I VA KORINDO 7
7
1Kaliye kolondaka wa soneheli, ciwa nda ulume ka lambi ukãi. 2Puãi, omo eyonjo liukahonga lia siata, oco ulume a kale lukãi waye muẽle, kuenda ukãi a kale la veyaye muẽle. 3Ulume a lingainge lukãi eci co sesamela, lukãi haico la veyaye. 4Ukãi ka kuete ocipango coketimba liaye, te veyaye. Haico ulume, ka kuete ocipango coketimba liaye, te ukãi waye. 5Ko ka litinduki, te nda wa ci likuminyi pokati okasimbu ho pindamui loku likutilila. Noke wu litokeka vali, sanga Satana u yonji mekonda lioloñeyi viene. 6Eci ndi ci popia ño, haku handelekako. 7Hise puãi nda omanu vosi va kaile ndame. Haimo lumue, vosi omunu omunu o kuete ovituwa viaye via tunda ku Suku, u ceci, u ceci.
8Mopia lava ka va kuelele handi, lovimbumba siti, Co posokeli oku kala ndame. 9Puãi, nda ka ci tava oku likandangiya, hise oku kuela. Ca velapo oku kuela, oku sakalala ño loloñeyi hacoko.
10Mopia lava va kuela ale, puãi hameko ndi ci popia, te Ñala, okuti ukãi ka ka nyuhe ku veyaye. 11Nda o nyuha, ka ka kuele, te oku linala la veyaye. Haico ulume, ka ka nyale ukãi waye.
12Vakuavo mopia lavo ame, Ñala heyeko. Ukuetavo nda o kasi lukãi hokuetavoko, kuenje ukãi o tava oku kala laye, ka ko nyale. 13Ukãi, nda o kasi lulume hokuetavoko, kuenje ulume o tava oku kala laye, ka ka sie veyaye. 14Ulume hokuetavoko o kola mekonda liukãi waye. Ukãi hokuetavoko o kola mekonda liulume waco ukuetavo. Nda hacoko omãla vene nda va vĩha, cilo puãi va kola. 15Puãi, nda u hokuetavoko o yongola oku tepako, a tepeko. Ulume ukuetavo pamue ukãi ka pandekiwile lovitangi viaco, momo Suku wa tu kovongela ombembua. 16Ove wukãi wa kũlĩha ndati nda o popela veyove? Love, wulume, wa kũliha ndati nda o popela ukãi wove?
17Cinene ceci, omunu omunu a kale lomuenyo waye, ndowu Ñala o wiha, haiwo Suku o kovongela. Eci oco ocihandeleko cange vakongelo osi. 18Kuli umue okuti wa kovongiwa tupu wa seviwa ale? Nda kuli, ka ka nyõle amome evamba. Kuli umue okuti wa kovongiwa tupu ociyamba? Nda kuli, ka ka lisevise. 19Evamba hacimueko, uyamba hacimueko, te oku pokola kovihandeleko via Suku. 20Omunu a kale ndeci a kovongiwa laco. 21Eci wa kovongiwa wa kala hẽ upika? Ka ci ka ku vale. Puãi nda ci tava oku yovoka, kuatako. 22Momo u wa kovongiwa la Ñala osimbu a kasi upika, eye omãmãle wa Ñala. Haico, u wa kovongiwa eci a kasi omãmãle eye upika wa Kristu. 23Wa landiwi londando. Ko ka lingi apika vomanu. 24Oco a vamanji, vomangu omunu a kovongiwila, haimo a tumala la Suku.
25Kondaka yava ka va kuelele si kuete handi ocihandeleko ca tunda ku Ñala. Ndekisa ño ocisimilo cange ndu wa kolelua omo Ñala wo linga ohenda. 26Ame nda sima okuti, omo tu kasi lohali, oco hise nda omunu o kala ño ndomo a kasi. 27Wa pandekiwa kukãi? Ku ka sande oku panduluka. Kua kuelele handi? Ku ka sande ukãi. 28Puãi nda o kuela, ku lingi ekandu. Lufeko nda o kuela ka lingi ekandu. Haimo lumue, ava va kuela va laika oku tala ohali yoketimba, kuenje oco muẽle njonguila oku u puluisi. 29A vamanji, onimbu yeci ñasi loku popia yeyi, Oloneke via tu tukuiwila via linga vimbumbulu. Oco, tunde cilo, ava va kuete akãi va linge ndava ka va kuete, 30lava va lila va linge ndava ka va lili, ava va yolela va linge ndava ka va yolela, ava va landa va linge ndava ka va kuete, 31ava va sakalala lovina violuali va linge ndava ka va kuete cimue laluo. Momo, oluali ndomo lu kasi cilo, lu kasi loku imuha.
32Njongola okuti ka vu kala lolohele viaño. Ulume ka kuelele o sakalala levi via Ñala, loku sanjuisa Ñala. 33Ulume wa kuela puãi, o sakalala levi violuali loku sanjuisa ukãi waye. 34Oco, utima waye wa litepa. Ukãi ka kuelele, pamue ufeko, wa sakalala levi via Ñala loku sokolola ndomo va tẽla oku kola ketimba lo kespiritu. U wa kuela o sakalala levi violuali loku sanjuisa veyaye. 35Eci ndi ci popela oku u kuatisi, oku u kuti hacoko, kuenda oku u wihi ocimaho cesunga loku u vetiyi okuti vu vumba Ñala lutima wosi, u wa tepiwa hawoko.
36Puãi umue nda wa soka okuti ka kasi loku linga ciwa lufeko waye, ca piãla nda etimba li kasi oku u sakalaisa, okuti oku likandangiya ka ci tava, a linge ndeci a yongola, va kuele, hekanduko. 37Puãi u wa kolapo vutima waye, kuenje ka kuete eci cu veta onjanga, haeye o tẽla oku likandangiya, kuenje wa panga vutima oku kala ño lufeko waye, o linga eci ca sunguluka. 38Oco u o kuela ufeko waye o linga esunga, lu ka kuela ufeko waye o linga eci ca velapo.
39Ukãi wa pandekiwa osimbu veyaye a kasi lomuenyo. Nda puãi veyaye wa fa ukãi o panduluiwa okuti ci tava oku kueliwa lu a yongola, puãi te oku kueliwa vu Ñala. 40Puãi o sumũlũha ca piãla nda o kala ño omo, oyo onimbu yange. Kuenje nda soka siti, Ñasivo le Espiritu lia Suku.
ទើបបានជ្រើសរើសហើយ៖
I VA KORINDO 7: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.