Sekaria 4
4
Ni esipor ataa
1Emalaikat losek kiruoro ka ayong, bu nabo ketekienyu loger lo itekienyunere itwaan ni ejotoe. 2Sodi kengit tama, “Nyo itee iyong?”
Atatachu ayong atama, “Etee ayong ni esipor ataa, ni esubunitae a egolit bon. Eyei atubwa kidiama keng. Ni esipor ataa, eyakasi ngataae ngakan-kaarei. Ayei nikoororon ni irepakinio awaru na inokanakinio. 3Diyete ni esipor ataa neni, ayakasi ngikito a akimiet ngiarei, epei teten, loche kedieny.” 4#Tood 11:4 Engit ayong emalaikat atama, “Ekaapaan, nyo eger a ngakiro kanu?”
5Kengit ngesi ayong tama, “Ikwa nyiyeni iyong a?”
Atatachak ayong atama, “Ee, nyayeni ayong ekaapaan.”#4:5 Elemunitae alosal a ekidor kalo yaunae nege sodi toriyaneta ngakiro nugu lokojokon.
10 #
Tood 5:6
Katolimok ayong emalaikat tama, “Eraakasi ngataae nakan-kaarei nguna ngakonyen ngakan-kaarei a Ekapolon Akuj na iteete akwap wadaang.”
11Engit ayong ngesi atama, “Ani nyo eger a ngikito a akimiet alu ibakit epei aloteten kibakite loche alokedieny ani esipor ataa. 12#Tood 11:4 Ani nyo eger a ngaten anaarei a ngikito a akimiet aluarei eyakasi diyete ngiporotoi luarei a egolit lu eleleunitor akimiet.”
13Kengit ngesi ayong tama, “Ikwa nyiyeni iyong a?”
Atatachak ayong atama, “Ee, nyayeni ayong ekapolon kang.”
14Abu ngesi katolimok ayong tama, “Eraakasi lugu ngitunga luarei lu aseu Ekapolon anakwap kadaang, kidokak akimiet nakies tosuba etich.”
Ngakiro na echikakini Akuj Serubabel
6Katolimok ayong emalaikat atamar atolimok Serubabel akiroit a Ekapolon Akuj na ebala, “Meere ngikilinga, meere agogongu pearai etau kang ngesi idwangea iyong.” Akuj Namerikanyer alimu nguna. 7#Esira 5:2 Kiatak tama, “Be nyo mono iyong emoru apolon? Alongaren Serubabel iliwor iyong aro. Isiakini iyong adukuoru nakitetet a akai a Akuj. Ani idukokini iyong amoru na esal iremarete ngitunga tamasi, ‘Ibus kare, kibuser kare!’ ”
8Abu Ekapolon Akuj nabo katolimok ayong akiroit ache tama, 9“Ngakan a Serubabel kesi adukokis ngateak a akai kana, nakaneni ngakan keng erumorete akiduk. Ani esubakin nguna, eyenunete ngitunga kang atamar ayong Akuj Namerikanyer ngesi kameuni iyong nikech. 10Emenyarito ngitunga adukuoru a akai a Akuj ani ilagilagitere eduke, nakaneni elakarosi kesi na ingolikineta Serubabel erubakinit akiduk akai a Akuj.”
ទើបបានជ្រើសរើសហើយ៖
Sekaria 4: ABIBILIA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
BIBLE SOCIETY OF KENYA (c) 1999