I VA KORINDO 1
1
1Ame ndi Paulu, haime nda kovongiwa locipango ca Suku oku linga upostolo wa Yesu Kristu, kuenda manjetu Sositene,
2tu sonehela ekongelo lia Suku li kasi ko Korindo, okuti ava va kola vu Kristu Yesu, haivo va tukuiwa olosandu kumuamue la vosi kuosi va kasi, ava va vilikiya onduko ya Ñala yetu Yesu Kristu, eye Ñala yavo haeye Ñala yetu.
3Ocali lombembua yi tunda ku Suku Isietu lo ku Ñala Yesu Kristu yi kale lene.
4Ndu panduili ku Suku yange olonjanja viosi mekonda liocali ca Suku co wihiwi vu Kristu Yesu. 5Momo kovina viosi, okuti kolondaka wa popi, kuenda kukũlĩhiso, vokuaye omo wa lingilui olohuasi, 6ndeci uvangi wa imbiwila Kristu wa linga ocili pokati kene. 7Oco cilo, lacimue ocali c'Espiritu co kambeli osimbu vu kasi loku felevela etukuluko lia Ñala yetu Yesu Kristu. 8Eye o wihi ongusu toke kesukiyo, okuti vu pua atondelo keteke lia Ñala yetu Yesu Kristu. 9Suku, u wo kovongeli kongongela y'Omõlaye Yesu Kristu Ñala Yetu, ukuacili.
10A vamanji, ndu peyi londuko ya Ñala yetu Yesu Kristu okuti, vosi wu popia popia cimuamue. Pokati kene ka pa ka kale olonepele, puãi likuati omunga lutima umuamue lolondunge vimuamue. 11Momo, a vamanji, va Koloe va sapuila okuti pokati kene pali oku liyenja. 12Eci ñasi loku lombolola ceci, siti, Pokati kene, u hati, Ame ndukua Paulu, ukuavo hati, Ame ndukua Apolosi, ukuavo hati, Ame ndukua Kefa, lukuavo hati, Ame ndukua Kristu. 13Kristu wa litepa nga? Paulu he, wo valeliwili kekulusu? Wa papatisiwili hẽ, vonduko ya Paulu? 14Mandula Suku omo sia papatisile umue pokati kene te lika Krispo la Gaio, 15sanga umue o popia okuti, wa papatisiwila vonduko yange. 16Nda papatisavo vakuanjo ya Stefana. Nda nda papatisa vali umue si civaluka. 17Momo Kristu ka numile oku papatisa, te oku kunda ondaka yiwa, kuenje haku yi kundako lolondunge violondaka, sanga ekulusu lia Kristu li sepuiwa.
18Kuava va kasi loku nyõleha, ondaka yekulusu uveke, puãi kokuetu tu kasi loku popeliwa, ondaka yaco unene wa Suku. 19Momo ca sonehiwa okuti,
Nyõla olondunge via vakualondunge.
Nyimula okulunguka kuava va lunguka.
20Ukualondunge o kasi pi? Ukuavisonehua o kasi pi? Ukualonamalala violuali lulo o kasi pi? Suku ka sepuisile hẽ, olondunge violuali lulo? 21Momo, omo olondunge violuali ka via lu kũlĩhisile Suku, oco Suku, lolondunge viaye, wa panga okuti ava va tava o va popela luveke weci tu kunda kunda. 22Momo va Yudea va pilaika olondimbukiso, va Helasi va sanda olondunge. 23Etu puãi, tu kunda kunda Kristu u wa valeliwa kekulusu. Eci, ku va Yudea, ci linga ocilondokua, ku vakualofeka, ci linga uveke. 24Puãi, kuava va kovongiwa, nda va Yudea, nda va Helasi, ca va lomboloka okuti Kristu eye unene wa Suku, haeye olondunge via Suku. 25Momo uveke wa Suku wa piãla olondunge viomanu, loku leñela kua Suku kua piãla olohõlo viomanu.
26A vamanji, sokololi okukovongiwa kuene. Pokati kene, ka va luile vakualondunge ndeci oluali lu tenda olondunge, ka va luile vakuonene, ka va luile olombuale. 27Puãi Suku wa nola ovina viuveke violuali ha kutisa lavio osõi vakualondunge. Suku wa nola ovina via leñela violuali ha kutisa osõi evi via kola. 28Levi viaño violuali, levi via tombiwa, Suku wa vi nola. Ndaño evi ka viko wa vi nolela oku kutisa osõi evi vi kasi. 29Oco lomue ukuetimba ka ka lipande kovaso a Suku. 30Eye ono yomuenyo wene vu Kristu Yesu, una Suku a lingisa olondunge vietu, lesunga lietu, lokukola kuetu, leyovo lietu. 31Oco, ndomo ca sonehiwa okuti, u o lipanda a lipande la Ñala.
ទើបបានជ្រើសរើសហើយ៖
I VA KORINDO 1: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.