OVILINGA 2
2
1Eci eteke lia Pendekoste lieya va kala vosi kumuamue. 2Kuenje, ocipikipiki, kilu kua tunda ocileñi ndokuõla kuocipepe ca tema, yu ca yukisa onjo yosi omu va tumala. 3Kua va tukulukila alimi a setahala ondalu, kuenje a lisandola loku va vata omunu omunu. 4Oco va yukisua le Espiritu Sandu, kuenje va fetika oku vangula alimi aiñi aiñi, ndeci Espiritu Sandu a va iha oku popia.
5Vo Yerusalãi mua kala va Yudea, vakuakusumbila Suku, va tunda kolofeka viosi viovemi lilu. 6Oco, eci ocileñi caco ca yevala, owiñi wa liongolola, kuenje va lisalukako, momo va va yeva va popia alimi avo omunu omunu. 7Oco va lisalukako, kuenje oku komoha, va linga vati, Avoyo, ava va vangula ndeti, vosi hẽ, ha va Galileako? 8Kuenje etu tu yeva ndati, omunu omunu elimi liaye a citiwa lalio? 9Etu tu va Partia, la va Media, la ve Elame, lolonungi vo Mesopotamia, lo vo Yudea, lo vo Kapadokia, lo vo Pondu lo ka Asia, 10lo vo Frugia lo vo Pamfulia lo ve Egito lo volofeka via Libia evi vi lisungue la Kurene, akombe vo ko Roma, va Yudea lolomongoloke viaco, 11va Kurete la va Arabia, tu yeva ndomo va vangula ovilinga vinene via Suku valimi etu. 12Kuenje vosi va lisalukako, loku komoha, kuenje va livangula pokati vati, Eci hẽ, ca lomboloka ndati? 13Puãi vakuavo va sevula vati, Va kolua ovinyu vi sosa.
14Puãi Petulu wa talama vilu kumue lekui liaco lamosi, kuenje, oku popia lolukandi, wa va kundila ondaka, hati, Alume va Yudea, lene vosi wa tungi vo Yerusalãi, yeveleli olondaka viange. Cu lomboloki okuti, 15alume ava ka va koluele ndeci wa soki, momo cilo handi ocitalakumbi. 16Puãi eci, oco cina ca popia uprofeto Yoeli, hati,
17Suku hati, Koloneke vi sulako,
ndi sukumuila Espiritu liange komanu vosi.
Omãla vene valume lomãla vene vakãi va imba owanji.
Amalehe vene va mola ovinjoinjoi,
lolosekulu viene vi lota olonjoi.
18Koloneke viaco, ndi sukumuila Espiritu liange,
kakuenje lo kafeko vakuopange,
kuenje va linga ovaprofeto.
19Ndekisa ovikomo kilu,
kuenda ovilimbu posi, okuti
osonde londalu kuenda ombundu yowisi.
20Ekumbi li pongoloka owelema,
losãi yi pongoloka osonde,
osimbu eteke lia Ñala ka lieyile,
eteke liaye linene lieletuluko.
21Kuenje wosi o vilikiya onduko ya Ñala o popeliwa.
22Ene alume va Isareli, yeveleli olondaka evi: Yesu u Nasara, ulume una Suku a lombolola kokuene kuenje wo wimbila uvangi mekonda liovonene lovikomo kuenda ovilimbu Suku a linga laye pokati kene, ndeci wa ci kũlĩhi ene muẽle, 23Yesu yaco, haeye wa pakuiwa ndocipango ca Suku co tukuiwila ale, kuenje Suku wa ci kũlĩha, ene muẽle wo valelisi kekulusu, kuenje wo wipaisi lovaka omanu ka va kasi lovihandeleko. 24Puãi Suku wo pindula, wa kutulula ovikolo viokufa, momo ka ca tẽliwile eye oku pandekiwa lakuo. 25Momo Daviti wo tukula hati,
Oloneke viosi ndukuakumola Ñala kovaso ange.
Omo eye o kasi kondio yange, si sengiwa.
26Oco utima wange wa sanjuka, lelimi liange lia yolela.
Etimba liange laliovo li puyukila velavoko.
27Momo ku si omuenyo wange vonjembo.
Ku tava okuti U Wove o kola o futa.
28Wa njimba onumbi yolonjila viomuenyo.
O njukisa esanju omo o kala kala lame.
29Akuetu, nẽla oku tukula kukululu yetu Daviti. Eye wa fa kuenje wa kendiwa, leyambo liaye tu kasi lalio toke etaili lilo. 30Omo a kaile uprofeto, kuenje wa kũlĩha okuti Suku wa likuminya laye loku lisila okuti umue kombuto yaye o tumala kocalo caye, 31oco wa imba owanji wepinduko lia Kristu eci a popia hati, Ka siwa vonjembo, ndaño etimba liaye ka li futi. 32Yesu u-u, Suku a pindula, etu vosi tulombangi viaco. 33Omo a yeluiwa londio ya Suku, lomo a tambula ku Isia ohuminyo ye Espiritu Sandu, oco wa tu sukumuila eci vu lete leci vu yevite. 34Momo eye muẽle Daviti ka londele kilu, puãi eye wa linga hati,
Ñala wa popia la Ñala yange hati,
Tumala kondio yange,
35toke ovanyali vove ndi va lingisa ociliatelo cove.
36Oco, epata liosi lia Isareli li limbuke okuti ocili, u Yesu, una ene wa valeli kekulusu, Suku wo lingisa Ñala kuenda Kristu.
37Oco, eci va ci yeva va tomiwa vovitima, kuenje va popia la Petulu lovapostolo vakuavo, vati, Akuetu, tu linga nye? 38Kuenje Petulu wa popia lavo hati, Ene vosi omunu omunu, likekembeli akandu ene, papatisilui ongecelo yakandu vonduko ya Yesu Kristu, oco vu mola ocali ce Espiritu Sandu. 39Momo ohuminyo yaco ya likuminyiwa kokuene lo komãla vene kuenda ku vosi va kasi kupãla, okuti vosi ava Ñala Suku yetu a kovonga. 40Yu wa imba uvangi lolondaka via lua vikuavo, kuenje wa va peya, hati, Lipopeli kocitumbulukila eci cehungu. 41Oco, ava va tava kondaka yaye va papatisiwa, kuenje eteke liaco kua vandeka ca soka ndolohũlũkãi vitatu viomanu. 42Kuenje va pandakaisa oku yeva ovilongua viovapostolo, Kuenda kongongela yavo, loku timbula ombolo, kuenda koku likutilila.
43Usumba wa kuata omanu vosi. Ovikomo via lua lovilimbu via lingiwa lovapostolo. 44Vosi va tava va kala pamuamue, kuenje va litepaila ovina viosi. 45Va landaisa ovikuata viavo lovina vikuavo va fuka, kuenje va vi liamuila pokati kavo vosi ndeci umue a kamba. 46Eteke keteke va endaila pamosi vonembele. Volonjo viavo va timbowaila Pamosi ombolo. Va lia lia okulia kuavo lesanju lesunguluko liutima. 47Va endaenda loku sivaya Suku kuenda oku kala ciwa lomanu vosi. Kuenje eteke keteke Ñala wa vokiya kongongela yaco ava va popeliwa.
ទើបបានជ្រើសរើសហើយ៖
OVILINGA 2: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.
