Matayo 16
16
Asakete ngitunga ngakitoodikinet nakailiilok
(Mariko 8:11-13; Luka 12:54-56)
1Pot Ngiparisayo ka Ngisadukayo nia Yesu esakete akining ngesi. Tolimokis tamasi, “Tosubak ngakitoodikinet nakailiilok na itodiunito atamar ibunit iyong ani a Akuj.” 2Nakaneni tatachak Yesu kesi tama, “Esaa lo iraraa akolong adooyor ilimunete esi tamasi, ‘Ejoker akolongit ani erengikinitor adis’. 3Nabo nataparach elilim ilimunete esi tamasi, ‘Erami akiru akolongit na kainyo erengikinit adis kidiisikinite akwap’. Ipedorete esi ayenun ngakiro na adis kotere akitere ngidowon. Nakaneni nyo tokona peiyenuneta esi ngakitoodikinet nakailiilok na itodiunitae ngirwa lu! 4#Mat 12:38; Luk 11:16 Eroko noi ngitunga a ngirwa kalu nyekerito tani Akuj! Esakete kesi kidodikinae ngakitoodikinet nakailiilok! Nakaneni emam ngakitoodikinet ngache nakailiilok idodikinio kesi mati nakolong a ekadwaran a Akuj Yona.” #Mat 12:39; Luk 11:29
Sodi kimiek ngesi kesi torotok.
Arikit naaronon a Ngiparisayo ka Ngisadukayo
(Mariko 8:14-21)
5Na adokareta ngirukitos a Yesu ekwakaye anam, kimuriak kesi akiting ngamugati. 6#Luk 12:1 Tolimok Yesu kesi tama, “Tochoikinos anakiro anaaronok a Ngiparisayo ka Ngisadukayo ana ikote ekitoe lo itubui ngamugati.”
7Tolomakis kesi ekiruor make ebalasi, “Elimunit ngesi nu kainyo emam ngamugati kitingit ngoni.”
8Ayeni Yesu ngakiro na eruorosi kesi sodi kingit kesi tama, “Nyo iruorotor esi make ibaatar emam ngamugati itingito? Etia ekiditeu a anupit kus ai? 9Eringa esi nyeyenuna a? Nyitamunito esi nakolong anyilinyilia ayong ngamugati ngakan kotere ngitunga ngabunge ngakan a? Ngai kolong ngategerin ilelebete esi? 10Ani bo ngamugati nakan-kaarei na anyilinyili kotere ngitunga ngabunge ngoomwon? Ngai ngategerin ilelebete esi? 11#Mat 14:17-21 Kainyo peiyeneta esi atamar meere kotere ngakiro a ngamugati kesuruorea ayong esi? Tochoikinos anakiro anaaronok a Ngiparisayo ka Ngisadukayo ana ikote ekitoe lo itubui ngamugati.” #Mat 15:34-38
12Nakaneni toyena ngirukitos keng atamar meere ngakiro a ekitoe alo itubui ngamugati echikichikea ngesi kesi nakaneni araakasi ngakiro a ngakitatamet a Ngiparisayo ka Ngisadukayo.
Alimunet a Petero atamar Yesu ngesi ngae
(Mariko 8:27-30; Luka 9:18-21)
13Torotok Yesu tolot nakwap na ayei diyete ere a Kaisaria Pilipi. Kingit ngesi ngirukitos keng kaneni tama, “Ebaasi mono ngitunga Lokookeng a Itwaan ngesi ngae?”
14 #
Mat 14:1-2; Mar 6:14-15; Luk 9:7-8 Tatachakis tamasi, “Ebaasi ngiche Yoana Ekebatisan. Ebaasi ngiche erai Elija. Tabaas ngiche irai iyong Yeremia kori epei a ngikadwarak a Akuj.”
15Kingit kesi tama, “Ani bo esi, ibaasi esi ayong ngesi ngae?”
16 #
Yoa 6:68-69 Tatachak Simon Petero tama, “Irai iyong Kiristo, Lokookeng a Akuj ana eyari.”
17Tatachak Yesu tama, “Kongina robo Simon, lokookeng a Yoana! Kipiaritae iyong noi. Erai meere itwaan kidodikini iyong ngakiro na iteni na ikote nguna nakaneni erai Apakang lo eyei nadis kitodikini iyong. 18Kalimokinit iyong Petero atamar, ekiro kon Petero, ngesi atamar ataaba. Nakaneni nataaba na ngesi adukokini ayong ekanisa kang. Nyepedori tani akitu akuruwor jik! 19#Mat 18:18; Yoa 20:3 Kainakini iyong ngingaet lu Apolou a Akuj. Daang na ingeri iyong anakwap, engerio tani anadis. Daang na ichamuni iyong anakwap, echamunio anadis.”
20Nakaneni tolimok Yesu ngirukitos keng atamar nyeelimokis itwaan tani ipei atamar arai ngesi Kiristo.
Eruoro Yesu eger lo eboliare ngesi taarae
(Mariko 8:31–9:1; Luka 9:22-27)
21Tolomak Yesu esaa ngolo alimonokin ngirukitos keng ngakiro na eleerete ebala, “Ejoikinit ayong alosi Yerusalem, katoboliatar ngikasukou a Atuk ka ngimurok luapolok a akai a Akuj ta ngiketatamak a etal. Kaario ayong ani akolongit na a ngauni ayaruni.”
22Tachada Petero ngesi nikeng bon tolomak akikilakin tama, “Meere kongina Ekapolon! Nyesubakinosi nguna anikon jik!”
23 #
Mat 10:38; Luk 14:27 Torei Yesu tolimok Petero tama, “Koto anikang Esiitan! Nyo kiretakinitor iyong ayong? Meere nia Akuj eponitotor ngitamen lukon lu, eponito alotunga.” #Mat 10:39; Luk 17:33; Yoa 1:25
24Nabo tolimok Yesu ngirukitos keng tama, “Itwaan daang ni esaki akiwapakin ayong, ejoikinit ejalun bon sodi toriong apir keng bu kewapak ayong. 25Kainyo itwaan cha daang ni esaki akirichun akiyar keng, ebukori. Nakaneni ni ejali akiyar keng kotere ayong, eyari. 26Nyoni eanyuni itwaan erai kitiliwo ngesi ibore daang nia akwap ikeng nakaneni tobukor anakiyar? Mam jik! Emam ibore ipotori ngesi kilokonyuunio akiyar keng. 27Kainyo dikino Lokookeng a Itwaan ebuni a Apolou anaketimon ka Apakeng erukito ka ngimalaikae keng. Sodi tatach itwaan daang itemem ka etich keng. 28#Mat 25:31; Eosio 62:12; Rom 2:6 Kalimokinit ayong esi atamar eya ngiche nege lu nyetoakete eringa nyeanyungara Lokookeng a Itwaan ebuni erai Ekapolon.”
ទើបបានជ្រើសរើសហើយ៖
Matayo 16: ABIBILIA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
BIBLE SOCIETY OF KENYA (c) 1999
