Matfiejo 28
28
Otdžidyipen
1Pe zlóko, dro pérvo kurkitko dyvés paló sávato, javné Maríia Magdalina i javír Maríia te dykhén maĥila dre koplíca. 2I ake, kerdiápe baró phuvjákiro trinskiriben; pal-dová so Devléskiro Jangólo gijá telé bolybnástyr, i podgii, riskirdiá bar i sys beštó pe léste. 3Léskiro vydykhiben sys syr bliskavica, i léskiro uribén sys parnó syr iv. 4I rakhibnárja izdranas darátyr angíl léste, i kerdépe, xaj, jone sys mulé. 5I lyjá te rakirél Jangólo, phení džuvlienge: “Na andyršan; me džinóm (džináv), so tumé rodéna Isusós, Saves primarde pe trušúl; 6Les (Jov) nane adái, pal-dová so Jov otdžidyjá, syr Jov i phendiá. Javén, podykhen štéto, kaj Jov sys paštó; 7i džán sygedýr, phenén Léskire sykliaibnytkonénge, so Jov otdžidyjá meribnástyr i Jov džála angíl tuménde dre Galiliéia, odój tumé Les dykhéna, ake, me phendjom tuménge.” 8I vygii sýges koplicatyr, jone prastándyne darása i baré radymása te rosphenén Léskire sykliaibnytkonénge. 9I, ake, Isúso pirilyja len, rakirí: “Radynénpe!” I jone, syr podginé, oblyne ĥerá Léskire i poklonindlepe Léske. 10Tedy rakiréla lénge Isúso: “Na andyršan; džán, i phenén Miré pšalénge, sob (kaj) te džán dre Galiliéia; i odój jone dykhéna Man.”
Haladengiri Mavlýn
11Syr jone džánas, tedy vari-savé xaladéngire rakhibnar'jendyr javné dro fóro i rosphendlé rašángire barydyrénge saró, so kerdiápe. 12I kiéli jone skedynépe khetané godephurenca, zrakirdepe maškír péste; jone dyné but rupuvé lové xaladenge, 13rakirí: “Phenén: ‘Léskire sykliaibnýtka javné ratý, čorde Les, kiéli ame sámas suté.’ 14I kóli davá javéla džindló theméskire barydyréske, ame patiakirása les i zrakhasa tumen piridživipnastyr.” 15I jone lyné rupuvé lové i kerdé, syr len sykliakirdé. I kadaja mavlýn (malva) rozgijápe maškír Judénde ke/žýko adadyvesatuno dyvés.
Isúso Sykliaibnytkonénge
16Dešujekh ža sykliaibnýtka giné dre Galiliéia pe bérga, karik phendiá lénge Isúso. 17I kiéli jone dykhné Les, poklonindlepe Léske; ne vari-savé na patianas. 18Na Isúso javdiá i phendiá lénge; “Saró pravo dynó Mánge, syr pe bolybén, adiáke pe phuv. 19Paldavá džán, sykliakirén saré nácyi, bolen len dro lav Dadéskiro, Čhavéskiro i Sventoné Duhoskiro (Fanoskiro); 20sykliakirén len te kerén saró, so Me priphendjom tuménge. I, ake, Me som tuménca ke viekoskiro kónco (jagóro).”
ទើបបានជ្រើសរើសហើយ៖
Matfiejo 28: ROMBALTR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
maintained by the United Bible Societies for the Baltic Romani Mission
