Aroma 8
8
Tama kwa makakala ga Loo Mpeleteu
1Bai, nambi'yambi' ntu'pu' ukumu ya kiwo kwa mundu ywoywoti ywa Kilisitu Yesu. 2Kwa mwanjaa makakala ga Loo gagaleta ukoti kwa ndi'la ya Kilisitu Yesu gammi'kite ulu kuutalu na makakala ga sambi na kiwo. 3Nnu'ngu' aalipangite likowe li'lu' lyangaliwesekana pangilwa na salya kwa kitumbu sa ukigopi wa kiyi'ga. Nnu'ngu' aantumike Mwana wake abile na yi'ga nsawani na yi'ga yitu twabene sambi, li'nga apiye yi'ga yake panga salaka kwa kitumbu so bu'ya masambi gitu. Kwo panga nyo Nnu'ngu' aaipwati sambi muyi'ga ya Kilisitu. 4Nnu'ngu' aapangite nnya li'nga aki yaipatikana musalya itimi nkati yitu twenga twatukotoka tama kwa kwikoleya yi'ga, ila kwa kwikoleya Loo. 5Mwanjaa balu' babatama kwa kwikoleya yi'ga, batawalilwa na maminyikio ga kiyi'ga. Lakini balu' babatama kwa kunkoleya Loo Mpeleteu batawalilwa na maminyikio ga Loo. 6Manaitei maganio ginu kagalongoyelwa kiyi'ga galeta kiwo, ila mana maganio ginu kagalongoyelwa na Loo Mpeleteu galeta ukoto na amani. 7Kwa mwanjaa maganio gagalongoyelwa na ukigopi wa kiyi'ga, nga nndumu wa Nnu'ngu', kwa kitumbu gaiyu'wali salya ya Nnu'ngu' na wala gakombwali kwiyu'wa. 8Kwa nyo babatawalilwa na ukigopi wa kiyi'ga bakombwali kumpulaisa Nnu'ngu'.
9Lakini mwenga mutawalilwali na mwaipala yi'ga ila Loo Mpeleteu, manaitei Loo wa Nnu'ngu' katama nkati yinu. Ywoywoti ywangali Loo wa Kilisitu, aywo ywa Kilisitu lili. 10Lakini kwa mwanjaa nambi'yambi' Kilisitu atama nkati yinu, yi'ga yinu iwile kwa kitumbu sa sambi, lakini loo yinu ipanga ngoti kwa kitumbu sa aki. 11Loo Mpeleteu ywatama nkati yinu nga Loo ywa Nnu'ngu' ywannyu'yite Kilisitu Yesu bu'ka kuuwi'li. Kwa nyo Nnu'ngu' alu'a kwiiyu'ya ata yi'ga yinu yaiwaa kwa makakala ga Loo Mpeleteu aywo ywatama nkati yinu.
12Kwa nyo mwaalongo bangu', kanetutame kwo tawalilwa na ukigopi wa kimundu kwo koleya maminyikio gake. 13Kwa mwanjaa mana mwatama kwa kugakoleya maminyikio ga yi'ga mwalu'a waa, lakini mana mwaibulaga yendo ya maminyikio ga yi'ga kwa Loo, mwalu'a lama. 14Boti babayi'ki'tya longoyelwa na Loo wa Nnu'ngu', nga bana ba Nnu'ngu'. 15Nnu'ngu' aampeili Loo Mpeleteu li'nga mube mwaabanda babayogopa, ila li'nga mube mwabana bake. Loo ywo nga ywatuyangatia kunkema Nnu'ngu', “Tati' bitu!” 16Aywo Loo mwene akong'ondelya mumyoyo yitu panga twenga twabana ba Nnu'ngu'. 17Bai, kwa mwanjaa twenga twabana ba Nnu'ngu' twaalu'a pokya ulisi wake no baa pamope na Kilisitu muulisi wo. Manaitei twaaba pamope mungu'su'mbu' yake Kilisitu, na twaaba pamope kai' muutukupu wake wawaisa.
Utukupu wawaisa
18Nenga nibona panga ngu'su'mbu' yitu ya nsimu wu'no kili'beli landanisa na utukupu wu'lu' wawaalu'a umukulilwa kwitu. 19Kwa mwanjaa yumbe yoti ili'nda kwa kilu'lu' muno, nsimu Nnu'ngu' paalu'a kwaumukulya bana bake. 20Kila saakiumbite Nnu'ngu' saai kipu'ngu'ki'lwa baya kwake saikali muuyomolyo wake. Ago gaapangikeli mwaipala yumbe, ila Nnu'ngu' ngaayi'ki'tiye gapite kwo lolela liu'bi'lyo lyo, 21li'nga yumbe yoti ibi'ki'lwe ulu bu'ka kuubanda waualabika no peyelwa uulu wa utukupu wa bana ba Nnu'ngu'. 22Mwanjaa tutangite panga, ata nambi'yambi' yumbe yoti yendabu'bu'la kwa lwu'ngu' kati nnwawa mwene lwu'ngu' lwo papa. 23Kwenda yumbe kisabe baili, ila na twenga twatupeyilwe Loo kati kitomolelyo, nkati tuli'la kwa lwu'ngu' katuli'nda bi'ki'lwa ulu kwa yi'ga yitu. 24Kwa mwanjaa tubile na liu'bi'lyo bu'ka Nnu'ngu' paatukosopolile. Lakini mana saukiu'bi'lya kakibonekana, kipangali liu'bi'lyo kai'. Buli, abile mundu ywau'bi'lya pata kili'be sabile naso? 25Lakini tuu'bi'lya kili'be sangali kibona, kwa nyo tukili'nda kwa kilu'lu' no komeya.
26Pamope na ago, Loo Mpeleteu ngaywatuyangatia muukigopi witu, kwa mwanjaa tumanyilili lu'ba mwaipalikwa. Lakini Loo Mpeleteu mwene atulu'bya kwa Nnu'ngu' kwa lwu'ngu' no bu'bu'la kwangaliyaulika. 27Naywembe Nnu'ngu' ywaipekeseni myoyo, agatangite mabinio ga Loo, kwa mwanjaa Loo aalu'bya apeleteu bu'kana na mwapendi Nnu'ngu'.
28Tutangite panga mumakowe goti Nnu'ngu' apanga kasi li'nga kwapeya manogau balu' babampenda. Aba nga bandu baakemite Nnu'ngu' bu'kana na mabinio gake. 29Nnu'ngu' aatangite bandu bake kubile balo umbilwa kwa dunia. Abo nga baasawile babe kati mwabile Mwana wake Yesu Kilisitu. Aapangite nyo li'nga Mwana wake abe mmele mualongo baingi. 30Nnu'ngu' balu' baalongoli kwasawa nga balu' baakemite abalangili panga bene aki, na abo nga balu' baapei utukupu wake.
Upendo wa Nnu'ngu'
31Bai, tubaye buli bu'kana na makowe ga? Manaitei Nnu'ngu' abile lwingo lwitu nyai ywakombwa taukana na twenga? 32Nnu'ngu' aannei Mwana wake mwene, na kumpiya awee kwa kitumbu situ twaboti. Kwa nyo, manaitei aampiyite Mwana wake kwa kitumbu situ, bai aakosali ata kutupeya twenga balaka yoti, pamope na Mwana wake. 33Nyai ywakombwa kwasitakya bandu babasaulilwe na Nnu'ngu'? Ntu'pu', kwa mwanjaa Nnu'ngu' mwene ngaywaabalangilya panga babe bene aki. 34Nyai ywakombwa kwaukumu? Ntu'pu', kwa mwanjaa Kilisitu Yesu aatiwaa no yu'yi'lwa bu'ka kuuwi'li no tama kuluboko lwamalyo lwa Nnu'ngu', kai' endatulu'bya. 35Nyai ywakombwa kutulekangania na upendo wa Kilisitu? Buli, tabu, au siki, au ngu'su'mbu', au njala, au buula, au maule, au kiwo? Lili, mwomwoti mwatubile, Kilisitu ayendelya kutupenda. 36Kati mwagabaya Maandiko Mapeleteu, “Kwa kitumbu sako twendabulagilwa kila lisu'ba. Tubalangilwa kati ngondolo bo sinjilwa.”
37Lakini muago goti tupata usindi ntimya pi'tya Nnu'ngu' ywaatulayite upendo wake. 38Kwa mwanjaa kakape nitangite panga ntu'pu' kili'be sosoti sakiwesa kutulekangania na upendo wake, wala kiwo, wala ukoti, wala malaika au makakala gi'ngi' ga kunani, wala gagapitya nambi'yambi', wala gagaalu'a pitya nnu'ngi', wala utawala, 39ntu'pu' sakibile kunani yitu wala pai' yitu, wala kyumbe si'ngi' sosoti kiwesali kutulekangania na upendo wa Nnu'ngu' waulayite kwitu kwa ndi'la ya Kilisitu Yesu Bwana witu.
ទើបបានជ្រើសរើសហើយ៖
Aroma 8: Matumbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Pioneer Bible Translators
