2 Akolinto 7
7
1Bai, mwaapendwa bangu', kwa mwanjaa tupeyilwe malagano ago goti, bai twipeleteye bu'ka mumakowe goti gagawesa sapuya yi'ga na loo yitu, no yendelya tama kwa kwipeleteya na kumwisimu Nnu'ngu'.
Pulaa ya Pauli
2Tulu'ba muyu'we myoyo yinu kwitu. Tunankosyali mundu ywoywoti, wala kunsulu mundu, wala kumpangya mundu maakau. 3Nilongela gano kwenda kwa kumuukumu lili, kwa mwanjaa kati mwanilongei patumbu panga mubile mumyoyo yitu. Tubile pamope na mwenga ata kwo lama au waa pamope. 4Nendakwipuna mala yambone kwa kitumbu sinu na kai' nendakwilumba, na munikamwimboko muno na kunipanga nipulaike muno ata manaitei kaniku'su'mbu'lwa muno.
5Patwaaikite Makedonia twaapu'mu'li lili kwa mwanjaa, twaabile mungu'su'mbu' kila lwingo. Panja paabile na mataukano, na mumyoyo yitu kwaabile na kyukala. 6Lakini Nnu'ngu' ywaakamwamboko bandu babausunika, aatukamwimboko na twenga kwa ndi'la yo isa kwake Tito. 7Lakini kwenda isa kwa Tito baili, ila kai' kwa mboko yamunkamwile. Atuawanikiye mwamwanibi'ki kilu'lu', usunika kwinu na kuniaukya nenga. Na panigayu'wine go, naatipulaika muno.
8Ata manaitei balua yanamwaandikile yampangite muusunike, lakini naaibwenili panga naatiakaya. Kakape panga patumbu naatiyuta kwo tanga panga balua yo yampei usuni, lakini yaai pasene bai. 9Lakini nambi'yambi' nendapulaika, kwenda kwa mwanjaa mwaatiusunika lili, ila kwa kitumbu sa usuni yinu yaimpangite mugalambuke bu'ka mumasambi ginu. Mwaatiusunika kwa ndi'la yaabini Nnu'ngu', kwa nyo twenga tunnumiyeli kwa ndi'la yoyoti. 10Kwa mwanjaa usuni yaibu'kana na Nnu'ngu' impangiya mundu agalambuke bu'ka musambi no kosopolelwa, na ntu'pu' mayuto, lakini usuni ya dunia yi'no ileta kiwo. 11Lolange, usuni yi' ya Nnu'ngu' mwailetike pwaila kasinu, impangite mube na kilu'lu' muno so panga gagapwaika, kumpangite mwiyi'mi panga gamupanga ga kakape. Kai' kumpangite mugasukwe malau, mung'ang'amuke na muyogope, minyikia kunibona no binia muno panga ywakosite apalikwa pwatilwa. Kwa ago goti mulayite panga ntu'pu' likosa mumakowe goti.
12Kitumbu kiku'lu' so andika balua yi'lu' yabileli kwa ywakosite au ywakosilwe. Naandike li'nga mwenga mwabene mutange nnu'ngi' ya Nnu'ngu' mu'lu' mwamukasana kwipiya kwa kitumbu situ. 13Apo nga mwatukamwimboko muno.
Kwenda kamulwamboko baili, ila twaatipulaika muno patumweni Tito apulaike kwa kitumbu sa mwenga mwaboti mwaaupulaise mwoyo wake. 14Nenga naatikunnumba nnu'ngi' yake, na mwenga muniisiyeli. Na kila kili'be sa twammakiye sai sa kakape, kwa nyo ku'lu' kwilumba kwitu kwa Tito kwa kitumbu sinu kukong'ondelilwe panga kakape. 15Na upendo wake kasinu wendayongekeya muno paku'mbu'kya yu'wa kwinu na mwamwampoki kwa isima na kwo lendema. 16Nendapulaika muno kwa mwanjaa nendakumwu'bi'lyanga mumakowe goti.
ទើបបានជ្រើសរើសហើយ៖
2 Akolinto 7: Matumbi
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Pioneer Bible Translators