Mako 15
15
Jesu la Ntundu ka Pilata
(Mat. 27:1-2, 11-14; Luk. 23:1-5; Joa. 18:28-38)
1Kʼolomo la pindju, elombedi a waki, dikumanyi, afundji, la ului wʼembadi tshe wakasangi lulimi. Vo wakakeleka Jesu, wakatshu la ndi, wakukimo le Pilata. 2Ku Pilata akawumbula ati: We keli Khumʼekanga kʼasi Juda? Jesu akûkaluya diui ati: Wemʼoso ata. 3Elombedi a waki wakosongwela akambu efula. 4Pilata akawumbula ntu ati: Undi, we hakaluya nduku diui? Uhulunga efula kʼakambu keso kakosongwelawo! 5Keli Jesu kumbukaluya nduku diui ntu. Okone Pilata akambi.
Jesu Kuyanga Barabasi
(Mat. 27:15-26; Luk. 23:13-25; Joa. 18:39—19:16)
6Lu dambu Pilata aki la etshelu ka nkimwela antu usi lukanu omotshi lalombawo. 7Untu omotshi, lakawetaka vati: Barabasi, aki lu lukanu, ukelekami la akina wakatomboko kame la ndi. Vo wakadiaki antu lʼetombokwelo kawo. 8Ului wʼantu wakatshu, wakôlombe vati: Ututsheli uku atuyututshelaka. 9Ndi akawambula ati: Undi, nyu hanyulangi dimi nyutshungwela Khumʼekanga kʼasi Juda? 10Ndi akeyi ati: Uma lu kandjema mbakukimo elombedi a waki. 11Keli elombedi a waki wakatombosha ului wʼantu, dia vo mvuta vati: Ututshungweli Barabasi, 12Pilata akâkaluya diui ati: Ku ntsheli one letanyu nyati: Khumʼekanga kʼasi Juda na? 13Vo wakahangohango ntu vati: Udiaki lʼutamba a mpeketanya. 14Pilata akawambula ati: Dikambu diakona, kolo kakona kutshendi? Keli vo vakatamanya mpangohango vati: Udiaki lʼutamba a mpeketanya! 15Pilata akalangi munduya saki kʼului wʼantu. Okone ndi akatshungwela Barabasi. Ku ndi akakomola Jesu, akukimo dia vo mbudiaka lʼutamba a mpeketanya.
Wambosoka Jesu
(Mat. 27:27-31; Joa. 19:2-3)
16Alimbi wakatshu la ndi lʼetei a luudu lʼumbadi (letawo vati: Luudu lʼelumbwelu); waketana ului awo tshe. 17Vo wakalotsha Jesu ukutu wa tilili, wakele lufule lʼatende, wakulimbelo. 18Vo wakawemula vati: Moyo, Khumʼekanga kʼasi Juda! 19Vo wakokomola uhamba lʼote, wakohongwela soi, wakakhuse adui dia mbolemia. 20Lamʼakawashili mbosoka, vo wakukulula ukutu a tilili, wakolotsha ahondo andi. Ku vo wakatshu la ndi dia ntudiaka lʼutamba a mpeketanya.
Wambuhane Jesu lu Utamba a Mpeketanya
(Mat. 27:32-44; Luk. 23:26-43; Joa. 19:17-27)
21Simona, usi Kurene shi Alesandere la Rufu,#15:21 Rom. 16:13. akayetaka, ayayi uma lʼusui. Vo wakutshutshiya dia ntemba utamba a mpeketanya wa mpane Jesu. 22Vo wakakumi la Jesu lu dihuli dietawo vati: Ngolongota (nkadimula ati: Dihuli dia lombo). 23Vo wakawusha wanu wosohanyimi la kundju, keli ndi akaseke. 24Vo wakuhane lʼutamba a mpeketanya. Vo wakuki uwali lu dikambu dia ahondo andi, dia mbeya dihondo diayuyala le untu lʼuntu.#15:24 Esam. 22:18. 25Lamʼakakumi unya lʼeshidi divwa la pindju, vo wakuhane lʼutamba a mpeketanya. 26Vo wakafundi aui ane wa mbosongwela ladiku ati: “KHUMʼEKANGA KʼASI JUDA.” 27Vo wakahane ndu apotodi ahendi laawo: omotshi lu lunya la landi la pami, la ukina lu lunya landi la lomoso. #15:27 “15:28” = nfundamaka paka la tshina dia page, aha lʼatei lu abuku amotshi. 28Ku afundelu wakashidiyama ati: Ndi akalema kame lʼandjaki wʼelembe,#15:28 Is. 53:12. 29Ambetshi a mbuka wakotenge, wasutsha ete#15:29 Esam. 22:7; 109:25. vati: Ya! We lahandjula etemwelo ndu lakahika lu nshi shatu,#15:29 Mak. 14:58; Joa. 2;19. 30uyashimbeli, ukiti uma lʼutamba a mpeketania 31Ndu elombedi a waki la afundji wakosoke vati: Ndi akashimbela akina, keli ndame heyi ndjashimbela. 32We Kristu, Khumʼekanga ka Isariyele, ukiti kakiane uma lʼutamba a mpeketanya, dia shu mena, keli shu tuketawo! Ndu waku wakahanemi la ndi, wakukanula.
Nyoi ka Jesu
(Mat. 27:45-56; Luk. 23:44-49; Joa. 19:28-30)
33Lamʼakakuki unya lʼatei ote, udjima akayala lu kete tshe, edja ndu lʼeshidi esatu. 34Lamʼakakuki unya lʼeshidi esatu, Jesu akawelela diui wulu ati: Eloi, Eloi, lama sabakatani? nkadimula ati: Unyashungu ami, Unyashungu ami, ukundi ansekaye na?#15:34 Esam. 22:1. 35Lamʼakuki antu amotshi wakemadi laawo diui so, vo wakati vati: Nyulungi, Elidja oso undeta. 36Omotshi akalawo, akatambiya dimbu lu wanu wʼukayi, akadji lu danga, akawusha dia ndi mpiha;#15:36 Esam. 69;21. akati ati: Nyutukete, tutukenda kan Elidja ayuyuhanula. 37Jesu akawelela diui wulu, akakitshiya. 38Ku dihondo#15:38 Etum. 26:31-33. diakahanemi lʼetemwelo, diakate betshi pendi, uma ladiku pulu ndu lʼesi. 39Lamʼakenyi olombodi wʼalimbi, lakemadi lasuki la ndi, ati: Ndi ambukitshiya, ndi akati ati: Mete, untu one aki onʼa Unyashungu!
40Ndu amantu amotshi wakendaka uma la tshalula, lʼatei wʼamantu ako, kaki Mariya, usi Mangadala, Mariya, nyangu Jakoba ya dikenda la Jose, ndu Salome. 41Lamʼaki Jesu la Ngalili, amantu ako wakuyeli, wakukimanyiaka.#15:41 Luk. 8:2-3. Amantu akina efula wakayi la ndi la Jerusalema, waki laawo.
Wambukhunde Jesu
(Mat. 27:57-61; Luk. 23:50-56; Joa. 19:38-42)
42Lushi lako, laki lushi lʼElongoswelo, laid lushi la ntundu ka lushi lʼekila. La dikolo dia lushi lako, 43Josefu yʼusi Arimatiya, umbadi a lukumu, lakalungamelaka ndu ndame diulelu dia Unyashungu, akatshu la dihunga le Pilata, akolombe udu wa Jesu. 44Pilata akambi wuhu wakandavu esadi. Ku ndi aketi olombodi wʼalimbi, akayuwumbula etena kakandavu. 45Lamʼakulimbitshiya olombodi wʼalimbi dikambu diako, ndi akasha Josefu udu andi. 46Josefu akasumbi dihondo dia linene, akahanula udu wa Jesu uma lʼutamba a mpeketanya. Ndi akawombe dihondo diako; akatuwetamia lu liumbu diakawatunguna lu dive. Ku ndi akangitula dive, akadidihi lu suku dia diumbu. 47Mariya wʼusi Mangadala, la Mariya nyangu Jose wakenyi lene akawawetamia.
ទើបបានជ្រើសរើសហើយ៖
Mako 15: TLL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
La Bible en Otetela © Allianee Biblique de la Republique Democratique du Congo, 1991