ओसाचीर 17
17
पावल स़ोनो सिलासनी थेसलोनिकेदा निबाव
1नकिन पावल स़ोनो सिलासनी अम्फिपोलिस स़ोनो अपोल्लोनिया सहरलाव घ्याँ बाद थेसलोनिके सहरल केस्किनी। नल यहूदीराए धर्मसास्त्र झ़िम तोबो उलिज़्याव। 2पावलए ङ़ादाकिनकाव ओदोज़्याव मिताव ज़ स़ोंसाता पै ऩासिन्या छ्याम नो याझ़िमल बाद धर्मसास्त्रलाव सर्सिउ पाँर पलास्द्याद, 3“ ‘ख्रीस दुखर सहिद, सिद सैंसिउ परिन्या ज़’ लिद भाःकिन ज़ धर्मसास्त्रल सर्सिउ उलिज़्याव,” है दाद थ·रैद याएक्यो। फरी, “आव है ङादाचिज़्याव येसु ज़ नो ख्रीस,” है मनी यादोक्यो। 4नो पाँत ख्वा ख्वा यहूदीर यायुँ हुप्द पावल स़ोनो सिलासनिस खैकेर। परमेस्वरए ओमान नैज़्याव कुधु ग्रीकर स़ोनो सहरलाव यामिन थासो मेंमाराए ब यायुँ हुप्के।
5छुत यहूदीर ते यामी तूद बजार जीलाव अइज़ दुलिरिज़्याव सँधुवारालाई दुप्द नो सहरल खैलानी बैला जैव यारापरींकेर। नोर पावल स़ोनो सिलासनी निलिज़्याव तोबो यासोनए उझ़िमक बाद नोनिलाई पले·व पैंकेर। 6खाली नोनिलाई मादैद झन यासोनलाई ख्वा ख्वा यायुँ हुबोरास क्योःद अदालतदा स़ेले स़ेले लाँद, “नो सहर सहर दुलिद खैलानी बैला जैज़्यावनी गे गेसहरल ब निहुवत, 7यासोनए ओल्योक बासिउ निएक्यो दी। नोर माहाराजाकिन प़ाइँ तँदा जैसिद नोराए याराजा येसु ज़ है लिज़्यार,” है लिद क़िउ ज़ लिकेर। 8नोराए यापाँ थैद सहरलाव मिँर स़ोनो याघेप्पार बनै ज़ मचिकेर। 9है जैद यासोन स़ोनो ओनैंरालाई धरौतील याराऱास्केर।
पावल स़ोनो सिलासनी बेरियादा निबाव
10नम ओझ्याक नलाव दाज्यु भाइराए पावल स़ोनो सिलासनिलाई हतप्त ज़ बेरिया सहरदा यारापरींकेर। नल निकेसोत फरी ब यहूदीराए धर्मसास्त्र झ़िमक बाकिनी। 11बेरियालाव यहूदीर ते थेसलोनिकेलाव मिँराकिन यातह ल्योर यालिज़्याव। नोराए पावल स़ोनो सिलासनी निपाँत बनै ज़ धिद थैद, ‘आवनी निपाँ साचो मालिज़्या’ लिद दिनकाव ज़ धर्मसास्त्रल याचिऊज़्याव। 12है जैद नोर येसुए ओपाँत कुधुए यायुँ हुप्के। नोरास यामान ल्यो ग्रीक खेपा मेंमार ब सर्बा ज़ याल्यो।
13खाली थेसलोनिकेलाव यहूदीराए, ‘पावलए बेरियाल मनी परमेस्वरए ओपाँ यासथैज़्याव दी’ लिन्या थैद, नदा मनी माहोल्यारालाई यारामचैनाकेर। 14है जैद नलाव यायुँ हुबोराए पावललाई जोगोइन्याए जूँनी समुन्द्र छ्योक पै सारैनाकेर। सिलास ते तिमोथीस नल ज़ लिकिनी। 15है जैद पावललाई सारैना बावराए एथेन्स सहरक पै लाँकेर। ननी ओल्द बाव यापैंज़्याक पावलए नोराए कुइत सिलास स़ोनो तिमोथीनिलाई, ‘ओताकिन चाँदो ज़ हुचिन’ लिन्या था परींक्यो।
पावल एथेन्सल
16पावलए एथेन्स सहरल सिलास स़ोनो तिमोथीनिलाई कींद उनिनैज़्याक नलाव कुधु अङग्यार रँःद उयुँर माचाव दाद, 17धर्मसास्त्र झ़िमल बाद नलाव यहूदीर स़ोनो परमेस्वरए ओमान नैज़्याव ग्रीकरास कुधु ज़ याखर्लेसिज़्याव। बजार जील आदा होदा लिज़्यावरास मनी दिनकाव ज़ ओपाँज़्याव। 18तछा इपिक्युरी स़ोनो स्तोइकी यादोज़्याव धर्म मानिज़्यावर हुद ओपाँ थैद खर्लेसिनाकेर। पावलए येसुए ओपाँ सथैद, ‘सिउनी सैंसिके’ है लिन्या पाँर ओरासथैवए नोर ख्वा ख्वाराए, “काता ओपाँज़्याव, निताव त्यात्यानी तितिव?” है यालिज़्याव। ख्वाराए फरी, “काताङाव देवताराए यापाँ ओपाँज़्याव ताक्या?” है ब यालिज़्याव। 19छींनी नोराए अरियोपागस कचरीक लाँद, “नो साःरो पाँए ओअर्थ खास काता उलिज़्याव? गेलाई है दासिके। 20गे अनवार्यासो ज़ गेथैज़्या। ओअर्थ पलास्द्याद फरी ब तखेप थैव गेदैक,” है दोकेर। 21नो एथेन्सलाव मिँर स़ोनो यासहरल छुतनी हुद लिज़्यावराए पाला जम्मा साःरो पाँर थैन्यात वाज़ लहर यादोज़्याव।
22है जैद अरियोपागस कचरीक पावल प़ाइँए याङ़ाक च्याँःसिद, “अ एथेन्सलाव मिँर, जे धर्म खिम्न्यार जेलिज़्याव ओल्यो ङामीए ज़ रँःद ङानैचिए। 23जेसहरलाव पुजा दान्या पोर आदा होदा ङालिक तोबो थानत, ‘सुए ज़ यामासरेस्ताव ईस्वर’ सर्सिउ उलिज़्याव ङारँःके। ङा है ङादाचिज़्याव परमेस्वर नो मासरेस्द जेमानिज़्याव ईस्वर ज़। 24प़ाइँ जैज़्याव परमेस्वर नाम नमलावराए गेङ़ैताव ओतावए कुइए जैसिउ मन्दिरल मालिधुइ। 25होलाई मिँए ल्योनी काता ज़ खाँचो ब माले। झन गेलाई चाहिज़्याव भरी होए ओल्योनी ज़ हुज़्या। आव गेजिउ ब होए ओल्योनी ज़, गेस॰ ब ओल झाःद ओयासिउ ज़।#१ राज ८:२७; यसै ४२:५ 26तोबो मिँए ओक्याँनी ज़ आव मानुवाताव प़ाइँ जातलाव मिँरालाई याजैक्यो। नोरालाई सु सु लिन्या यापो, सु सु याबेला ब ओल ज़ थ·रैद याएक्यो। 27है जैद ‘ङालाई छाम छाम जैद तादी ब कसा खिम्द मादैनार’ है लिद ओल ज़ इताव जैक्यो। हैदी ब परमेस्वर गेकिन तादाङ माले। 28गे होए उकुइत ज़ ताद ओलनी ज़ गेबाँचिज़्या, ओलनी ज़ गेचलिज़्या। जेसकाव सैंन्याराए मनी, ‘गे ओल ओज़ार ज़ गेलिज़्या,’ है लिद लेर।
29“है जैद गे परमेस्वरए ओज़ार गेताकिन, कै जैद ओल ते सीं लुँ ओताज़्याव? सुन चाँदीए जैसिउ अङग्या ते अइज़ मिँए युँ स्यानी जैसिउ ची। 30ङ़ादाकिन परमेस्वरलाई मासरेस्दकाव अऩाकलाव गेदोव भरी ते आथ पाला पै गेचार ताके। आकिनी ते परमेस्वरए प़ाइँनिकाव मिँरालाई ‘निताव माचाहिउ य़ेन भरी ऱास्द ङाल्योदा हुचिके,’ है दासिज़्याव। 31मानुवाताव मिँराए न्याय फाल्न्या ब ‘आव छ्याम ज़ तारिज़्या’ लिद थ·रैद नैव। सतस न्याय फाल्न्या मिँ ब ‘आव ज़’ लिद प़ाइँए याङ़ाक सिउनी सोचोइद थ·रैद याएक्यो,” है यादोक्यो। 32‘सिउनी ओसोचोइव’ है ओरादोव याथैक ख्वा ख्वार स़ास्केर। ख्वाराए फरी, “छींनी ब तछा नपाँ थैव गेदैक,” है दोकेर।
33है जैद पावल ननी पुलुस्द ओबाक, 34ख्वा ख्वार ओल्योदा जैसिद ओपाँत यायुँ हुप्के। नोरानी अरियोपागस कचरीलाव तोबो दियनुसियस ओल्यो, तोबो दामारिस यादोज़्याव मेंमा ब ओल्यो। नोनिस छुतर ब याल्यो।
ទើបបានជ្រើសរើសហើយ៖
ओसाचीर 17: NKham
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, Wycliffe Bible Translators, Inc. All rights reserved.
