Aroma 14
14
Kaneumukumu nnongogo
1Munkemi mumini nnyinu ywangalikomala muimani yake. Kanemutaukane nakwe bu'kana na maganio gake. 2Mundu mwene imani yaikomile endakombwa lya kila kili'be, lakini ywangalikomala muimani, alya likolo bai. 3Yu'lu' ywalya kila kili'be kaneansalawe yu'lu' ywakotoka lya, wala yu'lu' ywakotoka lya kila kili'be kaneamukumu yu'lu' ywalya kila kili'be, kwa mwanjaa Nnu'ngu' annyi'ki'tile. 4Wenga wa nyai ata umukumu ntumisi wa ywi'ngi'? Mana ayi'ma wiso mulyengo lyake au mana atu'mbu'ka, alyo lyaaba mmoko ga bwana wake. Na ywembe aalu'a yi'ma wiso kwa mwanjaa Bwana abile na uweso wa kunnyi'mi'ka.
5Bandu bi'ngi' bawesa balanga panga lisu'ba limo nga lya ngama muno kuliko li'ngi'. Na bi'ngi' babalanga panga masu'ba goti gabile nsawani. Kila mundu apalikwa panga kati mwaalu'a kwibona mwene panga nga kakape. 6Mundu ywabalanga panga lisu'ba limo nga lya ngama kulikoni li'ngi', apanga nyo kwa kitumbu sa kunkwi'ya Nnu'ngu'. Na ywalya kila kilyo, apanga nyo kwa kitumbu sa kunkwi'ya Bwana mwanjaa ansukulu Nnu'ngu'. Na ywakotoka lya kila kilyo, nyinyonyo apanga nyo kwa kitumbu sa kunkwi'ya Bwana na kunsukulu Nnu'ngu'. 7Kwa mwanjaa ntu'pu' ata yumo ywitu ywatama kwa kitumbu sake mwene, wala ntu'pu' ata yumo ywitu ywawaa kwa kitumbu sake mwene. 8Mana katulama, tulama kwa kitumbu sa Bwana, na mana tuwile, tuwaa kwa kitumbu sa Bwana. Kwa nyo, lama au waa, twenga nga mali ya Bwana. 9Kilisitu aatiwaa no yu'ka, li'nga abe Bwana wa bandu boti, yani ywa babawile na bababile bau'mi. 10Tumbwe lelo mwanjaa namani wenga umukumu nnongogo? Au kwa ki'li' wenga unsalawa nnongogo? Kwa mwanjaa twenga twaboti twaalu'a yi'ma nnu'ngi' ya kiti'gu' sa ukumu sa Nnu'ngu'. 11Kati Maandiko Mapeleteu mwagabaya, “Kakape Bwana abaya, kila mundu alu'a nikilikitya, na kila yumo aalu'a baya panga nenga nga na Nnu'ngu'.” 12Kwa nyo, kila yumo ywinu aalu'a awanikia makowe gake mwene nnu'ngi' ya Nnu'ngu'.
Kaneunku'baye nnongogo
13Kwa nyo tukotoke ukumiana, paali pake tubini leka panga sosoti sasaalu'a kumpanga aku'bale au kuntu'mbu'ya muumini nnyitu. 14Bu'kana na mayi'gano ga Bwana Yesu, kakape nitangite panga ntu'pu' kilyo sakibile kisapu kwa kibelekwe sake. Lakini mana mwene mundu kakibona panga kisapu, bai kwake ywembe kili'be so, kisapu. 15Mana wenga kaumpanga nnongogo ausunike bu'kana na kilyo so lya, bai iyendo yako ibu'kanali na upendo. Bai kaneuyi'ki'ti kumwobeya mundu ywa Kilisitu kwa kilyo saulya. Kwa mwanjaa, Kilisitu aawile kwa kitumbu sake. 16Mana kaukibona kili'be si' kinogau, kaneuyi'ki'ti kibayilwe kilau. 17Kwa mwanjaa ukulungwa wa Nnu'ngu' kwenda wo lya no nywa lili, ila wa aki, amani no napusika kwakupiyilwa na Loo Mpeleteu. 18Kwa mwanjaa mundu ywoywoti ywantumikia Kilisitu kwa ndi'la yi' apanga mwapala Nnu'ngu' no yi'ki'ti'lwa na bandu.
19Kwa nyo twikase muno panga makowe galu' gagaleta amani na gagatuyangatia sengana muimani. 20Kaneualabiye lyengo lya Nnu'ngu' bu'kana na kilyo. Kakape ilyo yoti inogite, lakini ipwaikali lya kili'be sosoti sakimpangiya nnongogo aku'bale. 21Nantali kotoka lya nnyama wala nywa divai au panga likowe li'ngi' lyolyoti lyalyaalu'a kumpangia nnongogo aku'bale. 22Bai si'lu' saukiu'bi'lya bu'kana na likowe lyo, kibe kwako wenga na Nnu'ngu' bai. Nantali mundu yu'lu' ywangali ba na kitumbu sa kwiukumu pamoyo wake papanga kili'be na kukibona panga kibile sawasawa. 23Lakini mana mundu abile na kyenyo bu'kana na si'lu' kilyo salya, aywo aukumilwa na Nnu'ngu', kwa mwanjaa mundu ywo apangite si'lu' sau'bi'lya nga kisapu nnu'ngi' ya Nnu'ngu'. Mana mundu kapanga sosoti sakotoka u'bi'lya panga nga sawasawa, apo nga paapanga sambi.
ទើបបានជ្រើសរើសហើយ៖
Aroma 14: Matumbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Pioneer Bible Translators
