Nyɛ̀nɛ̀ŋ 12
12
E nìmìnlà anyuùŋ hààwe nyàŋ ɓɛìŋ
1E teengaà lii sùà wo Kanaà Hɛɛlɔ̀ naŋ wa tɔ̀ɔ̀tù ke gbòò anyuùŋ hààwe nyàŋ bà nìminla. 2Wò naŋ wa nyɛ̀nɛ̀ŋ aŋ kààlòòɗùà nyaŋ aŋ jìwìà wo Jìiiŋ e koya fòo, wo wùìyà Jɔ̀ɔɔ̀ŋ. 3Nààŋ wo Hɛɛlɔ̀ naŋ wa yɛmɛ̀ kɛ̀ tɛɛ̀ naŋ wa fɔ̀ɔ̀yɛ̀ aŋ Juùù nyaŋ jii, wò naŋ kɔ̀ yèè wò naŋ kùwò wo Pììlɛ wuŋ pɛɛ. Wò naŋ wa tɛɛ̀ zà nyɛ̀nɛ̀ŋ e tèèngà wɔŋ Ɗàà Gè Gbɔ̀u Gò Jòwàa. 4Kpeiŋ wò naŋ gbìɛ̀ŋ wo Pììlɛ ko sààŋ nyìwì, yèè wò naŋ wòò maŋ gbòò kààlòòɗùà ɗì tiinàŋ, ke yèɛ kuwa wa anyùùŋ tiinàŋ ke gbòò gbiŋ sùà wèè auŋ yɛ̀mɛ̀ diɛŋ. Wò naŋ wa ɗewè wèè wouŋ hìàŋ ko fɛ̀ɛ̀fèìŋ anyùùŋ nyaŋ sèè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ juo wèè wouŋ gbaì. 5Wò naŋ wa gbìɛ̀ŋ wo Pììlɛ ko sààŋ nyìwì, kɛɛ anyuùŋ hààwe nyàŋ naŋ wa nɔ̀ŋ zoolo koɓɛ̀ Dayài wèè Pììlɛ.
Wo màikàa gè wo Pììlɛ ko sààŋ nyìwìi
6Wɔŋ dùùm guùŋ wiiŋ nààŋ wo Hɛɛlɔ̀ manaŋ wa naàŋ wèè wouŋ hiàŋ wèè auŋ gbaì, wo Pììlɛ hawa wa aŋ kààlòòɗùà tìyèe e fèemàŋ wò yaà maŋ jàwè. Àŋ nauŋ wa dìkìè maŋ jɔ̀ɔ̀ tìyèe. Aŋ kààlòòɗùà tìyèe joo sia wa wɔŋ gbèmgbèè ke sààŋ nyìwìɛ feìŋ àŋ yaà wuùŋ tunie nyiŋ pɛɛ. 7Ko fɛɛ̀feìŋ wo màìkà wo Kanaà nao haì, yèè e hmɔɔ̀ŋ mɛ̀ɛŋ naŋ dè ko sààŋ nyìwìi e gbàì ko gbiŋ. Wò naŋ mɛ̀ɛ̀mɛ̀ɛ̀ŋ wo Pììlɛ wɔŋ gbaŋ yèè wò nauŋ tùngò. Yèè wo màikàa nauŋ woò wààŋ, “Yewà dìì fiò.” Yèè maŋ jɔ̀ɔɔ màŋ yàùŋ maŋ kùàŋ maŋ naŋ filè maŋ sɔ̀à. 8Wo màikàa naŋ woò wààŋ, “Dekà e tɛkì mɔ̀ɛ̀ yèè muŋ seelè maŋ baum màŋ.” Wo Pììlɛ naŋ yɛi nyɛ̀nɛ̀ŋ, yèè wo màikàa naŋ ɓɛìŋ woò wààŋ, “Gɔ̀aì wɔŋ kùmà mɔɔ̀ŋ yèè muŋ dèim maŋjɛ̀wɛ.” 9Wo Pììlɛ naŋ dè wo màikàa maŋjɛ̀wɛ aŋ fòlà. Kɛɛ wò naŋ wa gongò kɛ̀ e yèɛ kinɛiŋ yaà wa kaaiŋ lɛ̀ e fè wa tɔ̀ɔ̀nyaàŋ, wò naŋ wa gongò kɛ̀ è yaà wa nɔŋ e gɔa gòo. 10Àŋ naŋ kɔ̀ aŋ gɛ̀ɛ̀ maŋ gbòò ɗì tìyèè aŋ kààlòòɗùà nyaŋ, yèè nààŋ àŋ naŋ hàì wɔŋ gbèmèè maŋ kàìɔ feìŋ wèè wɔŋ gɔ̀ɔ̀uŋ naŋ kìlìè e jawa gbeeɛ̀ wɔŋ, wɔ̀ŋ naŋ yilè kùàŋ wùŋ maŋ wuŋ. Àŋ naŋ fòlò yèè àŋ naŋ kààìŋ ke dòmaàŋ kpoloo, yèè ko fɛɛ̀feìŋ wo màikàa naŋ jɔ̀ɔ̀nɔ̀ŋ wo Pììlɛ fɛ̀ɛ̀.
11Yèè wo Pììlɛ naŋ ngàà hnè wuŋ bi sùà yèè wò naŋ woò wààŋ, “Kà ngàà nyìmàŋ tɔɔɓaa, kɛ̀ wo Kanaà naŋ tùɔ̀ŋ wo màikàuŋ nɔɔ̀ŋ wèè woim joeyè e yìwìà wo Hɛɛlɔ̀ yèè anyùùŋ gbèègbèè aŋ Juùù nyaŋ sìwè wèè e keì naanààaŋ kinɛiŋ àŋ naŋ ɗewè wèè aim kaaìŋ lɛ.”
12Wo Pììlɛ naŋ kɔ̀ ko gbòò Mèèle, wo nààŋ Jɔ̀ɔɔ̀ŋ wo yèɔ àŋ hewa ɓɛìŋ nyààŋ wo Mài wɔ̀. Kuŋ anyuùŋ hààwe nyàŋ zimgbe nyiŋ naŋ wa dèènè koɓɛ̀ guùŋ àŋ yaà zoolo. 13Wò naŋ kpùlò wɔŋ gbàngiɔ̀ yɛmgbɛ̀, yèè wo ɓɔì jɔùŋjɔaà àŋ nyaaŋ Lɔdà wɔ nao hnè wèè wo yɛmɛ̀ sèè mààŋ kɛ̀ ɓòò wo. 14Nààŋ wò naŋ wa kòmò ke mìè Pììlɛɛ̀ yèè wò naŋ nyiŋ jààèjii, e zɔlɔ̀ɛ nauŋ wa diè, kɛɛ wo gò wa yìlè wɔ̀ŋ gbàngiɔ̀ yɛmgbɛ̀. Wò naŋ wa kɔ̀ɔ̀ maŋ dùàŋ yèè wò naŋ niŋ wòò anyùùŋ nyaŋ ko saaìŋ kɛ̀ wo Pììlɛ nàŋ sia wɔŋ gbàngiɔ̀ feìŋ ko jɔɔlèi. 15Kɛɛ anyùùŋ nyaŋ gbiŋ naŋ wa wòò wo jɔùŋ ɓɔìjɔ̀àa nyààŋ, “Mùŋ naŋ sààŋ ke gbòà!” Kɛɛ wò naŋ nyiŋ woò wààŋ e tɔɔɓaa wo Pììlɛ wo. Yèè àŋ naŋ woò nyààŋ, “Wo màikàuŋ nɔɔ̀ŋ wo.”
16E tèèngà guùŋ bi wo Pììlɛ yaà wa nɔŋ kpùlìè wɔŋ gbàngiɔ̀ yɛmgbɛ̀ keleiŋ; nààŋ àŋ naŋ wa hnè yèè àŋ naŋ yìlè wɔŋ gbemeeɔ̀ àŋ naŋ yɛ̀mɛ̀ wo Pììlɛ, è naŋ nyiŋ wa foonò. 17Kɛɛ wo Pììlɛ naŋ nyiŋ gbùùyè maŋ kùàŋ wèè aŋ nɔ̀ŋ gìli. Kpeiŋ wò naŋ nyiŋ wòò e ɗewe kiiɛ̀ wo màìkà Kanaà nauŋ fulìè lɛ e yìwìà ko sààŋ nyìwìi. Yèè wò naŋ nyiŋ ɓɛìŋ woò wààŋ, “Wòoiŋ tɛɛ̀ koɓɛ̀ Jìiìŋ yèè anyuùŋ hààwe gbànaŋ nyàŋ wèè e yèɛ naŋ kaaìŋ lɛ.” Eɓìèmàŋjɛ̀wɛ̀ tii, wò naŋ nyiŋ jòò yèè wò naŋ kɔ̀ koɓɛ̀ joo bà.
18Wɔŋ niìsìaà bàa, maŋ jii sɛ̀ɛ gbee naŋ kùwò aŋ kààlòòɗùà nyaŋ yàaùŋ wa tùnìàŋ sùà nyaŋ yèè àŋ naŋ kùùnò gòngo kɛ̀ kiìŋ naŋ kààìŋ wo Pììlɛ. 19Wo Hɛɛlɔ̀ naŋ wa wòò aŋ kààlòòɗùàuŋ nyàŋ wààŋ aŋ kamèuŋ, kɛɛ aŋ gòuŋ wa yɛmɛ̀. Wo Hɛɛlɔ̀ naŋ nyiŋ dawè dàwè è naŋ jùò, yèè wò naŋ fè e gààŋ wèè aŋ jìwà aŋ kààlòòɗùà nyaŋ yaà wa tùnìàŋ sùà ke sààŋ nyìwìɛ nyàŋ.
Eɓìèmàŋjɛ̀wɛ̀ tii, wo Hɛɛlɔ̀ naŋ yèwè ko Jùdià yèè wò naŋ kɔ̀ wèè wo nɔ̀ŋ ko Sesèlià wèè e teenga kpàa bà.
E fà Hɛɛlɔ̀ɛ
20Wo Kanaà Hɛɛlɔ̀ naŋ wa tùù anyùùŋ Taà nyaŋ yèè anyùùŋ Sidɔ̀ɔ̀ŋ nyaŋ sìwè, kpeiŋ anyùùŋ nyaŋ ko Taà yèè ko Sidɔ̀ɔ̀ŋ naŋ jàà ke gbòò yèè àŋ naŋ kɔ̀ koɓɛ̀ wo nyuùŋ gbeeɔ̀ sia wa ke sààŋ gbèè Hɛɛlɔ̀ɛ feìŋ wɔ àŋ nyaaŋ Balisɔ̀ wèè aŋ pɔwɔ̀uŋ wo kpuumàŋ nyiŋ. Yèè àŋ naŋ kɔ̀ wèè aŋ dawè wo Hɛɛlɔ̀ wèè aŋ banè e fèemàŋ nyiŋ nɛ̀ ke jii fàa sùà, esaɓù kɛ̀ anyùùŋ nyaŋ ko Taà yèè ko Sidɔ̀ɔ̀ŋ hewa gè enɛ̀nje nyiŋ nɛ̀ wɔŋ fùɔ̀ŋ kanaà Hɛɛlɔ̀ sùà.
21Àŋ naŋ wa jàà ke ɗɔɔ ɓula wèè aŋ mɛ̀ɛ̀ŋ wo Hɛɛlɔ̀. Ke ɗɔɔ bi wo Hɛɛlɔ̀ naŋ gɔ̀à maŋ dèè kanauŋ màŋ yèè wò naŋ jɛ̀ì ke kpùà kanauŋ nɛɛ̀ŋ diɛŋ, yèè wò naŋ gbòò koɓɛ̀ anyùùŋ nyaŋ. 22Yèè anyùùŋ nyaŋ naŋ kpààŋ nyààŋ, “Mùŋ yaà gbuuye mààŋ wo dayà, kɛɛ e fè mààŋ wò nyuùŋkpùuŋ!” 23Ko fɛɛ̀feìŋ, wo màikà Dayàa naŋ gbìɛ̀ŋ wo Hɛɛlɔ̀ e sàaŋ, esaɓù kɛ̀ wo gò wa jòòwò Dayà, yèè aŋ gbìiŋ nauŋ gbìlè.
24E tèèngà guùŋ bi sùà anyuùŋ zimgbe naŋ wa kòmò ke mìè Dayàa yèè àŋ naŋ nyiŋ haawè.
25Yèè nààŋ wo Bànaŋɓà yaà wo Sɔɔ̀ naŋ wa kpɛ̀ɛ̀yɛ̀ e tòmoɛ̀ àŋ naŋ wa kɔ̀ nyinie lɛ̀, àŋ naŋ kɛ̀ɛ̀ maŋjɛ̀wɛ ko Jùlusɛ̀làm. Àŋ naŋ wa kɔ̀ɔ̀ wo Jɔ̀ɔŋ, wo yèɔ àŋ nyaaŋ wo Mài wɔ̀ maŋjɛ̀wɛ nyiŋ.
ទើបបានជ្រើសរើសហើយ៖
Nyɛ̀nɛ̀ŋ 12: WFESD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gola New Testament Translation and Literacy Project © Bible Society in Liberia, 2019.
