Yuörö 7
7
1A MATAT kulyani ko Mose adi, Mete, nan aje kon do gwoso Ŋun ko Paro i komor, a Arona luŋösur de gwe a nebi ilot. 2Do kodyö jambu kulya liŋ nagon nan a sarakin do kune, a Arona luŋösur nyönyökökiŋdye Paro anyen kölöddu Ŋutu ti Yisaraele kaŋo kanyit i jur. 3#Kon 7.36 Ama a nan mo togo ’yi töili lo Paro; nyena ma ’di ködyö nan a tuŋdijö kweyesi kwe se ko sörösi kwe i jur lo Ejipeto, 4a Paro mo tine ’bön yiŋga ta, a kirut nan mo tanyakiŋdye könin lio ko Ejipeto loki, a nan mo joŋdi lödirön kwe kaŋo, iŋkoi, nan mo jojon Ŋutu kwe logon a nyakwariat ti Yisaraele kaŋo i jur lo Ejipeto ko konesi temejik ’duŋesi ti putet. 5A Ŋutu ti Ejipeto mo dene den adi, nan a MATAT i diŋit na riöddi nan könin lio ko Ejipeto loki, a joŋdi Ŋutu ti Yisaraele kaŋo kase kiden nu.
6A Mose ko Arona koŋdi gwoso nagon MATAT a saŋi se nu. 7A i diŋit na jambi se ko Paro nu, a Mose gwe ko kiŋajin merya budök, a Arona gwe ko kiŋajin merya budök wot musala.
Ture lo Arona
8A MATAT kulyani ko Mose ko Arona adi, 9Ko Paro a kulya ko ta adi, Koŋdi ta ŋo kasu sorosi, a do Mose takiŋdye Arona adi, ’Dumuŋdye ture ilot ko gubaki ko Paro i komor anyen wora a munu. 10A Mose se ko Arona lupöni ko Paro yu, a se koŋdi gwoso na sarakiŋdye MATAT nu, kweja adi Arona a gubakiŋdya ture lonyit kak ko Paro i komor se ko kölipönök kanyit i komor, a ŋilo ture worani a munu. 11A Paro luŋgi Ŋutu lokoŋ ko Ŋutu ti mian; a kilo ’bunuk ti Ejipeto mirakiŋdye koŋdya ko mian kase. 12Kogwon se liŋ a gumba turya kase kak, a kilo turya iŋge wora a munuö. Ama a ture lo Arona lo wi ’ye turya kase kulo. 13Ama töili lo Paro nyuŋ gwon a iŋgo, a nye tine yiŋ se kwoŋ gwoso na kulyari MATAT nu.
Tomiet nagon a rima
14A MATAT kulyani ko Mose adi, Töili lo Paro pömoni, nye ti ’bon kölöddu kilo Ŋutu. 15Iti ko Paro yu kotumalu ’beron i ŋerot na tiri nye kare nu; a do gwo ’de i kijit na Supiri ’i rum ko lepeŋ, a do iti ko ŋilo ture konut i könin logon a wora a munu lo. 16A do kulyani ko lepeŋ adi, MATAT Ŋun lo Ebere aje sunyuŋdyö nan konut ni kulya adi, Kölörö Ŋutu kwe, anyen se böŋö tu kitakiŋdya nan i yöbu yu; mete, do puja ti yiŋ, 17#Kwe 16.4 MATAT lo kulya adi, Do de kukurun i kine ŋo adi nan logon a MATAT; mete, nan de gwugwut kine pioŋ ti Supiri ko ture lo gwon koyo i könin lo, a se de worani a rima, 18a somot lo gwon Supiri kilo de twatwane twatwa, a kare mone mon a loron, a Ŋutu ti Ejipeto mo mane man möju na pioŋ ti Supiri. 19A MATAT kulyani ko Mose adi, Taki Arona adi, ’Dumuŋdye ture ilot ko riöddi könin ilot ko ŋilo ture yuddya pioŋ ti Ejipeto, ko karya kase, ko luruki kase, ko törön kase, ko joran kase liŋ, anyen se böŋö wora a rima; a rima mo gwe i jur lo Ejipeto liŋ, ko i keria, ko i sapya logon a ŋurupö Köti.
20A Mose ko Arona koŋdi sona gwoso nagon MATAT a saŋi nu; a Arona ’doggi ture lonyit lo ki, a gwuddye pioŋ ti Supiri kune a Paro se ko kölipönök kanyit kulo memeddya, a pioŋ liŋ ti Supiri worani a rima.
21A somot liŋ lo gwon i Supiri kata kulo twatwane twatwa; a kare mone a loron parik, a Ŋutu ti Ejipeto tine bulö möju pioŋ ti Supiri; a rima gwe i jur lo Ejipeto liŋ. 22’bunuk ti Ejipeto koŋdi ŋo gwoso kine koti ko mian kase; a töili lo Paro gwe a iŋgo, a nye tine ’bon yiŋga kulya kase asut gwoso nagon MATAT a kulyari nu. 23A Paro wöriŋöni wöriŋö; a lupöni kanyit kadi, a tine tin töili lonyit ma ’di i kine kulya Köti. 24A Ŋutu ti Ejipeto liŋ ’boggi kak i Supiri nyona ga ’yu pioŋ na mamata, kogwon se ti bulo möju pioŋ ti Supiri kune. 25A perok buryo iŋge lwö ŋgu na gwuddye MATAT Supiri nu.
ទើបបានជ្រើសរើសហើយ៖
Yuörö 7: BBE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bari Bible © United Bible Societies, 1979.