tava ku Ñala. 43Oco Petulu wa kala oloneke via lua vo Yopa, wa singa vonjo ya Simono uyaveki wovipa.
ទើបបានជ្រើសរើសហើយ៖
OVILINGA 9: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.
