Matayo 28
28
Iyarun ka Yesu
(Marako 16.1-10; Luka 24.1-12; Yokana 20.1-10)
1Ingei Ceng Sabato, tetu obai kame ru ceng Sande, Maria Magadalina kede Maria ocelu oko ot pi neno ates. 2Kikano, piny oko yangere kitek; pien malaika ka Rwot oudo obino ki malo di eko loro kidi tenge ki dog ates, en eko bedo i wie. 3Cal mere oudo ineno bala meny me kot, kede egoe mere oudo tar bala akako. 4Mielkom oko mako jodar pi lworo, di kiko anatakin bala jo kotieko to.
5Do Malaika nono oko waco ne mon ka be, “Kur ibedunu kede lworo, pien ango angeo be wun itienu mono Yesu kame oudo koguro i kom musalaba. 6En eli ki kan pien etieko yaruno bala kame bin ewaco. Bianu inenunu kakame oudo kopielo iye kome. 7Aso, otunu awakawaka iwacunu ne josiao mege be, en etieko yaruno kikom jo oto, en do etieko cako ot ne wu Galilaya; ibinunu nene ki kuno. Gikame ango awaco ne wu en ino.”
8Gin kiko yai awakawaka ki ates kede lworo, do di kipong kede yomcuny, di kiko ringo pi ot waco ne josiao mege.
9Yesu oko riamo kede gi, di en eko waco ne gi be, “Yoganu.” Gin kiko ot bute, kiko mulo tiene di kiko wore. 10Yesu oko waco ne gi be, “Kur ibedunu kede lworo; otunu iwacunu ne imiegu na pi ot Galilaya di kiko bino nena ki kuno.”
Kop kame Jodar Ates Otero
11Kakame mon nogo oudo tie ot kede, jo kame oudo tie daro ates oko ot i bomba kiko waco ne jodongo me josaseredoti gikame oudo otimere dedede. 12Kakame jodongo me josaseredoti kede joadongo me piny ocokere kede karacel, kiko iiko tam, di kiko mino isirikalen sente atot 13di kiwaco ne gi be, “Wacunu ne jo be, ‘Josiao mege obino iwor di wan onino kiko kwalo kome.’ 14Ka kop noni otuno i yit ngapug, wan obino cungo iye di likame ikounu udo peko moro.”
15Isirikalen jodar oko gamo sente di kiko timo bala kame oudo kowaco ne gi. Kop noni oko sarakin i dier Iyudayan tuno tin.
Yesu Oneeno ne Josiao mege
(Marako 16.14-18; Luka 24.36-49; Yokana 20.19-23; Tice 1.6-8)
16 #
Matayo 26.32; Marako 14.28 Josiao tomon kiwie acel oko ot Galilaya i moru kame bin Yesu owaco be kioti iye. 17Kakame kinene kede, gin kiko wore, do jo mogo kikom gi oko bedo kede gungcuny. 18Yesu oko ot but gi di en eko waco ne gi be, “Kotieko mina akarunikin dedede me i malo kede me lobo. 19#Tice 1.8Pi mano, otunu ilokunu jo me atekerin dedede dok jo kame luba, batisonu gi i nying Papa kede Wod kede Tipo Kacil, 20doko di ipwonyunu gi gwoko gikame aciko ne wu pi lubo. Doko nenunu, ango atie kede wu nakanaka tuno i ajikini me piny.”
ទើបបានជ្រើសរើសហើយ៖
Matayo 28: BILKDC13
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Baibuli I Leb Kumam © Bible Society of Uganda, 2013.
