Maafiù Ke jii gbài e nyaàiŋ dè wɔŋ fɛi wɛɛ̀ŋ
Ke jii gbài e nyaàiŋ dè wɔŋ fɛi wɛɛ̀ŋ
Wɔŋ Fɛ̀ì Ebò Siaàŋ nààŋ wo Maafiù naŋ sìngè lɛ naŋ wi wòò è ebò siaàŋ kɛ̀ wo Jisɛ̀ nàŋ yaà wo nyùnɔ̀ɔŋ wo Dayà naŋ tàeɗùù wèè wo nɔ̀ŋ wo Nyuùŋ Jòèyeɔ̀ wèè anyùùŋ nyaŋ e ɗuunyaàŋ. Ebò siaŋ lɛɛ̀ fè wa nɔŋ wèè àŋ Juùù nyaŋ, aŋ yè nyaŋ wò naŋ wa kùmìè tɛɛ nyàŋ, kɛɛ è yaà wa wèè anyùùŋ nyaŋ gbiŋ e ɗuunyaàŋ.
Wɔŋ fɛ̀ì Maafiùɔ yaà sìnga wuŋ maŋ keì wòo tii sùà. È naŋ wa tɔ̀ɔ̀tù ke ɗɔ̀ɔ̀ kòmàŋ Jisɛ̀ɛ diɛŋ, yèè e ɗewe kiiɛ̀ wò naŋ wa nɔ̀ŋ gùauŋ lɛ̀ yèè e wàaà wò naŋ wa kɔ̀ dìì lɛ, yèè e teengaà wò naŋ wa tɔ̀ɔ̀tù e tòmouŋ nɛ̀ wèè ke mìè Dayàa gbòa, yèè e ɗeweɛ̀ wò naŋ wa kàà anyùùŋ lɛ̀, yèè e ɗeweɛ̀ wò naŋ wa sùngò anyùùŋ wɔŋ fùɔ̀ŋ Galaliìɔ sùà lɛ. Eɓìèmàŋjɛ̀wɛ̀ tɛɛ̀, wɔŋ fɛ̀ì ebò siaàŋ naŋ sìngè e teengaà wo Jisɛ̀ naŋ wa yèwè wɔŋ fùɔ̀ŋ Galaliìɔ wèè wo ka ko Jùlusɛ̀làm, yèè maŋ nyɛ̀nɛ̀ŋ dìàmàŋ Jisɛ̀ maŋ ke wikì dìàmauŋ nɛɛ̀ŋ wɔŋ nyiiŋ geuŋ nɔɔ̀ŋ sùà, e hài koɓɛ̀ e teengaà àŋ nauŋ wa jìwìè wɔŋ vànèkpaaà diɛŋ yèè wò naŋ yèwè e fàaà dìì lɛ.
Wɔŋ Fɛ̀ì Ebò Sìàŋ Maafiùɔ naŋ woò kɛ̀ wo Jisɛ̀ nàŋ yaà wo Kààmɔɔŋ gbeeɔ̀, wo yèɔ kuwa e gààaŋ wèè wo fàsàì ke Sàwà Dayàa, yèè wo yèɔ kaà maŋ keì e nyaàiŋ dì e Kànà Dayàa. Maŋ keì kàauŋ màŋ zimgbe miŋ yaà gbònògbono miŋ e ɗì nɔɔnɔŋ sùà. (1) E kàauŋ nɛ̀ wɔŋ tolòɔ dìmɛ̀, e yèɛ nyaàiŋ naŋ dè kè kpèè, maŋ nyɛ̀nɛŋ kpààŋ kɔɔ, e kpùùmaŋ, yèè ke dòmaàŋ wèè anyùùŋ nyaŋ e Kànà àìjɛnɛ̀ŋ dìì (kàɓànè 5-7); (2) e tòmoɛ̀ wò naŋ wòò anyùùŋ màŋjɛ̀wɛ̀ zììyà jɛ̀wɛ̀ tìyèe nyàŋ wèè aŋ nyɛ̀nɛ̀ŋ lɛ (kàɓànè 10); (3) maŋ kàɓanè màŋ e nyaàiŋ dè e Kànà àìjɛnɛ̀ɛŋ (kàɓànè 13); (4) e fàsàì e kàaà e nyaàiŋ dè e tòmò anyùùŋ màŋjɛ̀wɛ̀ nyaŋ (kàɓànè 18); yèè (5) e kàaà e nyaàiŋ dè e teengaà e ɗuunyaŋ lɛɛ̀ do nàŋ jùò lɛ yèè e teengaà e Kànà Dayàa do nàŋ hnè lɛ (kàɓànè 24-25).
E ɗewe kiiɛ̀ àŋ naŋ gòònò maŋ keì wòo titi màŋ lɛ
Aŋ nèwàènèwè yèè ke ɗɔ̀ɔ̀ kòmàŋ Jisɛ̀ Kulaìɛ (1.1–2.23)
E tòmò Jɔ̀ɔŋ Gùà Nyùnɔ̀ɔŋ (3.1-12)
E gùà Jisɛ̀ɛ yèè e wàaà wò naŋ kɔ̀ dìì lɛ (3.13–4.11)
E tòmò Jisɛ̀ɛ ko ɓài wɔŋ fùɔ̀ŋ Galaliìɔ (4.12–18.35)
Yìwìà ko Galaliì e kà ko Jùlusɛ̀làm (19.1–20.34)
Ke wikì dìàmaàŋ ko yèè e gbɛ̀ɛ̀ ko Jùlusɛ̀làm (21.1–27.66)
E teengaà wo Kanaà Jisɛ̀ naŋ wa yèwè e fàaà dìì yèè wò naŋ fòlò anyùùŋ feìŋ lɛ (28.1-20)
ទើបបានជ្រើសរើសហើយ៖
Maafiù Ke jii gbài e nyaàiŋ dè wɔŋ fɛi wɛɛ̀ŋ: WFESD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gola New Testament Translation and Literacy Project © Bible Society in Liberia, 2019.