Hechos 5
5
Eta mapekatura'i ema Ananías ésupa esu mayena Safira
1Matiari'i ema achane tikaijare'i Ananías, ésupa esu mayena Safira. Náijararekapa ena eta naye'e apake'e napenapa'ini. 2Ema maka achane makaerajikapa tikutimuri'akaka eta plata tawacha'i eta maye'e apake'e. Esu mayena suécha'i eta mayumurusira'i eta plata. Te títekapapa ema achane naye'e ena apústuleana, maíjarakapa. 3Ema Pedro máichapa:
–Ananías, ¿tája'a takayema písapawa'i tikaetemavi ema Wínaraji? Pipanerechaipa piwayuarakayare ema Machanewa ema Viya, eta piyumurusira'i eta tawacha'i eta piye'e apake'e. 4Píma'a, piye'eichu'i eta apake'e píjarareru'i. Nájina tipamikavina eta pinakisirawaya, puiti eta juka. Pépiya'ira'ipaipa, pímijacha'i tamutu eta juka plata tawacha'i eta piye'e apake'e. Pátupiruwapaini eta piwara'akene'i pinakika. Ema Viya máimararaka'i eta juka pépiya'iraiwa'i. Wa'i vítina'ini piwayuaraka'ini.
5Te masamapa ema Ananías eta juka, tiákipaikawapa, matupiru tépena. Te nasamairikapa ena achaneana, namutuine'i tipikana. 6Taka'e, narari'i ena natupara'aichu'i tékararekana. Nave'apa eta máke'e ema Ananías, náyuruakapa, námapa te ekari, náekarapanapa.
7Te táekenepa eta mapanakene ura, títekapapa esu mayena ema Ananías. Wícha'a suécha'ini eta máicharakawa'i ema suima eta máepeniraipa'i. 8Ema Pedro mayaserekapa:
–Pimetakanu, ¿éta'ipuka tamutu eta tawacha'i eta eye'e apake'e?
Esu sujikapapa:
–Eta tawacha'i tamutu.
9Ema Pedro máichapa:
–¿Tája'a takayema ekutikaka'i eta juka épiya'iraiwa'i, ewayuarasira'i ema Machanewa ema Viya? Áwane tichawana ena tékarapanana'i ema pímaini. Tási'a, puiti pítipawayare tiámavianayare.
10Eta máichira'i ema Pedro, enewanepa tiákipaikawa'i esu te máiwapechakaya. Tépenawarepa. Te tichawanapa ena tékarapanana'i ema suímaini, náima'aine'i esu tépenaipaware. Nave'awarepa esu, námawarepa náekarapana te machakaya ema suímaini. 11Te nasamairikapa namutu ena achaneana, ichapeine'i eta napisira.
Máijaraka'i ema Viya ena apústuleana eta náimeresiraya eta tiáramikareana
12Ena apústuleana, ichape eta máijarasirawaka'i ema Viya eta náimeresirayare eta tiáramikareana te namira'u ena apamuriana achaneana. Tikurujikakána'iware tamutu sácheana ena tisuapajira'iana te peti náurujisirarewa te taju'e eta templo, tikaijare Salomón. 13Namutu ena apamuriana achaneana máe'ikara'anaicha'a, wa'i napatsikawa'ini nakanara taicha namutu napikaucha'i. 14Kamurianapaipasera ena ajairana énapa ena esenana ena té'ikanapaipa'i ema Jesús. 15Taka'e, námawakapa'i ena apamuriana nakajumakeneana, nanakikapaipa te calleana mayani'ayare'i ema Pedro. Eta máetavisirayare'i ema, távichayare eta makuna, takanarakayare'i eta najumana. 16Éneichuware, títekapanapa te Jerusalén ena achaneana tiási'ana te awasareana nachakayara'ana'i. Námapa'i ena nakajumakeneana énapa ena náwa'aruana ena éreanana. Namutu ena nani tinarakanapa'i taye'e eta náichawakenewana'i.
Naémeratakapa ema Pedro émapa ema Juan
17Emasera nákenumuri, énapa ena machamuriana Saduceoana'i ena, nakapinaruine'i tisemanapa táichavene'i eta náe'isira'i ena kamurikeneana achaneana eta náimiturapi'i, 18Taka'e, nakawanairipipa nakaratatajika ena apústuleana, náimisiapapa te nakaeratairare namutu ena kavviurewana. 19Émasera ema Viya majaneakawaka'i ena, te jena yati, mawanekapa ema maye'e ángele, mavejiapana eta nakaeratairare návi'a'i ena, mawanekapa náuchuka, ánipa maicha: 20“Eyana ímerekawa te jena templo, emetaka namutu ena achaneana tejena awasare eta juka nuwanairipiana mawaraira'i ema Viya máitsiwachaya arairuya eta náitaresirayare.” 21Náuchusi'apa ena apústuleana te nakaeratairare, timapikuku'icha'a te tiyananapa taye'e eta te templo. Tina'akawanawarepa tímiturekana.
Taka'e, te jena yátikara'i ema nakenumuri máimichu'apa namutu ena apamuriana tuparairukana énapa ena náiyakarana israelítana. Te tiúrujikawanapa namutu taye'e eta naurujisirarewa, nakawanairipipa náepana ena apustuleana eta te nakaeratairare. 22Te títekapanapa te nakaeratairare ena suntaruana, navejiakapa eta tapaja. Nájinaipa'isera, taka'e, tichawanapa naye'e ena nákenuru'ana, nametakapa eta nájinairaipa'i ena apústuleana, 23taka'e, náichapa:
–Te vítekapauchapa eta nakaeratairare, víma'apa tanasi'i tikaerata'i eta tapaja. Natiari'iware ena sentinélana tijaneakana'i eta tapaja, taka'e te vivejiakapa eta tapaja, nájina émanaina'ini vichimapa'ini te taju'e.
24Te máechapa ema nákenumuri, énapa ena machamuriana tuparairukana, émapa ema nákenumuri ena tasuntarurana eta templo, náramine'i ichape, taka'e, náichakakapa: Tája'a takayema eta juka Waipa vímatiekene'a tája'apuka vícharakawaya. 25Téchejirikawanaicha'a ena, títekapanecha ema émana achane. Mametakawakapa ena. Ánipa maka'e:
–Ena naena ajairana érataruana'i te nakaeratairare, náena'i ánaki te templo tímiturekana'i naye'e ena achaneana.
26Taka'e, ema nákenuru'a ena suntaruana, émajakaruwapa tiyana, mámamuri'apaipa'i ena suntaruana, náepanayare'i ena apústuleana, jé'esare, námamuri'apa, tájinasera náicharakapa'ini eta námirapa'i taicha napika'i ena apamuriana achaneana natupisikawaka'ini te márija'iana. 27Te nakaitekapapa, nakatupi'apa te namuri ena tuparairukana, tási'a, ema nákenumuri ánipa maicha:
28–Víti viwaneka'e'i muraka eta waipa ekuapechawa ekuimitureka eta máechepusira'ipuka ema Jesús, tási'a, eti ímiyanawaichucha ímitureka, namutupa ena achaneana taye'e eta juka viáwasa Jerusalén náitukapa eta ímiturapiana eti, ¿Tája'a takayema wa'i esuapa'avi'ini? Visapi'apa ewara'a vítiyare táekati'a eta máepenira'i ema achane.
29Taka'e, ema Pedro énapa ena apamuriana apústuleana najikapapa, ánipa naicha:
–Tatúparaka matiwayare visuapa ema Viya, ema tisuapakarepana eye'e eti. 30Víti, vé'ika'i ema Viya, émaichu'i nakasiñakene'i ena viáchukanaveanaini, éma'i ema tikaechepuka'i ema Jesús, ema ímikaparu'i eta émetatasira'i te crusu. 31Tási'a puiti, ema Viya máunaka'i te anuke'e anuma, makaejaka'i te mawaure taye'e eta trono, máijarakaipa eta matupara'ayare'i Akenukayare'i Tikatiura'iyarewa, taicha mawara'a'i ema Viya vimutuyare viti israelítana véñeuchawaya maye'e, apaesa ema tijapanu'aviyarewa taicha tamutu eta vipekaturana. 32Víti vitametaka'i eta juka taicha víma'akene'i eta mápechirawa'i títareka. Víti véchejisi'a'i maicha ema Machanewa Viya máijararu'avi'i ema Viya viye'e viti visuapana ema.
33Te nasamapa eta juka ena akenukana, tisemanapa, nawara'apa nakapakawakayare'ini. 34Matiari'i'isera te nataraku ema achane tikaijare Gamaliel, ema escriwánu'i fariseo, ema maka achane tikapika'u'i naye'e namutu ena achaneana. Taka'e, titupi'apa te namira'u. Makawanairipipa náuchukacha'a ánipina ena apústuleana. 35Taka'e, máichawakapa ena machamuriana akenukara'ana:
–Tátanaveana, nujaneanana israelítana, échapawa eta ewara'akene'i íchaya naye'e ena nani achaneana. 36Échapuka eti kape juka táitaresira'i, téchepuka'i ema émana achane tikaijare Teudas. Ema maka'e'i eta máitupajijiásirawa'i, tási'a, kamuriana ena achaneana té'ikana'i. Kuatrocientuana'i ena ajairana ena machanerana'i, tási'asera, nakapaka'i ena mánarana, tási'a, namutu ena té'ikanaini'i téjanerepaikana'i, títawapa tamutu. 37Tási'a, te táekenewarepa, te jena sache eta nakatupaira'i ena achaneana, téchepukawarepa ema apana ema tikaijare Judas, ema tikawasa te Galilea. Kamurianaware ena té'ikana'i, éneichu'iwaresera nakapaka'i ena mánarana, namutu'iware téjanerepaikana ena té'ikanaini'i. 38Tiuri puiti, esamanu eta juka numetaru'eya, ésamirikachucha ena nani achaneana, wa'i ekuimikasiapawa naye'e. Taicha eta juka náichakene'i te naye'echuchapuka ena, títawawaneyare'i; 39té'eserapuka maye'e'i ema Viya, wa'i erata'aima'i ekamitiaka, échapawachucha. Machu ekanara ema Viya.
Enasera nasuapawanepa eta maichirawaka'i. 40Taka'e, tésamirikawanapa namutu, náimisiapawarepa ena apústuleana. Náestakawakapa, tási'a, nawanekawarepa eta waipa nakuapechawa nakuechejisi'a eta máechepusira'i ema Jesús, tási'a, nakaitikawakapa. 41Taka'e, tiúchukanapa ena apústuleana te náurujisiawa'i ena tuparairukana, tiúrisamureanapaichucha eta nakaestaira'i, ema Viya máimararaka'i eta vikamichira'i tamutu eta náimikatsiriasira'avi'i táichavene eta vé'isira'i ema Jesús. 42Wá'ikene nakatsimawa'ini, tímiturekanaichucha tamutu sácheana, náechejisi'a'i ema Jesucristo, tímiturekana'i te templo étapa te pétiana.
ទើបបានជ្រើសរើសហើយ៖
Hechos 5: IGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testamento Ignaciano © Sociedad Bíblica Boliviana, 2004.
