Mako 11
11
Jesu Ambukuma la Jerusalema la Lutumbu
(Mat. 21:1-11; Luk. 19:28-40; Joa. 12:12-19)
1Lamʼakawasukana la Jerusalema, vo waketi lasuki la Betefange la Betaniya utsha lʼUkungu wʼEweli. Jesu akatumi ambeki andi ahendi ati: 2Nyutshu lu ngelu keledinyu. Kamʼayunyukuma loko, nyu nyayutana osongo wa punda wukelekami, wahatahema untu. Nyutukelekuli, nyuyi la wo. 3Naka untu ayunyumbula ati: Okoko wana watshanyu okone? Kanyukaluya diui nyati: Khumadiondjo kuhumba. Ndi ayukaluya esadi. 4Vo wakatshu, wakatutana osongo a punda wukelekami lu seke, lasuki la suku, ku vo wakukelekula. 5Antu amotshi lʼatei a waku wakemadi laawo, wakawambula vati: Na dikambu diku? Okoko wana wakelekulanyu osongo wa punda uku? 6Vo wakâkaluya diui uku akawatela Jesu, ku vo waketawo dia vo ntsho. 7Vo wakayi la osongo ako wa punda le Jesu, wakahe ahondo awo ladiku diawo. Jesu akadjase laawo. 8Antu efula wakali ahondo awo lu mbuka, la akina avundja wakawahimbula uma lu dikambo. 9Wane wakatatshokaka la ntundu ka Jesu, la wane wakayuyelaka, wakatahangohangoka vati: Hosana!#11:9 Esam. 118:25. One luyi lu lukumbu la Latuyalaka atshokwami!#11:9 Esam. 118:26. 10Diulelu dia tshesu Davidi diayayi, diatshokwami! Hosana lʼulungu!
11Jesu akakumi la Jerusalema, akoto lʼetemwelo. Ndiakashishima diango tshe diaki loko. Ku lamʼakayangi unya mbidja, ndi akatshu la ambeki andi dikumi la ahendi utsha la Betaniya.
Jesu Ambudja Utamba a Fingu Mananu
(Mat. 21:18-19)
12La wedi a pindju, lamʼakawayayakaka uma la Betaniya, Jesu akuki ndjala. 13Ndi akenyi utamba a fingu waki la akatshi tshalula. Ndi akatshu la ntenda ati: Kana layutana ulua omotshi loko. Lamʼakandakumi laawo, ndi akatani paka akatshi, ne dia nshi sho taki etena kʼelua. 14Jesu akateketa; akatela utamba ati: Untu talekaki elua aye ntu pundju. Ambeki andi wakuki diui so.
Elongoswelo kʼEtemwelo
(Mat. 21:12-17; Luk. 19:45-48; Joa. 2:13-22)
15Vo wakakumi la Jerusalema. Jesu akoto lu etemwelo, ku ndi akatatela mbitshanya wane wakasundjaka, la wane wakasumbaka diango lʼetemwelo. Ndi akatshulula mesa wʼamengudi wa falanga, ndu ekala wʼasumbishi wa tukudumba. 16Ndi kumbetawo nduku untu ntenanya etemwelo atembe engo. 17Ndi akawaetsha; akawambula ati: Undi, nkufundama ati: Luudu lami layetama ati: Luudu la dombelo la wedja tshe?#11:17 Is. 56:7. Keli nyu nyambulete wuku wʼapotodi.#11:17 Jer. 7:11. 18Elombedi a waki la afundji wakuki dikambu so, wakayangi mbuka ka mbudiaka. Keli vo wakawuki woma, ne dia ului tshe wʼantu wakambi dia wetshelu andi. 19Ndi akatumbaka uma lʼusumba nshi tshe la dikolo.
Wulu wa Mbetawo
(Mat. 21:20-22)
20Lamʼakawatetaka lu mbuka la pindju, vo wakenyi utamba a fingu ako ambolengela tshe, ndu ediu awo wambuma. 21Petero akuho utamba ako, akatela Jesu ati: Umbetsha, enda! Utamba a fingu wakayadji mananu ambolengela. 22Jesu akawatela ati: Nyetawo Unyashungu. 23Mete kanyutelami nti: Naka untu ayutela ukungu uku ati: Umo leku, utoto lʼuduwa; mete, ndi ayena dikambu diako diambutshama naka ndi kema la tamu lʼutema andi, ndu ambetawo ati: Dikambu dialombami diayutshama.#11:23 Mat. 17:20; 1 Kor. 13:2. 24Okone lambunyutela nti: Lamʼalombanyu Unyashungu, nyetawo nyati: Tambulungula kene kalombasu; ku mete, nyu nyayukilungula. 25Lamʼemalanyu nyalomba Unyashungu, naka nyu la untu dikambu, nyudimanyia. Okone mbayunyudimanyia ndu Shenyu leli lʼulungu kolo yanyu. #11:25 “11:26” hafundami lʼatei a page, paka la tshina, lu abuku amotshi. 26Keli naka nyu hanyudimanyia akina kolo yawo, Shenyu leli lʼulungu hunyudimanyia kolo yanyu.#11:25-26 Mat. 6:14-15.
Wambumbula Jesu Dia Wulu Andi
(Mat. 21:23-27; Luk. 20:1-8)
27Vo wakayi ntu la Jerusalema. Lamʼaketetaka Jesu lʼetemwelo, elombedi a waki, afundji, la dikumanyi wakayi le ndi. 28Vo wakawumbula vati: La wulu akona watshaye akambu ane? Akakusha wulu wa ntsha akambu ane? 29Jesu akâkaluya diui ati: Ndu dimi nangaka nyumbula umbula omotshi. Naka nyu nyayunkadimwelawo, ku dimi layunyutela dia wulu watshami akambu ane. 30Undi, batiza ka Joani kakayi uma lʼulungu, kana uma le antu? Nyunkadimweli. 31Vo wakatanela lʼatei awo vati: Naka shu tayuta shati: Uma lʼulungu, ndi ayutumbula ati: Ya ukundi akinyu kumbetawo na? 32Keli shu tayuta shati: Uma le antu? — vo wakuki antu woma, ne dia antu tshe wakamamemaka Joani vati: Umvutshi mbendi. 33Vo wakâkaluya Jesu diui vati: Shu hateyi. Ku Jesu akawatela ati: Ndu dimi halunyutela dia wulu akona watshami akambu ane.
ទើបបានជ្រើសរើសហើយ៖
Mako 11: TLL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
La Bible en Otetela © Allianee Biblique de la Republique Democratique du Congo, 1991