Matayo 26
26
Jo Oporo Kop me Neko Yesu
(Marako 14.1-2; Luka 22.1-2; Yokana 11.45-53)
1Kakame Yesu otieko yamo kede kope nogi, en eko waco ne josiao mege be, 2#Yai 12.1-27“Wun ingeunu be odong ceng are tuno i Ebaga me Kalamo, di oko bino mino Wot ka dano pi gure i kom musalaba.”
3Di do jodongo me josaseredoti kede joadongo me piny oko cokere i ot me Ngatel Josaseredoti, kame oudo nyinge Kayapa, 4di kiko donyo iiko tam me mako Yesu i yore me mung kede neke. 5Do kiko waco be, “Kur omakenu i kare me ebaga, pien jo bino tany ne wa.”
Kowiro Yesu i Betania
(Marako 14.3-9; Yokana 12.1-8)
6Bin di Yesu oudo tie Betania i ot me adobo kame nyinge Simoni, 7#Luka 7.37-38dako moro oko bino bute di emako mo kame wel mere tek adikinicel di tie i cupa kame kolwongo be alabasita, kame kotimo kede engaro. En eko onyo mo nono i wi Yesu di oudo etie cam. 8Do kakame bin josiao mege oneno kede gikame dako nono otimo, cuny gi oko wang di kiko donyo penyere be, “Pinyo komio kodubo mo ni aduba kaman? 9Pien oudo koromo cato mo ni i wel me sente alac di oko mino jocan.”
10Do Yesu oudo ngeo tam gi, omio eko penyo gi be, “Pinyo komio itienu lolo dako no? En etieko timo nango gikaber twatwal. 11#Iswilia 15.11Pien wun itienu kede jocan nakanaka, do likame ango abino bedo kede wu nakanaka. 12En eonyo mo noni i koma pi temuno koma pi ayika. 13Ateteni awaco ne wu be, kabedo dedede kame kobino tuco ejiri noni iye i wi lobo lung, kobino tatamo gikame dako noni otimo di koyutuno en kede.”
Yuda Oyei pi Rupao Yesu
(Marako 14.10-11; Luka 22.3-6)
14Kikano ngat acel kikom josiao tomon kiwie are, kame bin nyinge Yuda Isikariot oko ot but jodongo me josaseredoti, 15#Sakaria 11.12di eko penyo gi be, “Nyo kame ibinunu mina ka amie i cingu?” Gin kiko yei cule siringi akaya ot adek. 16Cako esawa no Yuda oko cako mono kare aber me mino Yesu i cing gi.
Yesu Ocamo Ebaga me Kalamo kede Josiao mege
(Marako 14.12-21; Luka 22.7-13, 21-23; Yokana 13.21-30)
17Kikano i ceng me agege me ebaga me Mugati kame Arup li kiye, josiao oko ot but Yesu di kiko penye be, “Tuai en kame in imito be wan ooti oik ni iye Ebaga me Kalamo?”
18Yesu oko dwoko ne gi be, “Otunu i bomba but icuo moro, ikounu waco ne be, ‘Apwony owaco be, esawa na otuno; abino camo Ebaga me Kalamo kede josiao na i odi.’ ”
19Josiao da oko timo bala kite kame Yesu oudo owaco ne gi kede, di do gin kiko iiko cam me Ebaga me Kalamo.
20Di do piny oyuto, Yesu kede josiao mege tomon kiwie are oko bedo piny kacam. 21Esawa kame oudo kitie kede cam, Yesu oko waco ne gi be, “Ateteni awaco ne wu be, ngat acel kikom wu bino rupao ango.”
22Josiao oko bedo kede par adikinicel, ngat acelacel oko cako penye be, “Rwot, mam nat ango inonono?”
23 #
Sabuli 41.9
Yesu oko dwoko ne gi be, “Ngat kame tie nywako suani acel kede ango en kame bino rupao ango. 24Wot ka dano bino to bala kame iwandik kacil waco, do ngat kame bino rupao Wot ka dano bino neno can tin benyo! Tikatika koto oudo likame konywale da.”
25Yuda ngat kame bin orupao en oko penye be, “Apwony, mam ango do inonono?” Yesu oko dwoko ne be, “In en iwaco kamanono.”
Cam ka Rwot me Otieno
(Marako 14.22-26; Luka 22.14-20; 1 Jokorinti 11.23-25)
26Kakame oudo kitie cam kede, Yesu oko kwanyo mugati, eko kwano winyo iye, eko popoko, di eko mino josiao mege di ewaco be, “Gamunu icamunu; man en koma.”
27En eko kwanyo ikopo me bwini, eko pwono Rubanga, di eko mino gi di ewaco be, “Matunu wun dedede; 28#Yai 24.8; Yeremia 31.31-34pi man en remo na kame moko isikan ka Rubanga, remo na kame kobino onyo pi jo atot pi sasiro dub. 29Awaco ne wu be, likame abino bobo mato pige me anyakini noni tuno i ceng kame abino mato kede wu bwini anyen i Ajakanut ka Papa na.”
30Kakame kitieko kede wer gin kiko yai ot i moru me Olibeti.
Yesu Otuco be Petero bino Dage
(Marako 14.27-31; Luka 22.31-34; Yokana 13.36-38)
31 #
Sakaria 13.7
Di Yesu oko waco ne gi be, “Iwor me tin wun dedede iyarunu ringo ikounu weka, pien kowandiko be, ‘Abino neko ngakwat di romini me anok ko bino sarakin.’ 32#Matayo 28.16Do ingei yaruno ango, abino cako ot ne wun Galilaya.”
33Petero oko waco ne be, “Akadi bed bala jogi dedede weki, do ango likame abino weki.”
34Yesu oko waco ne be, “Ateteni awaco ni be, iwor me tin noni di pwodi tongweno likame okok, in ibino daga tien adek.”
35Petero oko dwoko ne Yesu be, “Ango likame ayaro weki, akadi di komito neka kedi.”
Josiao apat da dedede oko waco kop acel nono.
Yesu Olego i Poto me Getesemani
(Marako 14.32-42; Luka 22.39-46)
36Yesu kede josiao mege oko ot kabedo kame kolwongo be Getesemani, di en eko waco ne josiao mege be, “Wun bedunu kan ango ber aoti alegi.” 37En eko tero Petero kede awobe ka Sebedayo are, cwercuny kede par adwong oko make. 38En eko waco ne gi be, “Par atek tie i cunya, kame romo neka, wun ber dongunu kan, do ikounu bedo di ikiunu piny karacel keda.”
39En eko nyiko anyim anonok eko riebere piny, di eko lego be, “Papa na, ka koto twerere, wek ikopo me can noni bei tenge kibuta, do likame bala kite kame ango amito kede, do bala kame in imito.”
40En eko dok but josiao eko udo gi di kitie nino, di en eko waco ne Petero be, “Benyo, oudo likame itwerunu bedo di ineenunu karacel keda pi esawa acel? 41Bedunu di ineenunu kede di ilegunu tetekeny kur ipotunu i atama. Cuny mito, do kom nyap.”
42En eko bobo ot tenge tien me are di eko lego be, “Papa na, ka ikopo noni likame karuno kato di likame amate, wek etimere bala kite kame in imito kede.” 43En eko bobo dwogo but gi di eko udo gi kitie nino, pien oudo nino obwono wang gi.
44Yesu oko weko gi bobo, eko ot tenge di eko lego tien me adek di ewaco kope kame oudo etieko kwano nogo. 45En eko do dwogo but josiao mege di eko waco ne gi be, “Mam wun pwodi itienu nino kede wei? Nataman esawa do otuno kame kobino mino kede Wot ka dano i cing jodubo. 46Yaunu ootunu; nenunu ngat kame tie rupao ango ine otieko tuno.”
Komako Yesu
(Marako 14.43-50; Luka 22.47-53; Yokana 18.3-12)
47Di Yesu oudo pwodi tie yamo, Yuda kame oudo obedo ngat acel kikom josiao tomon kiwie are oko tuno. Oudo eupere kede ekodet ati me jo kame mako ipimai kede akutai, di oudo kiwok kibut jodongo me josaseredoti kede kibut joadongo me piny. 48Ngaerupe oudo otieko mino gi gianena di ewaco be, “Ngat kame ango abino moto di anoto, udo en inonono. Makenu.”
49Oyotoyot en eko bino paka tuno but Yesu di eko waco be, “Yoga ngapwony!” En eko noto leme.
50Yesu oko waco ne be, “Ngawota, in tim gikame ibino iye.”
Di do isirikalen oko bino di kiko mako Yesu. 51Kikano dano acel kame oudo tie kede Yesu oko kwanyo epima mere eko tongo kede yit epasoit me Ngatel Josaseredoti. 52Yesu oko waco ne be, “Dwok epima nin i akularu mere; pien jo dedede kame tio kede epima, kobino neko gida kede epima. 53Iparo be ango likame akaruno kwano Papa na di en eko cwano na ikodeta kame kalamo tomon kiwie are me imalaikan oyotoyot? 54Do ka atimo kamano, iwandik kacil kame waco be miero etimere kamanoni bino cobere kakare benyo?”
55 #
Luka 19.47; 21.37 Esawa nono Yesu oko waco ne ekodet me jo be, “Mam ibinunu do kede ipimai kede akutai pi maka ineno bala ango abedo ngayak? Ceng dedede ango oudo abedo i tempulo di apwonyo, do likame ikounu maka cabo. 56Magi dedede otimere pi mino gikame bin inabin owandiko i iwandik kacil cobere kakare.”
Di do josiao mege dedede oko ringo tenge oweke.
Kopido Yesu i nyim Kansulo
(Marako 14.53-65; Luka 22.54-55, 63-71; Yokana 18.13-14, 19-24)
57Di do jo kame oudo omako Yesu oko tere i nyim Kayapa, ngatel josaseredoti, kakame jopwony me Iswil kede joadongo me piny oudo ocokere iye. 58Do Petero oko donyo lubo Yesu ki cen kakabobor tuno kede i diakal me Ngatel Josaseredoti. En eko donyo bedo kede isirikalen kame daro paco pi neno kakame kop noni oudo bino jik iye. 59Jodongo me josaseredoti kede kansulo lung oko donyo mono kop moro me abe, kame koromo pido Yesu iye, tetekeny neke; 60do likame kiko udo, bed bala jo atot kame oudo tie kede pido me abe oudo owokun di kiko pide. I cen mere, jo mogo are oko wokun i nyim kansulo 61#Yokana 2.19kiko waco be, “Icuo ni owaco be, ‘Ango akaruno reto tempulo ka Rubanga di ako gere pi ceng adek.’ ”
62Ngatel Josaseredoti oko cungo malo di eko waco ne Yesu be, “Benyo, in ili kede kop moro kame iromo dwoko? Nyo ber ine kame jogi tie pidi iye ni?” 63Do Yesu oko ling alinga. Ngatel Josaseredoti oko waco ne be, “Apenyi i nying Rubanga kakuo, wac ne wa ka in Kirisito Wot ka Rubanga.”
64 #
Danieri 7.13
Yesu oko dwoko ne be, “In en iwaco kamanono. Do awaco ne wu be, cako tin ibinunu neno Wot ka dano di bedo i bad tetu cam me Twer, kede di ebino kede idoun me malo.”
65 #
Jolebi 24.16
Ngatel Josaseredoti oko yeco igoen mege di ewaco be, “Etieko cano Rubanga, pinyo bobo pwodi imitunu ijurak? Wuda nan itiekunu winyo di ecao Rubanga. 66Nan itamunu benyo?”
Gin kiko dwoko be, “Epoore to.”
67 #
Isaya 50.6
Gin kiko donyo ngungulo lau i wange kede dongodongo en, doko jo ace oko donyo babapo en 68di kiwaco be, “In Kirisito, murao ne wa! Ngai kobapi?”
Petero Odagi Yesu
(Marako 14.66-72; Luka 22.56-62; Yokana 18.15-18, 25-27)
69Petero oudo tie bedo ooko i diakal. Nyako ngatic acel oko ot bute di oko waco ne be, “Ida oudo itie kede Yesu Ngagalilaya.”
70Do en eko dagi kop nono i nyim gin dedede di ewaco be, “Ango akwia gikame itie waco.” 71Petero oko wok ooko i dog erute. Nyako ngatic ace bobo oko nene di oko waco ne jo kame oudo tie cungo kuno be, “Icuo no da oudo tie kede Yesu me Nasaret.”
72Petero bobo oko dagi kop nono di elairo be, “Ango akwia lono.”
73Ingei esawa acecek, jo kame oudo tie cungo kuno oko ot but Petero di kiko waco ne be, “Ateteni ida ngat acel kikom gi, pien epone kame in iyamo kede nyuti.”
74Petero oko cako lamere kene di elairo be, “Ango akwia icuo no.”
Cucuto nono di do tongweno oko kok. 75Petero di oko yutuno kop kame Yesu oudo owaco ne be, “Di pwodi tongweno likame okok, in ibino daga tien adek.” En eko ot ooko di eko donyo koko kitek.
ទើបបានជ្រើសរើសហើយ៖
Matayo 26: BILKDC13
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Baibuli I Leb Kumam © Bible Society of Uganda, 2013.
