Suku-saakị 1
1
Tamụnọ Tomikiri Mẹ Na Ye-goyegoye Na Tẹmẹm
1Suku-saakị ḅụ Tamụnọ So ma na Kiri mẹ na tẹmẹ sakị, 2kiri mẹ gbọrụ ọrụtọn ḅara sọ sime-a, tẹ gberie-sọ ofori ḅara kẹ koro-simem. Kanakana mie pokolotẹ abajị mẹ gbaịn-koro wararị, tẹ Tamụnọ Tẹmẹ#1.2 Anịanịa Kụrọ Fẹrụ ḅe minji mẹ ọgọnọ mẹnjị-mẹnjị saḅarị.
3 #
2 Kọr 4.6
Tẹ Tamụnọ nwẹnị ḅẹẹ, “Yee bele paka,” tẹ bele nwẹnị paka. 4Tamụnọ nwẹnị ẹrị mịnẹ bele mẹ iḅim; tẹ ọ̀ nwẹnị kanakana mẹ ḅụ bele mẹ puu-ḅelema. 5Tamụnọ nwẹnị bele mẹ sịn Eneḅaka, tẹ nwẹnị Ḍin kẹ kanakana mẹ sịn. Ḅoḅiri ḅo ḅọrọm tẹ dede ḅom, anie tarị ene mẹ.
6 #
2 Pit 3.5
Anịtẹso Tamụnọ nwẹnị ḅẹẹ, “Yee finjitẹ ambịlalị kịka wararị gberere anga paka, tẹ minji mẹ kẹ maa apakịrị ḍie, tẹ minji mẹ ḅẹ gbọrụ pakịrị ḅelema osi pakịrị mẹ ḅụ.” 7Tẹ Tamụnọ So-tọrụ mẹ mịẹm tẹ minji mẹ tẹ So-tọrụ mẹ suku-ḅio sime ye mẹ minji mẹ tẹ So-tọrụ mẹ ọgọnọ sime ye mẹ ḅụ ḍiemam tẹ anị ọkọ simem. 8Finjitẹ ambịlalị kịka wararị gberere anga mẹ Tamụnọ nwẹnị anị sịn “So-tọrụ”. Ḅoḅiri ḅọrọm tẹ dede ḅom, anie maaịn karama ene mẹ.
9Anịtẹso Tamụnọ nwẹnị ḅẹẹ, “Yee So-tọrụ mẹ suku-ḅio simearị minji mẹ kobiri ḅo gbọrụ anga ḅụ sime, tẹ yee samụnọtẹ kpongbo paka.” Tẹ anị ọkọ simem. 10Tamụnọ nwẹnị samụnọtẹ kpongbo mẹ sịn “Kiri,” tẹ ò minji mẹ tẹ kobiri ḅo gbọrụ anga sime ye mẹ sịnm “Tọrụ”. Tamụnọ nwẹnị ẹrị mịnẹ anị iḅim. 11Tamụnọ nwẹnị ḅẹẹ, “Yee kiri mẹ kịrị-kịrị so-pakarị aị pakama — sịn amẹẹ na, osuka na, ịnyịnya na, sịnmgbọlị sụarị aị na, sịnmgbọlụ tẹ arị ḅio arị pembema sịnmgbọlụ pakamarị opu asịn na, ọrụ ye ọrụ ye amịna pembema ye pakamaa.” Tẹ anị ọkọ simem. 12Kiri mẹ nwẹnị kịrị-kịrị so-pakarị aị pakama-ḅo, sịnmgbọlị sụa tẹ amịna pembema asịn pakama ḅarị aị na, sịnmgbọlụ tẹ arị ḅio arị pembema sịnmgbọlụ pakamarị asịnmgbọlị sụarị opu asịn na, ọrụ ye ọrụ ye amịna pembema ye pakama-ḅom. Tamụnọ nwẹnị ẹrị mịnẹ anị iḅim. 13Ḅoḅiri ḅo ḅọrọm tẹ dede ḅom, anie tẹrẹị karama ene mẹ.
14Tamụnọ nwẹnị ḅẹẹ, “Yee tọnwa bele pakama aị So-tọrụ mẹ ḅụ paka, mịẹtẹ arị eneḅaka mẹ ḅụ ḍin mẹ puu-ḅelema ḅẹ ḅara; yee arị elekima sọ tẹ sakị-sakị na, ene-ene na, kụra-kụra na ḍie-pakama, 15anịsakị yee arị So-tọrụ mẹ ḅụ ḅịya tẹ bele kẹ kiri mẹ pịrị.” Tẹ anị ọkọ simem. 16Mie ḅụ Tamụnọ maa opu bele pakama aị ma tẹmẹm — ịrụa mẹ tẹ eneḅaka ḅụ ḅịyarị ye mẹ na pịkị akalụ mẹ tẹ ḍin ḅụ ḅịyarị ye mẹ na; ọ̀ pịkị lolia ma sọ tẹmẹm. 17Tamụnọ nwẹnị arị kẹ So-tọrụ mẹ ḅụ wẹrị arị ḅele kẹ kiri mẹ pịrị, 18tẹ ḅẹrẹtọn eneḅaka mẹ na, ḍin mẹ na pịrị, tẹ bele mẹ ḅụ kanakana mẹ puu-ḅelema. Tamụnọ nwẹnị ẹrị mịnẹ anị iḅim. 19Ḅoḅiri ḅọrọm tẹ dede ḅom, anie ini karama ene mẹ.
20Anịtẹso Tamụnọ nwẹnị ḅẹẹ, “Yee minji mẹ anị ḅio ogbo-ogbo ḅụ ḍumo wararị aị pakama-ḅo ḅinma, anịsakị yee feni kịrị-kịrị So-tọrụ ḅụ kiri mẹ ọgọnọ-jụ ḅụ fiin saḅa.” 21Mị-ḅara ḅụ Tamụnọ tọrụ mẹ ḅio gburo-gburotẹ ḍumo wararị aị na pịkị tọrụ-kịrịkịrị aị tẹ ḅaka ḅara kẹ tọrụ mẹ ḅio simearị aị ma na, tọrụ-kịrịkịrị pamba-sụa afeni ma na tẹmẹm. Tamụnọ nwẹnị ẹrị mịnẹ arị iḅim. 22Tẹ Tamụnọ nwẹnị ịn boma tẹ ḅẹẹ “Ọmịnị iyii, tẹ lolo kamaa, tẹ tọrụ ma ḅio ḅẹ minji ma ḅio ḅin, anịsakị yee feni amẹẹ ma kiri mẹ ọgọnọ pịkị iyi tẹ lolo kama” 23Ḅoḅiri ḅọrọm tẹ dede ḅom, anie sọnọ karama ene mẹ.
24Tẹ Tamụnọ nwẹnị ḅẹẹ, “Yee kiri mẹ ḍumo wararị kịrị-kịrị anama tẹ jen-jen iyiarị aị pakama-ḅo: opu anama na, furo kẹ ikiriarị anama na, piri-ḅio angarị aị na.” Tẹ anị ọkọ simem. 25Tamụnọ nwẹnị tọrụ-kịrịkịrị piri-ḅio-ḅẹ anama ma na, warị-ḅio ḅẹ anama ma na, kpongbo ọgọnọ simetẹ ikiriarị anama mamgba na tẹmẹ. Tẹ Tamụnọ nwẹnị ẹrị mịnẹ arị iḅim.
26 #
1 Kọr 11.7
Anịtẹso Tamụnọ nwẹnị ḅẹẹ, “Mịọkụ wa tomi tẹmẹ ḅa; ịn wa sime-ḅara sime tẹ wa kịka ḅa. Ịn kụrọ kọn tọrụ-minji ḅẹ inji mẹ na, So-tọrụ ḅẹ afeni ma na, opu anama ma na, kpongbo mẹmgba na, ḅẹẹye-ḅẹẹye tẹ kiri mẹ ọgọnọ ikiriarị ye goyegoye pịrị ḅa.” 27#Suk 5.1,2#Mat 19.4; Mak 10.6Anie ḅụ Tamụnọ amịna ḅụụ ḍiki tomi tẹmẹm. Ò sime-ḅara mie ò ḍiki tomi tẹmẹ ḅara; owiḅọ na ẹrẹḅọ na ọ̀ nwẹn tẹmẹm. 28Tẹ Tamụnọ nwẹnị ịn boma, tẹ ịn ḅẹẹ, “Ó loloo tẹ kamaa, tẹ kiri mẹ ḅụ ḅin tẹ anị ó suku-ḅio sime, tẹ tọrụ-minji ḅẹ inji ma na, So-tọrụ ḅẹ afeni ma na, kiri mẹ ọgọnọ ḍumo tẹ mẹnjịarị ye goyegoye ḅụụ kụrọ nyana tẹ ḅẹrẹtọn.” 29Tẹ Tamụnọ nwẹnị pịkị ḅẹẹ, “Ḍikii, sịnmgbọlị sụarị sin goyegoye tẹ bebe kiri mẹmgba ọgọnọ so-pakarị ye na, sịnmgbọlị ḅio ḅụ simearị sịnmgbọlụ sụarị sịn goyegoye na à kẹ fị-fị fịye sọma ọ́ pịrị tẹẹ. 30Anịsakị arị fịye sọ piri-ḅio-ḅẹ nama goyegoye na, So-tọrụ fiin-arị feni goyegoye na, kiri mẹ ọgọnọ ikiriarị ye goyegoye na, ḅẹẹye-ḅẹẹye tẹ ḍumo ọwụ nyana ye goyegoye arị eleleinda tọrụ sụa sịn goyegoye kẹ fị-fị fịye sọma pịrị tẹẹ.” Tẹ anị ọkọ simem. 31Tamụnọ nwẹnị ye goyegoye tẹ ọ̀ mịẹ tẹ ye mẹ ẹrị, tẹ arị kpọma iḅi lamam. Ḅoḅiri ḅọrọm tẹ dede ḅom, anie sonio aḍin karama ene mẹ.
ទើបបានជ្រើសរើសហើយ៖
Suku-saakị 1: KBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(C) The Bible Society of Nigeria