Yuörö 15
15
Köli lo Mose
1 #
Kwe 15.3
A kirut Mose se ko Ŋutu ti Yisaraele yulukiŋdye MATAT ŋilo köli adi,
Nan yulukiŋdyö MATAT kogwon nye aje te ’ya parik;
nye aje gubakiŋdya kusan ko kajoŋanit lonyit i tör na ’balaŋ.
2 #
Sau 118.14; Yis 12.2 MATAT gwon a riŋit nio ko a köli lio,
a nye iŋge wora a kalwökönit lio; lepeŋ a ŋun lio, a nan pupurje lepeŋ,
iŋkoi, lepeŋ a ŋun lo baba, a nan de yuöggi lepeŋ.
3MATAT a kamörönit; karin kanyit a MATAT.
4Nye aje gubakiŋdya arabiajin ti Paro ko teŋ nanyit na kamörök i tör;
a temejik kanyit lo wulwe logon deden mörö kulo iŋge ’dirön i Tör Nator.
5A pioŋ nagululök muluje se,
iŋkoi, a se ’dirörö kak i togulu na tör gwoso ŋurupö.
6Pon MATAT, könin ilot lo lutaten totomoran ko riŋit,
pon MATAT, könin ilot lo lutaten a gwagwalakakin merok kak.
7I todumalan na tomoran inot do aje dukakin kak kaŋisak lo ŋikin i mörö ko do kulo;
do aje kölöddu woran inot na pape i totumbö na se gwoso kuku.
8A pioŋ ’du ’duluddi ki i buŋa inot na kumesikön ko woran nu,
a ’dokon na pioŋ iŋge gwo ’dan ki gwogwo gwoso sudi;
a pioŋ nagululök iŋge gworan i konyen ti tör.
9A miriku kulyani adi, Nan de ’demeja lepeŋat, a nan de woggi se,
a nan de koŋi ŋo na ryaryakwe, a nan de toyimönöji ’dekesi kwe ko se.
Nan de ’du ’dutun baŋdu lio kaŋo, a nan de tatuje se.
10Do a towuggö ko köbuŋöt ilot, a tör iŋge muluja se;
se a ’dirörö kak i törön temejik adi surum gwoso witi.
11Pon MATAT, ŋa logon gwoso do i kiden na ŋunyen? Ŋa logon a loke bubula gwoso do? Ŋa logon kukujönörikin a iŋge ŋuŋura gwoso do i koŋdya na sörösi?
12Do aje riöddu könin ilot lo lutaten, a kak wilöddi se adi mot.
13Do a nyömöddu Ŋutu logon do a dakun kulo ko nyaŋu inot nagon ti ’duddyö na;
do a yukuddu lepeŋat ko riŋit inot tojo ko ’baŋ inot nake na rurwan.
14A gweyajin ti Ŋutu ko yiŋge, a se böböŋdi böböŋdu;
a tömiesi iŋge mok Ŋutu lo si ’da i jur lo Pelesete.
15A kimak ti Edom söŋi soŋu;
a ŋutu temejik ti Moaba iŋge moka ko kujönö a böŋdi böŋdu;
a töilyet ti Ŋutu liŋ lo si ’da Kanana kulo iŋge doddya ko kujönö.
16Kujönö ko roŋo a mok se;
a se gwe taliŋ adi mit gwoso ŋurupö kogwon könin ilot lo riŋit,
tojo Ŋutu kulök a lwöpöddu pon MATAT, iŋkoi, tojo Ŋutu logon do aje gwörun kulo a lwöpöddu.
17Pon MATAT, do mo tolupödöu Ŋutu kulök nyin a mo ’yutukiŋdye se i mere ilot lomore anyen raradan,
i nu pirit nagon do a tetenakin mugun a si ’daet nu,
iŋkoi, i nu pirit nake na rurwan nagon könisi kulök aje togwo ’ya go nu pon MATAT.
18A matat mo tumatyane ŋupi ŋupi.
19Kogwon kusanjin ti Paro ko arabiajin kanyit lo jijikö se ko kajoŋak kase a lupö i tör lukata, a MATAT toyitökiŋdye pioŋ ti tör kase loki; ama a Ŋutu ti Yisaraele wöröjine i kak nateyon i kiden na tör. 20A nebi Miriama kiaser Arona ’dumakiŋdye tiŋgili kanyit i könin; a Ŋutu wate liŋ gwöaddi ko lepeŋ i mukök ko tiŋgiliet.
21A Miriama ’dulukiŋdye se adi,
Yulukiŋdye ta MATAT kogwon nye aje te ’ya parik;
nye aje gubakiŋdya kusan ko kajoŋanit lonyit i tör na ’balaŋ.
Pioŋ na pötwör Mara yu
22A Mose nyömöddi Ŋutu ti Yisaraele ŋerot suluja i Tör Nator tojo i yöbu na Sur. A se wöröni perok musala i yöbu a tine ryö pioŋ kwöŋ. 23A se ’dure Mara, a se tine bulö möju pioŋ ti Mara kogwon se pötwör;#15.23 pötwörko kutuk na Ebere adi mara nye ŋina kwe nagon nu pirit lupu a Mara. 24a Ŋutu woŋe ko Mose adi, Yi möju nyo?
25A Mose gwiki ko MATAT, a MATAT kwekiŋdye lepeŋ ködini, a nye guba-kiŋdye ŋilo ködini i pioŋ lukata, a pioŋ worani pötö.
A i ŋinu pirit a MATAT tetenakiŋdye se saret lo wurö ko jujuwesi, a nye tembi se nyu, 26kulya adi, Ko ta mo yiyiŋ gworo lio lo MATAT ŋun losu go, a ta mo koŋdi ŋo nagon nan met a na rigwo kune, a mo tiŋdi swö kasu i yiŋga na jujuwesi kwe, a mo ’debbi saresi kwe liŋ lo wurö, a nan mo tine tin lele lo kilo twana logon nan tomije Ŋutu ti Ejipeto kilo i tomijö na ta; kogwon nan MATAT lo toke ’ya ta. 27A se ’dure Elim na gwon ko lelekesi ti pioŋ puök wot murek ko kaden ti tömur merya buryo nu; a se ’bikikiŋdye mera nase nyu nyona ko kine pioŋ.
ទើបបានជ្រើសរើសហើយ៖
Yuörö 15: BBE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bari Bible © United Bible Societies, 1979.