Etumbelu 3
3
Leta la Mose
1Mose akalamaka dungalunga dia ukilu andi Jetero, olombedi wa Midiyana. Ndi akalombolaka dungalunga lu leke lʼedjelu ka unya kʼusui wa shenga, akatukuma pulu la Horeba, ukungu wa Unyashungu. 2Ondjelo a Latuyalaka akene le ndi lu lumbi la dja lakahetaka lʼatei a dikumbu. Mose akendi, enyi ku lumbi la dja lone laheta lu dikumbu tshe, keli dio hadiulungula. 3Ku Mose akati ati: Ntukukadimo, ntendi enelo ka mamba keku, ndu dikambu kuna dikumbu hadiulungula. 4Lamʼakenyi Latuyalaka ati: Mose ambukadimo la ntudienda, Unyashungu akaweti uma lʼatei a dikumbu ati: Mose! Mose! Ku ndi aketawo ati: Dimʼone. 5Unyashungu akawutela ati: Tusukanaki lane. Unya sabata uma lʼekulu aye, ne dia dihuli diemadiye, dieli kete yʼekila. 6Ndi akawutela ntu ati: Dimi keli Unyashungu a sho, Unyashungu wa Abarahama, Unyashungu wa Isaka, ndu Unyashungu wa Jakoba. Mose akashe elundji, ne dia ndi akuki woma dia menda Unyashungu.
7Latuyalaka akati ati: Dimi lambena asui a wudja ami weli lʼEdjibitu. Lambuka tukuku tawo tʼalelu, dikambu dia embuledi watasuyaka. Lambeya ndu toshoko tawo. 8Okone lambuhulo dia ndjatshungula uma lʼanya wʼasi Edjibitu, la mbatundja uma lu kete ku, utsha lu kete yʼololo ya wuki, lu kete yuludi too lʼawele la usanga. Dimi layalombola utsha lʼahuli wudjashi asi Kanana, asi Hiti, asi Amora, asi Perizi, asi Hiwi, la asi Jebuse. 9Kakiane, ulungi, tukuku tʼalelu wʼasi Isariyele nkumaka pulu ndu le mi. Dimi menaka wengiya wawaengiya asi Edjibitu. 10Yaka, keji ndjukutumi le Farayo, dia we ntutundja wudja ami, asi Isariyele, uma lʼEdjibitu.#3:10 Etsh. 7:30-34. 11Keli Mose akakaluya Unyashungu diui ati: Dimi leli na, dia ntsho le Farayo, dia ntutundja asi Isariyele uma lʼEdjibitu? 12Unyashungu akakaluya diui ati: Mete, dimi layuyala la ye. One ayuyala djimbitelu le ye ati: Dimi nkukutumi. Lamʼayuyutundja wudja uma lʼEdjibitu, nyu nyayuyontemola Unyashungu lʼukungu one.
13Ku Mose akatela Unyashungu ati: Naka dimi lambutsho le asi Isariyele, ku layutuwatela nti: Unyashungu a washenyu#3:13 Etum. 6:2-3. kuntumi le nyu. Keli naka vo wambumumbuia vati: Na lukumbu landi? Ngandi ayumuwatela? 14Unyashungu akakaluya Mose diui ati: DIMI LELI ONE LATUYALAKA.#3:14 Eny. 1:4, 8. Ndi akawutela ati: Kututeli asi Isariyele diui wati: DIMI LATUYALAKA kuntumi le nyu. 15Unyashungu akatela Mose ntu ati: Kutukaluya asi Isariyele diui wati: Latuyalaka, Unyashungu a washenyu, Unyashungu wʼAbarahama, Unyashungu wa Isaka, Unyashungu wa Jakoba, kuntumi le nyu. Oso eli lukumbu lami la pundju, layumbuhoka antu wa lu lolonga la lolonga. 16Utshu, utusanganya dihangamendi dia Isariyele, kutuwateli Wati: Latuyalaka, Unyashungu a washenyu, Unyashungu wʼAbarahama, wa Isaka, wa Jakoba, akene le mi; akamvutela ati: Dimi lakanyendi; lakenyi uku anyutshelawo lʼEdjibitu. 17Dimi lambunyulaka nti: Layunyutundja uma lʼEdjibitu lene asuwanyu, layunyotola utsha lu kete yʼasi Kanana, yʼasi Hiti, yʼasi Amora, yʼasi Perizi, yʼasi Hiwi, la yʼasi Jebuse, kete yuludi too lʼawele la usanga. 18Vo wayetawo diui diaye. Kutshu, we la dihangamendi dia Isariyele, le khumʼekanga ka Edjibitu, kanyutuwuteli nyati: Latuyalaka, Unyashungu wʼasi Heberu, akasangana la su. Okone shu tambukosengasenga shati: Utukimo dia shu ntsho lokendo la nshi sbiatu lʼusui wa shenga, dia shu ntulambula Latuyalaka, Unyashungu asu, ulambu. 19Dimi mbeyaka nti: Khumʼekanga ka Edjibitu hetawo nyu ntsho, tshikima la lunya la wulu. 20Osoku dimi layusimbula lunya lami, layokomola asi Edjibitu la wehu tshe wʼakambu wa mamba wayumutsha lʼatei awo. Ku lʼokongo diku, ndi ayunyukimo. 21Dimi layuhumuya wudja one lukulu lʼolo le asi Edjibitu. Okone lamʼayunyunela uma leko, nyu hanyutsho anya atu. 22Keli umuntu tshe ayutalombi dengalenga dia fesa, dia paunyi, ndu ahondo uma le usukanyi andi a umuntu, ndu uma le one ludjashi lu luudu la usukanyi andi, ku nyu nyayudilotsha anʼanyu wʼapami ndu anʼanyu wʼamantu. Osoku mbayunyutamanyi diango diʼasi Edjibitu.#3:22 Etum. 12:35-36.
ទើបបានជ្រើសរើសហើយ៖
Etumbelu 3: TLL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
La Bible en Otetela © Allianee Biblique de la Republique Democratique du Congo, 1991